I mɔgɔɲɔgɔnw ka degun, ani i ka nɛɛma ka waajuli kɛ
1 An mɔgɔɲɔgɔnw degun be nɔba to an kan, ɲuman wala juman kama. An ni mɔgɔ minw be baara kɛ Jehova ye, u be nɔɔ ɲuman bila an na k’an lasu kerecɛnya wale ɲumanw kɛli la (Heb. 10:24). Nka, an somɔgɔ minw tɛ Seerew ye, baarakɛɲɔgɔnw, lakɔlifilankuruw, sigiɲɔgɔnw, wala an lɔnbaga wɛrɛw be se k’an degun janko an ka sira dɔ ta min bɛnnen tɛ ni kerecɛnya sariyakolow ye. U be se ka an “tɔgɔ jugu fɔ . . . [an] tagama cogo ɲuman [kosɔn] Krisita la.” (1 Piɛre 3:16, A.B.U. 1987). Cogo juman na an cɛɛ sirinen be se ka to ka waajuli kɛ ka taga, o degunw bɛɛ n’a ta?
2 Denbaya mɔgɔw: Tuma dɔw la, min ye furucɛ ni facɛman ye, n’a tɛ Jehova Seere ye, a t’a fɛ a muso n’a denw ka waajuli kɛ bɛɛ ɲɛ na. O koo kɛra gwa dɔ kɔnɔ Mɛkisiko jamana na. Cɛɛ dɔ ka muso n’a den wolonfila donna tiɲɛn kɔnɔ. A daminɛ na, a ye bali sigi sabu a tun t’a fɛ u ka waajuli kɛ ani ka Bibulu sɛbɛw kofɔ mɔgɔw ye soo ni soo. A tun b’a miiri k’o baara b’u danbe dɔgɔya. Nka a muso n’a denw sinsinnen tora u ka latigɛli kan ka baara kɛ Jehova ye ani k’u sendon waajulibaara la tuma o tuma. Wagati dɔ sera, cɛɛ y’a daminɛ k’a kɔrɔsi ko tɔnɔ b’a la ka sɔn Ala ka waajulibaara labɛn na, ani ale fana y’a yɛrɛkun di Jehova ma. A ye saan 15 kɛ ka sɔrɔ ka sɔn tiɲɛn na. Nka, yala a tun bena sɔn a la ten n’a denbaya tun ma timinandiya ka waajuli jate nɛɛma ye wa?—Luka 1:74; 1 Kɔr. 7:16.
3 Baarakɛɲɔgɔnw: N’a sɔrɔ a tɛna diya i baarakɛɲɔgɔn dɔw ye n’i b’a ɲini ka seereya di u ma. Balimamuso dɔ y’a lakali ko sɔsɔli dɔ wilila baarakɛyɔrɔ la ka taga duniɲa laban kan. Tuma min na ale y’a ɲini u fɛ u ka Matiyu sapitiri 24nan kalan, u yɛlɛ bɔ ale la. Nka loon damanin tɛmɛnen kɔ, a ka baarakɛɲɔgɔn dɔ y’a fɔ a ye ko ale y’o sapitiri nin kalan ani a y’a kabakoya. Gafe dɔ dira a ma ani labɛn kɛra walisa ka bibulukalan daminɛ n’ale n’a furucɛ ye. Kalan fɔlɔ lalɔra dugutilama tɛmɛnen kɔ lɛri filanan tuma. Kalan sabanan kɔ, u y’a daminɛ ka taga lajɛnw na. Ani wagati damanin o kɔ, u ye sigarɛti minni dabila, ani k’a daminɛ k’u sendon waajulibaara la. Yala o koo tun bena kɛ n’an balimamuso tun m’a jija k’a ka jigiya tilan ni mɔgɔ wɛrɛw ye wa?
4 Lakɔli filankuruw: Seere denmisɛnmaw delinanko lo ka degunw kunbɛn lakɔliso. Ani u be siran ko kamale ni sunguru tɔw bena olu dɔgɔya u ka waajulibaara kosɔn. Eta zini kerecɛn sunguru dɔ y’a fɔ ko: “Ne tun be siran ka kamale ni sunguru wɛrɛw waaju katugu ne tun be siran u ka ne yɛlɛ.” O la, a tun be boli fɛɛrɛw ɲɛ ka seereya di a filankuruw ma lakɔliso ani kiin kɔnɔ. Cogo juman na i be se ka fanga sɔrɔ k’i mɔgɔɲɔgɔnw degun kunbɛn ni jagwɛlɛya ye? I k’i jigi la Jehova kan i kɛtɔ k’a diyanye ɲini k’a sɔrɔ (Ntal. 29:25). See min b’i ye ka baara kɛ ni Ala ka kuma ye cidenyabaara la, i k’o danbe jate (2 Tim. 2:15). Sunguru min kofɔra, a y’a daminɛ ka Jehova deli a k’ale dɛmɛ ka ŋaniya sɔrɔ ka kuma a ka lakɔli filankuruw fɛ. A y’a daminɛ ka seereya kɛ lakɔliso, n’a ma wili a kama. A ye nafaba sɔrɔ o la, ani wagati dɔɔnin o kɔ, a tun be kuma a lɔnbagaw bɛɛ fɛ. A y’a dacɛ ko: “O kamalew ni sunguruw mako be jigiya la ka taga siniɲasigi kan. Jehova be tɛmɛ an fɛ k’u dɛmɛ.”
5 An sigiɲɔgɔnw: Ɲasisi be se ka kɛ an sigiɲɔgɔnw n’an lɔnbaga wɛrɛw la an yɛrɛ kosɔn ani an ka lannakow kosɔn. N’i be siran u kɔnɔnata ɲɛ, i k’i yɛrɛ ɲininga: ‘Tiɲɛn min be na ni ɲɛnamaya banbali ye, yala u b’o lɔn wa? Ne be se ka mun lo kɛ k’u dusukunw sɔrɔ?’ Sirikɔnsikiripsiyɔn kɔrɔsibaga dɔ y’a kɔrɔsi ko tɔnɔn be sɔrɔ ni sereya be di sigiɲɔgɔnw ma dɔɔnin dɔɔnin ka taga. I mako be fanga ni hakilitigiya minw na ka to ka mɔgɔ dusukun tilennenw ɲini ka taga, i k’o deli Jehova fɛ.—Fil. 4:13.
6 An kɛtɔ ka magaya an mɔgɔɲɔgɔnw degun jukɔrɔ, o be se ka diya an kɛlɛbagaw ye. Nka yala o kɛcogo bena u mako ɲɛ, ani k’an ta ɲɛ wa? Yesu y’a yɛrɛ ka dugumɔgɔw bali kunbɛn. A yɛrɛ y’a bamuso ka deenw mafiɲɛli kumaw muɲu. Nka a tun y’a lɔn ko a be se k’u dɛmɛ, a kɛtɔ ka sabati dɔrɔn tiɲɛn sira kan, Ala ye min bila a ɲɛ. O cogo la, Yesu ye “o sɔsɔli ɲɔgɔn muɲu jurumukɛlaw bolo u yɛrɛ ka bɔnɛ kama.” (Heb. 12:2, 3, NW). An ka kan k’o kelen lo kɛ. Nɛɛma min dira i ma ka Masaya cira waajuli kɛ, i cɛɛ siri k’i seko bɛɛ kɛ o la. O kɛtɔ, “i na i yɛrɛ kisi ka i lamɛnbagaw fana kisi”—1 Tim. 4:16, A.B.U. 1987.