An ka mɔgɔw ɲɛnatigɛ bi kunnafoniw fɛ
1 Yala i b’a fɛ ka kɛ ni hakilinata ɲumanw poyi yɔrɔ banbali ye min b’i dɛmɛ k’i ka cidenyabaara lakuraya ani ka mɔgɔw ɲɛnatigɛ Bibulu ka cira fɛ wa? N’o lo, i ka baro ladon ni bi koow ye minw be kɛraduniɲa kɔnɔ wala kiin kɔnɔ. Koo minw be kɛra kiin ani jamana kɔnɔ wala duniɲa ka kunnafoniw, i ka hakilinataw latɔmɔ o dɔw la. Bi kunnafoniw tɛ yɛlɛma ka ban (1 Kɔr. 7:31). An ka ɲɛyirali dɔw ta.
2 Sɔrɔɲini gwɛlɛyaw ani fɛɛnw sɔngɔ yɛlɛli be mɔgɔw kɔnɔgwan kosɔbɛ. O kama an be se k’a fɔ ko:
◼ “Yala aw ye nin kunnafoni mɛn ko dɔ farala [a’ ye o fɛɛn tɔgɔ fɔ] sɔngɔ kan tugun wa?” An fana be se ka baarantanya koo fɔ n’o y’a sɔrɔ baaradakunba dɔ ye baaraden caaman bolo bɔ baara la. Ka kɛɲɛ ni an b’a fɛ sɔsɔli ka taga faan min na, an ka nin ɲiningali dɔ lawili: “Yala aw y’aw yɛrɛ ɲininga ka ye mun na balo sɔrɔko ka gwɛlɛ ten wa?” wala “Aw ka miiri la, yala a bena gwɛlɛya mɔgɔw ma ten kudayi u ka se u yɛrɛ kɔrɔ wa?”
3 Fariyako minw be kɛ gwa kɔnɔ wala lakɔlisow la, an be se ka kuma o kan. An ka ɲiningali kɛ nin cogo la:
◼ “Yala aw y’a kalan zurunali kɔnɔ ko [a’ ye kiin na koo dɔ fɔ]?” O kɔ, an ka ɲiningali kɛ ko: “Aw ka miiri la, mun na fariyakow ka ca ten duniɲa kɔnɔ?” wala: “Aw ka miiri la yala loon dɔ an lafiyalen bena kɛ wa?”
4 Sanjiba be na ni balawo minw ye, dugukolo yɛrɛyɛrɛw, koɲagaminenw jamanaw kɔnɔ yɔrɔ ni yɔrɔ duniɲa kɔnɔ, o fana be kɛ sababu ye ka mɔgɔw ɲɛnatigɛ. Mun na i tɛ ɲiningali kɛ ko:
◼ “Yala Ala nɔɔ lo ye [a’ ye balawo dɔ koo fɔ]?” An fana be se ka kuma ka taga jamana koɲagaminen kɔsa dɔw kan ani k’a fɔ ko: “Ni bɛɛ be hɛɛrɛ fɛ, mun na a do ka gwɛlɛ k’a sigi?”
5 An k’an janto ka kɛ koow kalama, o minw be se ka baro ladon. Anbe miirinata ɲuman dɔw sɔrɔ barokun “Actualité” jukɔrɔ, gafe Comment raisonner kɔnɔ, a ɲɛɛw 9 ni 10 na. O n’a ta, an kana lɔyɔrɔ ta politikikow wala jama ka sɔsɔlikow kan. An ka mɔgɔw ɲɛsin Sɛbɛninw ma ani an k’a ɲɛfɔ ko Ala ka Masaya kelenpe lo ye hadamadenw ka kunkow ɲɛnabɔcogo ye kudayi.