I ka siran Jehova ɲɛ tile kuru bɛɛ kɔnɔ

¹ “Jehova ɲɛsiran ye hakilitigiya daminɛ lo ye.” (Zaburuw 111:10, NW). A be an lasu ka kɛwale ɲumanw kɛ ani ka fara koo jugu la (Ntal. 16:6). O ɲɛsiranya ye ka bonya dunba la an Danbaga kan. O be an ɲɔndi an koo kana goya a ma ani an k’an yɛrɛ tila kanbilali la. Fɛɛn lo, an mako b’a la k’a sɛnɛ ani k’a yira tile kuru bɛɛ kɔnɔ.—Ntal. 8:13.

² Loon o loon Sitanɛ ka duniɲa hakili be an degun kosɔbɛ walisa an ka sɔn a ka sira jugumanw la (Efes. 6:11, 12). An farisogo dafabali jurumutɔ be an sama a yɛrɛ ma ka taga juguman faan fɛ (Gal. 5:17). O kama, walisa ka kolo Jehova ka cifɔlenw ye, ka kɛ hɛrɛ la ani ka ɲɛnamaya sɔrɔ, an ka kan ka siran a ɲɛ tile kuru bɛɛ kɔnɔ.—Dut. 10:12, 13.

³ Heburuw 10:24, 25 la, o b’an jija an ka lajɛn kɛ, ka ɲɔgɔn jagwɛlɛya “janko” bi loonw kosɔn an be ɲɛnamaya kɛra minw kɔnɔ. Ka taga lajɛnw na tuma bɛɛ, o ye ɲɛnamayako ye n’an b’a fɛ ka to niin na nin laban loonw kɔ. N’an be siran ka goya Jehova ye, o b’an ɲɔndi ka taga lajɛnw na ani u b’an dɛmɛ ka lajɛnw nafaba diya lɔn. Ala ɲɛsiran be minw na u b’a jate ko kerecɛnya lajɛn tagali ye nɛɛma senuman ye.

⁴ Cikan min dira an ma ka Masaya kibaro duman waajuli kɛ, an kɛtɔ ka tugu o cikan la, o ye cogo wɛrɛ ye an fɛ k’a yira ko Ala ɲɛsiran be an na (Mat. 28:19, 20; Kɛw. 10:42). An ka waajulibaara kuun fɔlɔ ye ka mɔgɔ wɛrɛw dɛmɛ ka Jehova ɲɛsiran sɛnɛ ani ka kolo a sago ye. An b’o dafa an kɛtɔ ka viziti kuraw kɛ, k’an jija ka bibulukalanw daminɛ ani ka mɔgɔ wɛrɛw kalan Ala ka cikanw bɛɛ la. O cogo la, an b’a yira ko Jehova ɲɛsiran ni an mɔgɔɲɔgɔn kanuya b’an na.—Mat. 22:37-39.

⁵ Ala ɲɛsiran tɛ minw na, u tɛ hakili senu koow nafa si jate, ani u be ben duniɲa ka fɔɲɔ wala a ka miiriya la, o min be mɔgɔ faga (Efes. 2:2). An cɛsirinenba ka kɛ ka “baara kɛ [Ala] ye ka a diyanyekow kɛ ni Ala bonyali ni a ɲɛsiran ye.” (Heb. 12:28, A.B.U. 1987). O tuma, Jehova ɲɛsiran be minw na tile kuru bɛɛ kɔnɔ, an bena olu ka dubaw suman tigɛ.