“Aw ka yeelen ka manamana”
1 Duniɲa min be an lamini, a be dibi la tagama cogo ni Alako ta fan fɛ. Tiɲɛn yeelen be dibi ka “kɛwale nafantanw” bɔ kɛnɛ kan. O cogo la, mɔgɔ be se ka boli o mɔgɔfaga fɛɛnw ɲɛ. O kama, ciden Pol ye dusu don kerecɛnw na ko: “A’ ye tagama i ko kɛnɛdenw.”—Efes. 5:8, 11, A.B.U, 1987.
2 Danfaran min be yen “kɛnɛ nɔɔ” ani duniɲa ka dibi cɛ, o gwɛnen lo kosɔbɛ (Efes. 5:9). Walisa k’o kɛnɛ nɔɔ bɔ, a ɲininen be an fɛ an ka kɛ ɲɛyirali manamanatɔw ye kerecɛnya la. Yesu be sɔn o mɔgɔ sifaw ma. An fana ka kan ka o jogow yira kɛnɛ kan, i n’a fɔ ka tiɲɛn ta ni dusu bɛɛ ye, ani kɔnɔgwɛ, ni dusu diya ye. O nɔɔ ka kan ka ye an ka loon o loon ɲɛnamaya kɔnɔ ani an ka cidenyabaara kɔnɔ.
3 Ka manamana koo bɛɛ la: Yesu y’a fɔ a ka kalandenw ye ko: “Aw ka yeelen ka bɔ mɔgɔw ɲɛ na.” (Mat. 5:16). I n’a fɔ Yesu, an be Jehova yeelen bɔ an kɛtɔ ka waajuli kɛ Ala ka Masaya ni a sagonata koo la. An be manamana i ko fitinɛ min be yeelen bɔ, n’an be taga bɔ mɔgɔw ye u ka soow la ani n’an be tiɲɛn jɛnsɛn baarakɛyɔrɔ la, lakɔliso, an sigiɲɔgɔnw cɛ, wala yɔrɔ o yɔrɔ n’a fɛɛrɛ b’an bolo.—Fil. 2:15.
4 Yesu tun y’a fɔ ko dɔw tun bena yeelen kɔniya ( Yuh. 3:20). O la, a tɛ an farifaga ni mɔgɔ caamanba be ban ko “Krisita [ka] nɔɔrɔ Kibaru Duman kɛnɛ” kana yeelen bɔ u ye (2 Kɔr. 4:4). Jehova be kalan kɛ hadamadenw dusukun kɔnɔ ani a tɛ tilenbaliya kɛbagaw fɛ a ka mɔgɔw cɛma.
5 N’an be Jehova ka siraw tagama ani ka hakilimaya yeelen tɔnɔn sɔrɔ, an be se k’o yeelen bɔ mɔgɔ wɛrɛw ye. An ka tagama cogo kosɔn u be se ka sɔn a la ko ‘ɲɛnamaya yeelen be an fɛ’. O la, a be se k’olu fana lasu ka yɛlɛmani bɛnnenw kɛ walisa ka kɛ yeelen bɔbagaw ye.—Yuh. 8:12.
6 N’an be an ka yeelen to a ka manamana, an be tandoli lase an Danbaga ma. O fana be mɔgɔ kɔnɔgwɛw dɛmɛ u k’an Danbaga lɔn ani ka ɲɛnamaya banbali jigiya sɔrɔ (1 Piɛre 2:12). Yeelen be an fɛ. An ka baara kɛ n’a ye ka mɔgɔ wɛrɛw dɛmɛ u ka bɔ hakilimaya dibiw la, ani u ka yeelen kɛwalew kɛ.