KALANSEN 01

Bibulu be se k’i dɛmɛ cogo di k’i ka ɲɛnamaya kɛcogo fisaya?

Édition imprimée

An fanba ka teli k’an yɛrɛ ɲininga koo dɔw la minw ɲɛsinna an ka ɲɛnamaya, tɔɔrɔ, saya ani siniɲasigi koo ma. Ka fara o kan, loon o loon an jɔrɔnanko ye ka se k’an yɛrɛ balo wala ka hɛɛrɛ sɔrɔ an ka denbaya kɔnɔ. Mɔgɔ caaman y’a ye ko Bibulu y’u dɛmɛ k’u ka ɲiningalibaw jaabili sɔrɔ. Nka o dɔrɔn tɛ. U y’a ye fana ko u be ladili minw sɔrɔ Bibulu kɔnɔ, o b’u nafa loon o loon. Ele ka miiri la, Bibulu be se ka bɛɛ nafa wa?

1. Ɲiningali jumanw jaabili be sɔrɔ Bibulu kɔnɔ?

Ɲiningalibaba nunu jaabili be sɔrɔ Bibulu kɔnɔ: Ɲɛnamaya daminɛna cogo di? A kuun ye mun lo ye? Mun na mɔgɔ ɲumanw be tɔɔrɔ? Mun lo be kɛ saya kɔ? Mun na kɛlɛw ka ca ten k’a sɔrɔ bɛɛ be hɛɛrɛ lo fɛ? Mun lo bena dugukolo sɔrɔ? Bibulu b’an jija an k’a ɲini k’o ɲiningaliw jaabili sɔrɔ. Mɔgɔ miliyɔn caaman y’o lo kɛ ani o jaabiliw y’u wasa.

2. Bibulu be se k’an dɛmɛ cogo di an ka ɲɛnamaya kɛ hɛɛrɛ la loon o loon?

Ladili ɲumanw be sɔrɔ Bibulu kɔnɔ. A b’a yira denbayaw be se ka hɛɛrɛ sɔbɛ sɔrɔ cogo min na. A b’a yira fana an be se ka min kɛ n’an niin degunnin lo, ani an be se ka ninsɔndiya sɔrɔ an ka baara la cogo min na. I bena a ye Bibulu be min fɔ o koow la. Ani, n’an tora ka kalan kɛ ɲɔgɔn fɛ, i bena koo caaman wɛrɛw faamu. A laban, i ben’a ye ko “Kitabu kuma bɛɛ [o kɔrɔ fɛɛn o fɛɛn be sɔrɔ Bibulu kɔnɔ] . . . Nafa b’a la.”—2 Timote 3:16, Bible senuma.

Gafe nin ma labɛn walisa ka bila Bibulu nɔɔ na. Nka, a b’i jija ele yɛrɛ ka Bibulu sɛgɛsɛgɛ. O kama, vɛrise minw be sɔrɔ gafe nin kɔnɔ, an b’i jija i k’u kalan ani k’a filɛ n’u bɛnnin lo ni gafe nin kɔnɔna kumaw ye.

A ƝINI KA DƆ LƆN TUGUN

An k’a filɛ Bibulu ye mɔgɔ dɔw dɛmɛ cogo min na, i be se ka min kɛ walisa a kalan ka diya i ye, ani fɛɛn min kama a ka ɲi i k’a to mɔgɔ dɔ k’i dɛmɛ k’a faamu.

3. Bibulu be se ka sira ɲuman yira an na

Bibulu be i n’a fɔ yeelen min fanga ka bon. A be se k’an dɛmɛ ka desizɔn ɲumanw ta ani k’a lɔn min bena kɛ sini ma.

Zaburuw 119:105 kalan. O kɔ, a’ ye ɲiningali nunu kɛ ani ka baro kɛ u kan:

O Zaburu sɛbɛbaga tun be mun lo miiri Bibulu koo la?
Ele do, i be mun lo miiri Bibulu koo la?

Cɛɛ dɔ be tagamana farayɔrɔw la, kɔda la sufɛ ani a ye tɔrɔsi mɛnɛ walisa ka yeelen bɔ a ka sira kan.

4. An be se k’an ka ɲiningaliw jaabili sɔrɔ Bibulu kɔnɔ

Muso dɔ tun b’a yɛrɛ ɲiningara koo dɔw la minw tun b’a hakili ɲagamina kabi saan caaman ani a y’o ɲiningaliw jaabili sɔrɔ Bibulu kɔnɔ. VIDEWO yira. O kɔ, a’ ye ɲiningali nunu kɛ ani ka baro kɛ u kan:

VIDEWO: Aw jigi kana tigɛ abada! (1:48)

Videwo nin na, muso nin tun b’a yɛrɛ ɲiningara koo jumanw lo la?
A’ ye dɛmɛ juman lo sɔrɔ bibulukalan na?

Bibulu b’an jija an ka ɲiningaliw kɛ. Matiyo 7:7 kalan. O kɔ, a’ ye ɲiningali nin kɛ ani ka baro kɛ o kan:

Ɲiningali jumanw b’i fɛ Bibulu be se k’i dɛmɛ ka minw jaabili sɔrɔ?

5. Bibulu kalangwɛ be se ka diya i ye

A ka di mɔgɔ caaman ye ka Bibulu kalan ani u be nafa sɔrɔla o la. VIDEWO yira. O kɔ, a’ ye ɲiningali nunu kɛ ani ka baro kɛ u kan:

VIDEWO: Bibulu kalangwɛ (2:05)

Kanbelew ni sunguru minw kofɔra videwo nin na, u tun be mun lo miiri kalangwɛ koo la?
Nka, mun na a ka di u ye sisan ka Bibulu kalan?

Bibulu kɔnɔnakow be se k’an dusu saalo ani ka jigiya di an ma. Ɔrɔmukaw 15:4 kalan. O kɔ, a’ ye ɲiningali nin kɛ ani ka baro kɛ o kan:

Yala a bena diya i ye k’a lɔn dususalo kuma minw be sɔrɔ Bibulu kɔnɔ ani jigiya min kofɔra a kɔnɔ wa?

6. A ka nɔgɔ ka Bibulu faamu ni mɔgɔ dɔ b’i dɛmɛ

Mɔgɔ caaman be Bibulu kalan u yɛrɛ ma. Nka u y’a ye ko n’u be baro kɛ a kan ni mɔgɔ wɛrɛ ye, o b’u nafa. Kɛwaliw 8:26-31 kalan. O kɔ, a’ ye ɲiningali nin kɛ ani ka baro kɛ o kan:

Mun lo be se k’i dɛmɛ ka Bibulu faamu?—Vɛrise 30 ani 31nan lajɛ.

Jaa fɔlɔ: Waajulikɛla Filipu be Kitabu kɔnɔna kumaw ɲɛfɔra Etiyopikacɛ dɔ ye. Jaa 2nan: Jehova Seere dɔ be bibulukalan kɛra ni bamusoman dɔ ye, denmisɛn fila be min fɛ. — Etiyopikacɛ mako tun be dɛmɛ na walisa ka kitabu kɔnɔna kumaw faamu. Bi, mɔgɔ caaman y’a ye ko nafa b’a la ka baro kɛ ni mɔgɔ wɛrɛw ye Bibulu koo la.

NI MƆGƆ DƆ Y’A FƆ I YE KO: “N’i be bibulukalan kɛ, i b’i ka wagati lo tiɲɛna.”

I bena a tigi jaabi cogo di? Mun na do?

MIIRIYA JƆNJƆN

Bibulu ka ladiliw ɲɛsinna an ka loon o loon ɲɛnamaya koo ma. An be se k’an ka ɲiningalibabaw jaabili sɔrɔ a kɔnɔ. A be mɔgɔw dusu saalo ani ka jigiya di u ma.