Yala i be waajuli kɛ ni jagwɛlɛya ye wa?
1 Hali ni Piɛre ni Yuhana juguw y’u lalɔ k’u bagabaga, o bɛɛ n’a ta, u ye Masaya cira weeleweeleda ni jagwɛlɛya ye (Kɛw. 4:17, 21, 31). Ka waajuli kɛ ni jagwɛlɛya ye, o kɔrɔ ye mun ye an fɛ bi?
2 Ka seereya kɛ ni jagwɛlɛya ye: “Jagwɛlɛya” kɔrɔ wɛrɛ ye “dusuman”, o min kɔrɔ ko “siranbaliya, dusu barika, ani timinandiya.” Kerecɛn lakikaw fɛ, ka waajuli kɛ ni jagwɛlɛya ye, o kɔrɔ ko ka kuma ni sigasiga ani siranya t’i la, koow cogoya mana bɛn tuma o tuma ka kibaro duman fɔ mɔgɔ wɛrɛw ye (Kɛw. 4:20; 1 Piɛre 3:15). O kɔrɔ ko an tɛ maloya ka kibaro duman fɔ (Zab. 119:46; Rom. 1:16; 2 Tim. 1:8). O cogo la, jagwɛlɛya ye jogo ye, an mako be min na ka Masaya kibaro duman waajuli cira dafa nin laban wagati la. A be an ɲɔndi ka kibaro duman fɔ yɔrɔ o yɔrɔ mɔgɔ be sɔrɔ.—Kɛw. 4:29; 1 Kɔr. 9:23.
3 Jagwɛlɛya lakɔli la: Yala siranya wala sigasiga dusu b’i la min b’a to a ka gwɛlɛ i ma ka waajuli kɛ i filankuruw ye lakɔli la wa? Tuma dɔw la a man nɔgɔ, a yɛrɛ be se ka gwɛlɛya. Nka Jehova bena barika don i la n’i ye jagwɛlɛya deli a fɛ ka mɔgɔ wɛrɛw waaju (Zab. 138:3). Jagwɛlɛya bena i dɛmɛ k’i yɛrɛ yira Jehova Seere dɔ ye ani k’i lafasa yɛlɛkow ma. I kɛtɔ ka waajuli kɛ lakɔliso, i lamɛnbagaw be se ka kisi o sababu fɛ.—1 Tim. 4:16.
4 Jagwɛlɛya baarakɛyɔrɔ la: Yala o b’i lɔn i ka baarakɛyɔrɔ la i ko Jehova Seere dɔ wa? I be tag’a sɔrɔ, kibaro duman tɛ se k’i baarakɛɲɔgɔn dɔw sɔrɔ fɔ n’i ye dɔ fɔ u ye. I ka jagwɛlɛya fana be se k’i dɛmɛ ka wagati labilalen deli i ka baarakɛyɔrɔ la kerecɛnya lajɛnw ni lajɛnbaw kama.
5 Jagwɛlɛya kɔrɔbɔliw wagati la: Jagwɛlɛya kɔrɔtalen lo kosɔbɛ n’an be kɔrɔbɔliw kunbɛnna (1 Thess. 2:1, 2). A b’an dɛmɛ an sinsinnen ka to an ka lanaya la n’o b’an bagabaga, k’an yɛlɛ wala k’an kɔrɔbɔ ni juguya ye (Fil. 1:27, 28). A be fanga di an ma walisa an k’an yɛrɛ lafasa ni barika ye tuma min na o b’an degun janko an ka an ka Ala, Jehova, sariyakolow tiɲɛ. A fana be fanga don an na walisa an ka kɛ hɛrɛkɛla ye tuma min na mɔgɔ wɛrɛw be kɛlɛ lawili.—Rom. 12:18.
6 An yɛrɛ ka gwɛlɛya mana kɛ min o min ye, an ka timinandiya kibaro duman waajuli kɛli la ni jagwɛlɛya ye.—Efes. 6:18-20.