“Mɔgɔ min tigɛ foninin lo,” Ala bena o tigi duga

KA SARAKA bɔ Ala ye, o kɔrɔtanin lo tiɲɛn batoli la kabi wagatijan. Israɛldenw tun be to ka bɛgɛnw saraka. Sanga ni wagati bɛɛ, a lɔnna ko kerecɛnw be “tanuli sarakaw” bɔ Ala ye. Saraka wɛrɛw be yen fana minw ka di Ala ye kosɔbɛ (Eburuw 13:15, 16, ABM). Minw b’o sarakaw bɔ, u be ninsɔndiya ni duga sɔrɔ. An ka ɲɛyirali dɔw lajɛ minw b’o yira.

Anɛ tun ye Ala sagokɛla kantigi dɔ ye. A tun b’a fɛ ka dencɛ sɔrɔ, nka a tun tɛ se ka deen wolo. Delili dɔ kɔnɔ, a y’a daa di Jehova ma ko n’a ye dencɛ di ale ma, a bena a ‘kɔsegi Masaba ma a k’a sii bɛɛ kɛ ale bolo.’ (1 Sam. 1:10, 11). O kɔ, Anɛ ye kɔnɔ ta ani a ye dencɛ wolo k’a tɔgɔ la ko Samuyɛli. A ye Samuyɛli daa bɔ sin na tuma min na, a tagara n’a ye Ala ka fanibugu kɔnɔ i ko a tun y’a daa di Jehova ma cogo min na. Jehova ye Anɛ duga a ka yɛrɛsaraka hakili kosɔn. A ye nɛɛma sɔrɔ ka deen duuru wɛrɛ sɔrɔ. Samuyɛli kɛra kira ani Bibulu sɛbɛbaga dɔ ye.—1 Sam. 2:21.

I ko Samuyɛli ni Anɛ, nɛɛmaba lo bi kerecɛnw fɛ k’u yɛrɛ di ka baara kɛ u Danbaga ye. Yezu y’a daa di ko an be saraka o saraka kɛ Jehova ka batoli kama, an bena dugaba sɔrɔ o la.—Mariki 10:28-30.

Dɔrɔkasi tun ye kerecɛn ye saan kɛmɛkulu fɔlɔ la. A tun lɔnna ko “mɔgɔɲuman tun lo, ka fantanw dɛmɛ, o tun y’a ka baara ye.” O kɔrɔ, a tun b’a yɛrɛ saraka walisa ka tɔɔw dɛmɛ. A fɔ man di, a “banana, nga bana ma kun a la.” O ye kafodenw bɛɛ dusu kasi. Tuma min na kalandenw y’a mɛn ko Piyɛri tun b’u ka mara la, u y’a deli ko a ka teliya ka na. Miiri k’a filɛ u ninsɔndiyara cogo min na tuma min na Piyɛri ye Dɔrɔkasi kunu ka bɔ saya la. O tun ye sukununi fɔlɔ ye, Yezu ka ciden dɔ ye min kɛ ani o kofɔra Bibulu kɔnɔ! (Kɛw. 9:36-41). Ala ma ɲinɛ Dɔrɔkasi ka yɛrɛsaraka hakili kɔ (Eburuw 6:10). A ka ɲumanya wale sɛbɛra Bibulu kɔnɔ walisa an k’a ka ɲɛyirali ɲuman ladegi.

Ciden Pol fana ye ɲɛyirali ɲuman ye an fɛ. A y’a ka wagati kɛ ka mɔgɔw dɛmɛ ani k’a mako don u la. Balima minw tun be Korɛnti, Pol ye bataki sɛbɛ u ma ko: “Ne kɔni fɛ, ne labɛnnin lo ka n bololafɛnw bɛɛ ban aw kosɔn, ka tila ka n yɛrɛ di k’aw dɛmɛ.” (2 Kor. 12:15). Pol y’a faamu ko n’i b’i yɛrɛ saraka tɔɔw nafa kosɔn, o b’i ninsɔndiya kosɔbɛ. Min yɛrɛ kɔrɔtanin lo, o ye ko Jehova b’i duga ani i koo be diya a ye.—Kɛw. 20:24, 35.

Tiɲɛn na, n’an b’an ka wagati n’an ka fanga kɛ ka dɛmɛ don Masaya ka koow la ani k’an kerecɛnɲɔgɔnw dɛmɛ, o ka di Jehova ye. Nka, yala an be se ka dɛmɛ don Masaya waajuli baara la cogo wɛrɛw la wa? Ɔnhɔn! An be se k’o kɛ n’an be sɔn ka niliw kɛ fana. O cogo la, an be bonya la Ala kan. O niliw be kɛ ka dɛmɛ don waajuli baara la min be kɛ duniɲa kuru bɛɛ kɔnɔ. Ɲɛyirali fɛ, o be kɛ ka misɔndenw ani kudayi baarakɛla wɛrɛw dɛmɛ. O be kɛ fana ka gafew ni videwow labɛn, k’u bayɛlɛma, ka dɛmɛ don yɔrɔ minw na balawow kɛra, ka Masaya Boonw lɔ ani k’u ladon. An ka la a la ko “mɔgɔ min tigɛ foninin lo,” Ala bena o tigi duga. Ka fara o kan, n’an b’an ka fɛɛn nafamanw di Jehova ma, an be bonya la a kan.—Talenw 3:9; 11:25.

Dɔw be dɛmɛ don waajuli baara la cogo minw na

I ko ciden Pol ka tile la, bi, mɔgɔ caaman be wari dɔ “mara gɛrɛfɛ” walisa k’o don nili buwati kɔnɔ min bilara “duniɲa kuru bɛɛ waajuli baara” kama (1 Kor. 16:2). Kalo o kalo, kafow b’o wari ci Jehova Seerew ka Betɛli dɔ ma min be waajuli baara koo ɲɛnabɔ u ka jamana na. E yɛrɛ fana be se k’i ka niliw ci Jehova Seerew ka tɔɔn dɔ ma min b’i ka jamana na. U ka tɔnba min b’i ka jamana na, n’i b’a fɛ k’o tɔgɔ lɔn, i ka kaan bɔ Betɛli ma. A ka ladɛrɛsi be sɔrɔ www.jw.org kan. I be se ka niliw ci tɔnbolo ma cogo minw na, o filɛ nin ye:

NILI MINW BE SIN KA CI

Mɔgɔ be tɛmɛ banki karti dɔw fɛ ka wari ci, ka juru sara wala ka fɛɛn dɔ san. I be se ka tɛmɛ o karti fana fɛ ka nili kɛ. Jamana dɔw la, i be se ka tɛmɛ www.jw.org wala Betɛli ka site wɛrɛ fɛ ka nili kɛ.
I be se ka wari, fɛɛn sɔngɔ gwɛlɛw wala nafolofɛn wɛrɛw di. Lɛtɛrɛ dɔ fara a kan k’a yira ko i tɛna segi k’o fɛɛnw minɛ tugun.

NILIW, I BE SE KA SEGI KA MINW MINƐ KƆFƐ

I be se ka wari di ani kɔfɛ n’i mako sera a ma, u b’a segi i ma.
Lɛtɛrɛ dɔ fara a kan k’a yira ko n’i mako sera a ma, i bena segi k’a minɛ.

NILI KƐCOGO WƐRƐW

Ka wari ni bololafɛn sɔngɔ gwɛlɛw niin bɔ a la, i be se ka tɛmɛ fɛɛrɛ wɛrɛw fɛ ka nili kɛ walisa ka dɛmɛ don waajuli baara la min be kɛ duniɲa kuru bɛɛ kɔnɔ. O fɛɛrɛw kofɔra jukɔrɔ. I mana fɛɛrɛ o fɛɛrɛ sugandi, kɔn ka kaan bɔ i ka jamana ka Betɛli ma walisa k’a filɛ min be se ka kɛ. Jamanaw ka sariyaw n’u ka lanpokow tɛ kelen ye. O kama, a kɔrɔtanin lo i ka ladili ɲini kolɔnbaga dɔ fɛ walisa k’a filɛ fɛɛrɛ min ka fisa.

Asiransi ani pansiyɔn: I be se ka asiransi kɛ ani k’a fɔ ko i ka pansiyɔn wala i ka ninsara ka di Jehova Seerew ka tɔnbolo dɔ ma.

Kɔnti, banki la: I be se ka wari bila banki la ani i be wagati dɔ kɛ i tɛ se a ma (dépôt à terme). I be se k’o wari wala i ka pansiyɔn di Jehova Seerew ka tɔnbolo dɔ ma walisa a ka baara kɛ n’a ye. Wala i be se ka labɛn kɛ walisa n’i sara, i ka wari min be banki la, o ka di Jehova Seerew ka tɔnbolo dɔ ma ka kɛɲɛ ni banki ka sariyaw ye.

Jago tɔnɔ: I be tɔnɔ min sɔrɔ i ka jago la, i be se k’o wari dɔ don buwati la Masaya Boon kɔnɔ wala k’a ci Jehova Seerew ka tɔnbolo dɔ ma.

Luu ni parsɛli: Luu ni parsɛli minw be se ka feere, i be se k’u di Jehova Seerew ka tɔnbolo dɔ ma. Ni luu b’i fɛ, i be se k’o di k’a kɛ nili ye. Nka, a ka ɲi i ka sɛbɛ ci k’a yira ko i bena to o luu kɔnɔ i sii bɛɛ la.

Tɛstaman: I be se ka sɛbɛ dɔ kɛ ka kɛɲɛ ni sariya ye k’a yira ko i bololafɛnw wala i ka wari ka di cɛɛn ye Jehova Seerew ka tɔnbolo dɔ ma. Wala i be se k’a sɛbɛ ko i ka cɛɛn faan dɔ ka di Jehova Seerew ka tɔnbolo dɔ ma.

I ko a fɔra “Nili kɛcogo wɛrɛw” yɔrɔ la cogo min na, n’i b’a fɛ ka tɛmɛ o fɛɛrɛ dɔ fɛ ka nili kɛ, fɔɔ i ka labɛn dɔw kɛ.

N’i be kunnafoni wɛrɛw fɛ, i be se ka yɔrɔ nin digi jw.org kan: “Nili kɛ an ka baara kama min be kɛ duniɲa kuru bɛɛ kɔnɔ.” (A be sɔrɔ jw.org daminɛyɔrɔ la, jukɔrɔ.) I be se ka kaan bɔ Jehova Seerew ka tɔnbolo ma Benɛn jamana na. I be se ka tɛmɛ telefɔni fɛ k’o kɛ wala ladɛrɛsi min dira jukɔrɔ yɔrɔ la. Wala i be se ka kaan bɔ i ka jamana ka tɔnbolo ma.