I be se ka seereya kɛ sababu dɔw sen fɛ!

1. a) Ka seereya kɛ sababu dɔ sen fɛ, o kɔrɔ ko di? b) Mɔgɔ minw be bi lajɛn nin na, u la joli ye tiɲɛn koo mɛn siɲɛ fɔlɔ la sababu dɔ sen fɛ?

¹ E ka kafo kɔnɔ, mɔgɔ joli lo ye tiɲɛn koo mɛn siɲɛ fɔlɔ la sabu mɔgɔ dɔ ye seereya kɛ u ye sababu dɔ sen fɛ? O mɔgɔ daa be se k’i kabakoya. Ka seereya kɛ sababu dɔ sen fɛ, o kɔrɔ ko ka kibaro duman kofɔ mɔgɔw ye an be minw kunbɛn an ka loon o loon baaraw la: tagama na, sannikɛyɔrɔ la, lakɔliso la, baarakɛyɔrɔ la wala n’an tagara bɔ an somɔgɔw wala an sigiɲɔgɔnw ye, ani a ɲɔgɔnnaw. Kafo dɔ kɔnɔ, mɔgɔ batiselen 200 ni kɔ kan, mɔgɔ 80 ɲɔgɔn ye tiɲɛn koo mɛn siɲɛ fɔlɔ la sabu dɔ ye seereya kɛ u ye sababu dɔ sen fɛ! O b’a yira ko o waajuli kɛcogo be sanga sɔrɔ kosɔbɛ.

2. Bibulu ka fɔta la, jɔn ni jɔn lo ye seereya kɛ sababu dɔ sen fɛ?

² Saan kɛmɛkulu fɔlɔ wagati la, waajulikɛlaw tun ka teli ka seereya kɛ sababu dɔw sen fɛ. Ɲɛyirali fɛ, Yesu tɛmɛtɔ Samari dugu kɔnɔ, a ye seereya kɛ muso dɔ ye min tun nana jii bɔ Yakuba ka kɔlɔn kɔnɔ ( Yuh. 4:6-26). Filipe ye baro daminɛ ni Etiopi masaso kuntigi dɔ ye min tun be Esayi ka kitabu kalanna. Filipe y’a ɲininga ko: “I bɛ min kalan, i bɛ o faamu wa?” (Kɛw. 8:26-38). Ka Pol to kaso la Filipe dugu kɔnɔ, a ye seereya kɛ kasotigi dɔ ye (Kɛw. 16:23-34). Kɔfɛ, k’a to garadiw ka mara la a yɛrɛ ka soo kɔnɔ, “mɔgɔ o mɔgɔ taara bɔ a ye, a ye olu bɛɛ ladon. A tun bɛ waajuli kɛ Ala ka masaya ko la, ka mɔgɔw kalan Matigi Yesu Krisita ko la” (Kɛw. 28:30, 31). E fana be se ka seereya kɛ sababu dɔw sen fɛ hali n’i be maloya ka kuma. Cogo di do?

3. N’an be maloya ka kuma mɔgɔw fɛ, mun lo be se k’an dɛmɛ?

³ A daminɛcogo: A man nɔgɔ an caaman fɛ ka baro daminɛ ni mɔgɔw ye an tɛ minw lɔn. A yɛrɛ be se ka gwɛlɛya an fɛ ka seereya kɛ an lɔnbagaw ye. Nka, Jehova ye ɲuman min kɛ an ye ani a be tiɲɛn kalan nafamanba min di a sagokɛlaw ma, n’an be miiri o koo la ani jigitigɛ min be duniɲa mɔgɔw kan, o lo bena an lasun an ka kuma ( Jonasi 4:11; Zab. 40:6; Mat. 13:52). Ka fara o kan, an be se ka Jehova deli a ka ‘an jaa gwɛlɛya.’ (1 Tes. 2:2). Gilead kalanden dɔ y’a fɔ ko: “Ne y’a ye ko delili be ne dɛmɛ n’a ka gwɛlɛ ne ma ka kuma mɔgɔw fɛ.” N’i be sigasiga ka kuma mɔgɔw fɛ, i ka delili surun dɔ kɛ i kɔnɔ.—Neh. 2:4.

4. An be se k’a ɲini ka mun lo kɛ fɔlɔ, ani mun na do?

⁴ I ko a kɔrɔ b’a yira cogo min na, ka seereya kɛ sababu dɔ sen fɛ, waajibi tɛ ka sin ka baro daminɛ ni vɛrise dɔ ye wala k’a daminɛ i ko i be waajuli kɛra soo ni soo. An bena a ye ko nafa b’a la n’an b’a ɲini ka baro daminɛ dɔrɔn koo dɔ kan, an kana a miiri ko waajibi lo an fɛ an ka sin ka seereya kɛ a tigi ye kelen. Weleweledala caaman b’a fɔ ko o kɛcogo b’u hakili sigi, ani a laban u be se ka kibaro duman kofɔ mɔgɔw ye. Ni mɔgɔ dɔ t’a fɛ ka baro kɛ n’i ye, kuun t’a la k’a waajibiya. I ka baro kuncɛ ni bonya ye ani i ka taga.

5. Balimamuso dɔ ka maloya bɛɛ n’a ta, mun lo y’a dɛmɛ ka seereya kɛ sababu dɔw sen fɛ?

⁵ Balimamuso dɔ be maloya ka kuma. Nka sanni kɛtɔ lɔgɔfɛ la, a b’a daminɛ ka mɔgɔ filɛ a ɲɛda la ani ka yɛlɛmisɛn kɛ ni dusudiya ye. N’a tigi fana y’a filɛ ani ka yɛlɛmisɛn kɛ, a be kuma dɔɔni koo dɔ kan. N’a y’a laminɛ ka ɲɛ, o b’a hakili sigi ani a be taga ɲɛ ni baro ye. A be mɛnni kɛ koɲuman ani a b’a filɛ kibaro duman faan min bena diya a tigi ye. O kɛcogo y’a dɛmɛ ka gafe caaman to mɔgɔw ye ani ka bibulukalan dɔ daminɛ yɛrɛ.

6. An be se ka baro daminɛ cogo di sababu dɔ sen fɛ?

⁶ Baro dadoncogo: An be se ka mun lo fɔ walisa ka baro dadon? Baro kɛtɔ ni muso ye kɔlɔnda la, Yesu y’a daminɛ k’a fɔ dɔrɔn ko a ka jii minta dɔ di ale ma ( Yuh. 4:7). O b’a yira ko an be se ka mɔgɔ fo ni dusudiya ye wala k’a ɲininga koo dɔ la walisa ka baro daminɛ. Baro kɛtɔ n’a tigi ye, an be se ka sababu dɔ sɔrɔ ka vɛrise dɔ kofɔ ani n’a sɔrɔ ka tiɲɛn kisɛ dɔ dan a tigi dusukun na (Waaj. 11:6). Dɔw ye sanga sɔrɔ u kɛtɔ ka kuma dɔ fɔ min be mɔgɔ lasun ka miiri ani ka ɲiningali dɔ kɛ. Ɲɛyirali fɛ, n’an be dɔgɔtɔrɔ kɔnɔna, an be se ka baro daminɛ an kɛtɔ k’a fɔ ko “N’a nana kɛ ko ne tɛ bana tugun fewu, o bena diya ne ye dɛ!”

7. N’an be kɔrɔsili kɛ, cogo juman na o bena an dɛmɛ ka seereya kɛ sababu dɔw sen fɛ?

⁷ N’an be kɔrɔsili kɛ, o fana be se k’an dɛmɛ ka baro daminɛ ni mɔgɔw ye. N’an ye bangebaga dɔ kɔrɔsi n’a deenw ye, u kolonen lo ka ɲɛ, an be se k’a tando ani k’a ɲininga ko: “Mun lo ye i dɛmɛ i sera k’i deenw kolo ka ɲɛ ten?” Balimamuso dɔ b’a janto a baarakɛɲɔgɔnw ka baro la, ani a be kunnafoni tigitigi dɔw di u ma ka kɛɲɛ n’u makoya ye. Tuma min na a y’a lɔn ko a ka baarakɛyɔrɔ la muso dɔ b’a ka furu labɛnna, a ye Réveillez-vous ! dɔ di a ma min be furu labɛncogo ɲɛfɔ. O sen fɛ, a sera ka baro caaman kɛ n’o muso ye Bibulu kan.

8. An be se ka tɛmɛ an ka gafew fɛ cogo di ka baro daminɛ?

⁸ Koo wɛrɛ be se k’an dɛmɛ ka baro daminɛ: O ye k’an ka gafew kalan yɔrɔ min na mɔgɔw be se k’an ye. Balimacɛ dɔ be barokun diiman dɔ sugandi La Tour de Garde wala Réveillez-vous ! kɔnɔ ani a b’a daminɛ k’o kalan a daa jukɔrɔ. N’a y’a kɔrɔsi ko a gɛrɛfɛ mɔgɔ dɔ be zurunali filɛra a fɛ, a b’a tigi ɲininga koo dɔ la wala a be o barokun lakali dɔɔni o tigi ye. O kɛcogo sen fɛ, a ka teli ka baro daminɛ ani ka seereya kɛ mɔgɔ ye. N’an b’an ka gafe dɔ bila dɔrɔn mɔgɔw k’a ye, o be se k’an ka baarakɛɲɔgɔnw wala an ka lakɔli filankuruw lasun u k’an ɲininga o koo la.

9, 10. a) An be se ka sababu dɔw lawuli cogo di ani ka seereya kɛ o sen fɛ? b) E sera k’o kɛ cogo di?

⁹ An ka sababu dɔw lawuli: Komi kɔrɔtɔ be waajuli baara koo la, an man kan k’a to sababuw ka na u yɛrɛ ma ka sɔrɔ ka seereya kɛ. Nka, an ka loon o loon baaraw la, an ka kan ka sababu dɔw lawuli walisa ka seereya kɛ. An ka kɔn ka miiri mɔgɔw koo la an be se ka minw kunbɛn, ani an k’a filɛ cogo min na an bena se ka baro daminɛ n’u ye teriya la. An ka Bibulu dɔ to an bolo kɔrɔ ka fara gafe dɔw kan an be se ka minw di makodon mɔgɔw ma.—1 Piɛrɛ 3:15.

¹⁰ U kɛtɔ ka fɛɛrɛ dɔw latigɛ ni ceguya ye, weleweledala caaman sera ka sababu dɔw lawuli ani ka seereya kɛ. Balimamuso dɔ sigilen be sangaso dɔ kɔnɔ min donda tanganen lo kosɔbɛ ani ɲɛnagwɛyɔrɔ dɔ be yen. A ye jaa ɲuman dɔw labɛn k’u bila yen mɔgɔw k’u filɛ. Mɔgɔw tun mana lɔ yen k’o jaaw cɛɲi lakali, o tun be kɛ sababu ye a fɛ ka baro daminɛ ani ka Bibulu ka layidu kofɔ u ye “sankolo kura ni dugukolo kura” koo la ( Jir. 21:1-4). Yala i ɲɛɛ be fɛɛrɛ dɔw la minw be se k’i dɛmɛ ka sababu dɔw lawuli ani ka seereya kɛ wa?

11. Seereya kɛtɔ sababu dɔ sen fɛ, ni mɔgɔ dɔ y’a mako don an be se k’o tigi dɛmɛ cogo di?

¹¹ Makodon mɔgɔw dɛmɛ cogo: Ni mɔgɔ dɔ y’a mako don i ka baro la, a ɲini k’a tigi dɛmɛ. N’a bɛnnen lo, i be se k’a fɔ a tigi ye ko: “A diyara ne ye kosɔbɛ ka baro kɛ n’i ye. Ne be se k’i sɔrɔ min walisa an ka baro kɛ tugun?” Weleweledala dɔw b’u ka ladɛrɛsi n’u ka telefɔni nimɔrɔ di a tigi ma ani u b’a fɔ ko: “An ka baro diyara ne ye. N’i b’a fɛ ka kunnafoni wɛrɛ sɔrɔ, ne ka ladɛrɛsi filɛ nin ye.” Ni ele yɛrɛ tɛ se ka to ka taga a tigi dɛmɛ, i ka sɛbɛ Veuillez suivre l’intérêt (S-43) dafa joona-joona ka di kafo ka sekeretɛri ma walisa a tigi ka surun kafo min na, o mɔgɔ dɔ ka se k’a dɛmɛ.

12. (a) An be wagati min ta ka seereya kɛ sababu dɔ sen fɛ, mun na an ka kan k’o jati ani k’a sɛbɛ rapɔɔri kan? b) Tɔnɔ juman lo sɔrɔla seereya kɛtɔ sababu dɔ sen fɛ? (Koorilen nin lajɛ: “Tɔnɔ b’a la ka seereya kɛ sababu dɔw sen fɛ!”)

¹² An be wagati min ta ka seereya kɛ sababu dɔ sen fɛ, an ka kan k’o wagati sɛbɛ an ka rapɔɔri kan. O kama, i janto ka to k’o wagati jati hali ni miniti damanin dɔrɔn lo tile kɔnɔ. A jati minɛ k’a filɛ: N’i weleweledalaw bɛɛ be miniti duuru ta loon o loon ka seereya kɛ sababu dɔ sen fɛ, o bɛɛ lajɛnen be kɛ lɛri miliyɔn 17 ni kɔ ye kalo o kalo!

13. Mun lo ka kan k’an lasun ka seereya kɛ sababu dɔw sen fɛ?

¹³ Joo bɛrɛbɛrɛ b’an fɛ ka seereya kɛ sababu dɔw sen fɛ: An be Ala n’an mɔgɔ ɲɔgɔnw kanu (Mat. 22:37-39). An dusukunw falen be waleɲumanlɔn na Jehova jogow n’a sagonata koo la. O lo b’an lasun k’a ka “masaya sarama nɔɔrɔ bonya ko fɔ” (Zab. 145:7, 10-12). Komi an b’an mako don an sigiɲɔgɔnw na sɔbɛ la, o fana b’an lasun ka tɛmɛ sababu bɛnnenw bɛɛ fɛ ka kibaro duman fɔ u ye sanni wagati ka tɛmɛ (Rom. 10:13, 14). An bɛɛ be se ka seereya kɛ sababu dɔw sen fɛ n’an be kɔn ka miiri dɔɔni o koo la ani k’an yɛrɛ labɛn o kama. O cogo la, n’a sɔrɔ an bena ninsɔndiya ka mɔgɔ kɔnɔgwɛ dɔ dusu sɔrɔ ni tiɲɛn kuma ye.

[Picture on page 4]

I bena a ye ko nafa b’a la k’a laɲini dɔrɔn ka mɔgɔw kunbɛn ani ka baro daminɛ n’u ye

[Picture on page 5]

U kɛtɔ ka fɛɛrɛ dɔw latigɛ ni ceguya ye, weleweledala caaman sera ka sababu dɔw lawuli ani ka seereya kɛ

[Picture on page 5]

Ladiliw, baro

daminɛcogo kan

◼ Dɛmɛ deli walisa ka se k’a daminɛ

◼ Mɔgɔ minw dusu ka di ani u kɔrɔtɔnen tɛ, a ɲini ka kuma olu fɛ

◼ A filɛ a ɲɛda la, yɛlɛmisɛn kɛ ani koo dɔ lakali min ɲɛsinna aw fila ma

◼ Lamɛnni kɛ koɲuman

[Picture on page 6]

Tɔnɔ b’a la ka seereya kɛ sababu dɔw sen fɛ!

[Picture on page 6]

• Ka balimacɛ dɔ to a b’a ka mobili kɔnɔna mobili dilanyɔrɔ dɔ la, a ye seereya kɛ a gɛrɛfɛ mɔgɔw ye ani ka welelisɛbɛ di u ma u ka na forobakalan lamɛn. Saan kelen o kɔ, lajɛnba dɔ la, balimacɛ dɔ nana a fo ni dusudiya ye k’a sɔrɔ a tun t’o balimacɛ lɔn. A tun ye welelisɛbɛ di mɔgɔ minw ma saan tɛmɛnen na mobili dilanyɔrɔ la, olu dɔ tun lo! O cɛɛ tun tagara forobakalan lamɛn ani a y’a ɲini ka Bibulukalan kɛ. Ayiwa sisan, ale n’a muso batisera.

• Balimamuso dɔ ye tiɲɛn lɔn sababu dɔ sen fɛ. A deen saba sababu la a be mɔgɔw kunbɛn yɔrɔ minw na, a be o yɔrɔw lo jati a ka waajulikɛyɔrɔ ye. O mɔgɔw ye a sigiɲɔgɔnw ni bangebagaw ye a be minw kunbɛn lakɔliso la ani kalandenfaw ka ɲɔgɔnyew la. Tuma o tuma, ni a y’a tɔgɔ fɔ mɔgɔ dɔ ye, a b’a kɔnɔ gwɛ ka kuma cogo nɔgɔman na o tigi fɛ k’a yira ko Bibulu ye fɛɛn nafamanba ye min b’ale dɛmɛ k’a deenw kolo. O kɔ a be tɛmɛ baro wɛrɛ fɛ. O cogo la, komi a sera ka baro daminɛ, a b’a ye ko a ka nɔgɔ ka Bibulu kofɔ baro tɔɔ la. O kɛcogo fɛ, a sera ka mɔgɔ 12 dɛmɛ u batisera.

• Tuma min na asiransi mɔgɔ dɔ nana bɔ balimamuso dɔ ye, a tɛmɛna o sababu fɛ ka seereya kɛ a ye. Balimamuso y’a ɲininga ko yala a b’a fɛ ka asiransi dɔ kɛ min b’a to a ka kɛnɛya ɲuman, hɛɛrɛ ani ɲɛnamaya banbali sɔrɔ wa? Cɛɛ y’a jaabi ko ɔwɔ ani ka balimamuso ɲininga ko a kaan be asiransi sifa juman lo ma? Balimamuso ye Bibulu ka layiduw yira a la ani ka an ka gafe dɔ di a ma. Cɛɛ y’o gafe kuru bɛɛ kalan suu kelen kɔnɔ. Labɛn kɛra bibulukalan kama. A y’a daminɛ ka na lajɛnw na ani kɔfɛ, a batisera.

• Ka balimamuso dɔ to tagamana aviyɔn kɔnɔ, a y’a daminɛ ka baro kɛ ni a gɛrɛfɛ muso dɔ ye ani a sera ka seereya kɛ a ye. U sera u seyɔrɔ la tuma min na, balimamuso y’a ka ladɛrɛsi n’a ka telefɔni nimɔrɔ di o muso ma ani k’a jija ko a k’a ɲini ka bibulukalan kɛ ni Jehova Seerew ye n’u nana bɔ a ye. O loon dugusagwɛ yɛrɛ, Seere fila nana bɔ muso ye a ka soo kɔnɔ. A ye bibulukalan daminɛ, a ye ɲɛtaga kɛ joona ka batise ani dɔɔni o kɔ ale yɛrɛ ye bibulukalan kɛ ni mɔgɔ saba ye.

• Saan 100 balimacɛ dɔ tun dɔgɔtɔrɔso dɔ la min latigɛra namaraw ni mɔgɔkɔrɔbaw kama. A tun ka teli k’a fɔ ko “An mako be Masaya la.” O kuma tun be dɔgɔtɔrɔw ni banabagatɔw lasun ka ɲiningali kɛ. O tun be sababu di a ma k’a ɲɛfɔ Masaya ye fɛɛn min ye. Muso dɔ be baara kɛ o yɔrɔ la, ale ye balimacɛ ɲininga ko a bena mun lo kɛ alijɛnɛ kɔnɔ. A y’a jaabi ko: “Ne bena yeli kɛ, ka tagama kokura ani ne bena n ka namara wotoro jɛni.” Komi a tun ye fiyentɔ ye, a y’a ɲini o muso fɛ a ka an ka zurunaliw kalan ale ye. Balimacɛ denmuso nana bɔ a ye tuma min na, o muso y’a deli ko a k’a to ale ka taga ni zurunaliw ye a ka soo. Dɔgɔtɔrɔ dɔ y’a fɔ balimacɛ denmuso ye ko: “Barokun kura min be dɔgɔtɔrɔso kɔnɔ yan, o ye ko: ‘An mako be Masaya la.’ ”

• Kɔnɔni kɛtɔ ɛrɛsitoran dɔ kɔnɔ, balimamuso dɔ ye cɛkɔrɔba dɔw ka baro lamɛn. U tun be kumana politikikow kan a gɛrɛfɛ. U la kelen y’a fɔ ko gofɛrɛnɛman tɛ se k’an ka gwɛlɛyaw ɲɛnabɔ. Balimamuso y’a fɔ a yɛrɛ kɔnɔ ko ‘nin ye sababu ɲuman ye ne fɛ.’ A ye delili surun dɔ kɛ ani a gwɛrɛla u la. A y’a yɛrɛ yira u la ani k’a fɔ u ye ko gofɛrɛnɛman min bena hadamadenw ka gwɛlɛyaw ɲɛnabɔ, o ye Ala ka Masaya lo ye. Kitabunin min tun b’a bolo, a y’o di u ma. O kɔ dɔrɔn, ɛrɛsitoran kuntigi gwɛrɛla. Balimamuso y’a miiri ko a bena a fɔ ale ko a ka taga ka bɔ yen. Nka a y’a fɔ a ye ko a y’u ka kuma mɛn ani ko ale fana be kitabunin dɔ fɛ. Ɛrɛsitoran baarakɛla dɔ fana y’o kuma mɛn, a gwɛrɛla ka na ni ɲɛji ye a ɲɛɛ na. A tun ye bibulukalan kɛ ka kɔrɔ ani a tun b’a fɛ k’a ka kalan daminɛ kokura.