“Aw ka yeelen ka bɔ”
1. An be ni nɛɛma baara juman lo ye?
1 K’a ta sɔgɔma fɔɔ wula fɛ, tile yeelen bɔko ɲuman be nɔɔrɔ la Jehova Ala kan. Nka, Yesu tun b’a fɛ a ka kalandenw ka kɛ ni yeelen sifa dɔ wɛrɛ ye, o min ye “ɲɛnamaya kɛnɛ” yeelen ye (Yuh. 8:12). Nɛɛmaba lo an fɛ ka kɛ n’o hakilimaya yeelen ye, nka o be na ni baaraba ye an kun. Yesu y’a fɔ ko: “Aw ka yeelen ka bɔ mɔgɔw ɲɛ na” walisa u ka nafa sɔrɔ a la (Mat. 5:16). Bi duniɲa be dibiba la Alako ta fan fɛ. O kama bi ka tɛmɛ sanga ni wagati bɛɛ kan, an ka kan ka hakilimaya yeelen bɔ mɔgɔw ye! An be se ka Krista ladegi cogo di k’a to an ka yeelen ka manamana?
2. Yesu y’a yira cogo di ko a kɔrɔtanin lo ka hakilimaya yeelen bɔ mɔgɔw ye?
2 An ka waajuli fɛ: Yesu y’a ka wagati n’a ka fanga ani a bolofɛnw ta ka mɔgɔw dɛmɛ u ka yeelen sɔrɔ tiɲɛn koo la. A tun b’o kɛ u ka soow kɔnɔ, foroba yɔrɔw la, kuluw kan, mɔgɔw tun be sɔrɔ yɔrɔ o yɔrɔ. A tun b’a lɔn ko nafa bɛrɛbɛrɛ b’a la ka hakilimaya yeelen sɔbɛ bɔ mɔgɔw ye (Yuh. 12:46). Walisa o yeelen ka se mɔgɔ caaman ma, Yesu y’a ka kalandenw labɛn u ka kɛ “kɛnɛyeelen ye diɲɛ la.” (Mat. 5:14). Olu y’a to u ka yeelen manamanana u kɛtɔ ka koo ɲuman kɛ u sigiɲɔgɔnw ye ani ka tiɲɛn kalan di u ma Alako ta fan fɛ.
3. An be ni yeelen min ye tiɲɛn koo la, an be se k’a yira cogo di ko an b’o nafa lɔn?
3 Cii dira Ala sagokɛlaw ma ko u ka “taama i ko kɛnɛdenw.” (Efes. 5:8). U b’o cii ta sɔbɛ la ani mɔgɔw be sɔrɔ yɔrɔ o yɔrɔ, u be waajuli kɛ yen. N’an be Bibulu wala an ka gafew kalan mɔgɔw ɲɛɛ na lafiɲɛ wagati la baarakɛyɔrɔ la wala lakɔliso la, o dɔrɔn yɛrɛ be se ka kɛ sababu ye ka baro kɛ Bibulu kan. O cogo la, balimamuso dɔ sera ka bibulukalan daminɛ ani ka gafe 12 to a ka lakɔli filankuruw ye!
4. Mun na an tagamacogo ɲuman fana b’a to an be yeelen bɔ mɔgɔw ye?
4 An ka kɛwale ɲumanw fɛ: An be yeelen bɔ mɔgɔw ye an ka loon o loon tagamacogo fɛ fana (Efes. 5:9). Baarakɛyɔrɔ la, lakɔliso la ani forobayɔrɔ wɛrɛw la, mɔgɔw be kerecɛn tagamacogo kɔrɔsi. O be sababu di a ma a ka se ka Bibulu ka tiɲɛn kumaw yira u la (1 Piɛrɛ 2:12). Ɲɛyirali fɛ, saan 5 cɛdennin dɔ tagamacogo ɲuman y’a to a ka karamɔgɔ y’a bangebagaw weele k’a fɔ u ye ko: “Ne ma deli ka deen nin ɲɔgɔn ye min be koo ɲuman ni koo jugu faranfasi ka ɲɛ ten!” Tiɲɛn na, an ka cidenya baara ani an tagamacogo ɲuman be mɔgɔw sama ka na “ɲɛnamaya kɛnɛ” yeelen na ani o be nɔɔrɔ la an ka Ala kan.