Ka waajuli kɛ duniɲa kɔnɔ, min be yɛlɛma yɛlɛma tuma bɛɛ
1 Koow ka teli ka yɛlɛma dɛ! Koo dɔw be se ka bari ka kɛ mɔgɔw ka barokun ye i n’a fɔ ninw: balawo, wariben, politikiko ɲagaminen dɔ, wala bɔnɛba dɔ, kunnafoni caaman dira min koo la. Nka, koo wɛrɛ fana be se ka mɔgɔw ɲɛmatiɲɛ joona (Kew. 17:21; 1 Kɔr. 7:31). Komi duniɲa nin ka koow be yɛlɛma yɛlɛma tuma bɛɛ, cogo juman na an be se ka mɔgɔw ɲɛnatigɛ ni Masaya kibaro ye?
2 An k’a ɲini ka mɔgɔw ka ɲɛnakow faamuya: Mɔgɔw ɲɛnatigɛ cogo dɔ ye ka baro kɛ bi koow kan. Loon dɔ, walisa k’a lamɛnbagaw jagwɛlɛya u ka miiri u lɔyɔrɔ koo la Ala ɲɛ kɔrɔ, Yesu ye bɔnɛ dɔw kofɔ. Mɔgɔw hakili tun b’o bɔnɛ la (Luka 13:1-5). O cogo kelen na, n’an be kibaro duman kofɔra mɔgɔw ye, an ka ɲi ka kibaroya kura dɔ wala kiin ka koo dɔ fɔ, mɔgɔw b’u mako don koo minw na. Nka, baro kɛtɔ o koow kan, an ka kan ka kɔrɔsili kɛ an kana kuma ka politiki wala jɛkulu koow kɔrɔta.—Yuh. 17:16.
3 Mɔgɔw be miirila sisan koo minw kan, an be se k’u lɔn cogo juman na? N’a sɔrɔ o lɔncogo fisaman ye ka ɲiningali bila u ye dɔrɔn, ani ka lamɛnni kɛ u fɛ (Mat. 12:34). N’an b’an mako don mɔgɔw la, o bena an lasun ka mɔgɔw ka fɛtaw jati ani ka ɲiningali wɛrɛw bila u ye. An lamɛnbaga mana teliya k’a ka fɛta fɔ, o be se k’a yira ko mɔgɔ wɛrɛw be miiri o cogo kelen na kiin kɔnɔ. An be se ka tɛmɛ o fɛ ka seereya di kiin kɔnɔ.
4 An ka kuma yiracogo labɛn: An be se ka ladili nafamanw sɔrɔ gafe Comment raisonner kɔnɔ n’an be labɛnna waajuli kama duniɲa nin kɔnɔ, min be yɛlɛma yɛlɛma tuma bɛɛ. O gafe ɲɛɛ 10-11nan na, barokun “Crime/sécurité”, ani “Actualité” jukɔrɔ, ladili nafamanw be sɔrɔ. U b’a yira cogo min na an be se ka bi tile kibaroyaw ladon an ka baro kɔnɔ. O ladili ɲɔgɔnnaw be se ka sɔrɔ An ka Masaya Cidenyabaara ɲɛɛ 4nan na, saan 2000, sɛputanburukalo ta. Kuma yiracogo labɛntɔ, i janto ka vɛrise kɛɲɛnen dɔ fara a kan.
5 An k’an janto a la ko mɔgɔw ka ɲɛnakow be yɛlɛma yɛlɛma tuma bɛɛ an ka kiin kɔnɔ. O kama, an fana ka kibaro duman yiracogo makɛɲɛ ni koow cogoya ye. O la, an bena kuma ni mɔgɔw ye u ka ɲɛnako sɔbɛw kan. O cogo la, Ala min ka jogow n’a ka sariyaw tɛ yɛlɛma, an bena mɔgɔ caaman dɛmɛ k’ale lɔn.—Yaku. 1:17.