Tile fila lajɛnba kura ka labɛn

Ɲɛsiran kɔrɔ dɔ ko “bonya dunba, min dagara ka ɲɛsin Ala ma.” O kɔrɔ nin ɲɛsinna ɲɛsiran ɲuman ma, Bibulu be min kofɔ i ko “hakilitigiya daminɛ.” (Zab. 111:10). O be daan na ni siranya sifa wɛrɛ ye, min ye see sɔrɔ Sitanɛ ka duniɲa nin kan. Tuma min na an be Jehova ɲɛsiran sɛnɛ, an be se k’an yɛrɛ tanga o siranya jugu ma cogo di? Waajulibaara saan 2002 ka tile fila lajɛnba kura labɛn be kuma o lo kan. A kuun ko “A’ ye siran Ala ɲɛ ani a’ ye nɔɔrɔ la a kan.” (Jira. 14:7, NW). An bena a faamuya cogo juman na Jehova ɲɛsiran b’an dɛmɛ: an mɔgɔ kelen kelen, ani ɔriganisasiyɔn kuru bɛɛ.

Ɲɛsiranya be na ni haminanko wala farifaga ye. Ani a be mɔgɔ bali ka gwɛlɛyaw kunbɛn. Nka Bibulu b’a fɔ ko: “Mɔgɔ minw be siran Jehova ɲɛ ... olu ye duba deenw ye.” (Zab. 128:1, A.B.U., 1961). Lajɛnba ka kalan bena a yira an na cogo min na an be se ka see sɔrɔ tiɲɛn batoli ka gwɛlɛyaw kan. An bena a ye cogo min na an be se ka mɔgɔ kuraw dɛmɛ ka Ala ɲɛsiranya ɲuman sɛnɛ. O ɲɛsiranya bena u lasu tiɲɛn na k’a ɲini ka baara kɛ Ala ye n’u dusukun bɛɛ, n’u niin bɛɛ, n’u miiriya bɛɛ, n’u fanga bɛɛ ye (Marka 12:30). District kɔrɔsibaga ka kalan bena loon fɔlɔ ka kalan kuncɛ. A kalankun ko: “Aw be mɔgɔ minw kanu, aw ka to ka aw masiri u la tuma o tuma.” A bena a ɲɛfɔ cogo min na an ka kan k’an yɛrɛ kɔrɔsi Sitanɛ ka kɔrɔbɔliw ma, n’a b’a ɲini k’an mabɔ Jehova la, ani an denbaya n’an balima kerecɛnw la.

“A’ ye siran Jehova ɲɛ, aw kana siran hadamadenw ɲɛ”. O ye tile filanan ka kalan dɔ kuun ye. Mɔgɔ naani bena ɲɛfɔli kɛ o kalankun kan ka tugu ɲɔgɔnw kɔ. U bena a ɲɛfɔ mun na ani cogo juman na an ka kan ka see sɔrɔ siranya sifa bɛɛ kan. O ye siranya ye min b’an bali k’an ka cidenyabaara kɛ k’a dafa, ka kantigiya ni dusukun ɲuman mara lakɔli la ani baarakɛyɔrɔ la. Foroba kalan kuun ko: “A’ ye siran Ala ɲɛ, ani a’ y’a ka cifɔlenw mara”. A basiginen be Jirali sapitiri 14nan ka koow kan, minw tugutugunen be ɲɔgɔn na. Walisa k’o tile fila lajɛnba kuncɛ, u bena an jagwɛlɛya ni kalan nin ye: “to ka tagama Jehova ɲɛsiran na.”

An kana fɔn lajɛnba ka kalan nafaman dɔw la i n’a fɔ: Tewokarasi cidenyabaara lakɔli, waajulibaara lajɛn mɔdɛli, batɛmu kalan, ani La Tour de Garde kalan surun. I be Bibulu kalanna ni mɔgɔ minw ye, u weele ka taga o lajɛnba la. Mɔgɔ o mɔgɔ b’a fɛ ka batise, a ka kan ka ɲɛsin diinan mɔgɔkɔrɔw ɲɛbila ma joona joona. An kelen kelen bɛɛ b’a fɛ k’a yira ko Jehova ɲɛsiran ɲuman b’an na. Ani an b’a fɛ ka nɔɔrɔ la a kan, n’an ma fɔn o labɛn cɛɲumanba la!