KALANSEN 14

Miiriya jɔnjɔnw bɔ kɛnɛ kan

Eburuw 8:1

MIIRIYA JƆNJƆN: I lamɛnbagaw dɛmɛ u ka tugu i kɔ i ka kalan na. Ani, a yira ka gwɛ cogo min na hakilinata jɔnjɔn kelen kelen bɛɛ b’i dɛmɛ k’i ka laɲinita dafa ani o ɲɛsinna kalan barokun ma cogo min na.

A KƐCOGO:

Kɛ ni laɲinita ye: A filɛ n’i ka kalan kuun ye ka mɔgɔw lalɔnniya, k’u lasun u ka sɔn miiriya dɔ ma, wala ka dɔ kɛ dɔ ye. O kɔ, basigi o kan k’i ka kalan walawala. I janto ko i ka kalan ka hakilinata jɔnjɔnw b’i dɛmɛ k’o laɲinita dafa.

I yɛrɛ ɲininga ko: “Mɔgɔw ka teli ka ɲiningali wala sɔsɔli jumanw lo kɛ barokun nin koo la? U b’o ɲiningaliw wala o sɔsɔli kɛ ka tugutugu ɲɔgɔn kɔ cogo di?” O kɔ, hakilinataw labɛn ka tugutugu ɲɔgɔn kɔ o cogo kelen na. O la, i lamɛnbagaw bena tugu i kɔ i ka kalan na, u bena i faamu ani u bena sɔn i ka ɲɛfɔli la.
Sinsin i ka kalan barokun kan: I ka kalan kuru bɛɛ la, segi kalan barokun kan i kɛtɔ k’a kumaden jɔnjɔnw fɔ wala k’u bɔɲɔgɔnkow fɔ.
Miiriya jɔnjɔnw ɲɛfɔ ka gwɛ ani o kɛ cogo nɔgɔman na: Miiriya jɔnjɔn minw ɲɛsinna i ka barokun ma ani i be se k’u ɲɛfɔ wagati latigɛnin na, olu dɔrɔn sugandi. Kana miiriya jɔnjɔnw caya. U kelen kelen bɛɛ ɲɛfɔ ka ɲɛ. Kelen ɲɛfɔ, ani lɔ dɔɔni ka sɔrɔ ka dɔ wɛrɛ daminɛ nɛmɛnɛmɛ.

I be se ka miiriya jɔnjɔnw fɔ i ka kalan daminɛ na walisa ka lamɛnnikɛlaw dɛmɛ u ka tugu i kɔ i ka kalan na. I be se fana ka segi u kan kalan kuncɛ tuma na walisa u ka to mɔgɔw hakili la.