An be se ka mɔgɔ wɛrɛw miiriya yɛlɛma cogo min na

¹ Mɔgɔ caaman be ciden Pol lɔn i ko waajulikɛla min ye mɔgɔw ka miiriya yɛlɛma (Kɛw. 19:26). Hali masacɛ Agiripa y’a fɔ a ye ko: “Sɔɔni i na ne yɛlɛma ka kɛ kerecɛn ye!” (Kɛw. 26:28, A.B.U., 1987). Mun lo y’a to Pol ka cidenyabaara ye mɔgɔ caaman kuun yɛlɛma? A tun be tɛmɛ Sɛbɛninw fɛ ka kuma ɲɛnabɔ cogo tilennen na. A fana tun b’a ka daliluw makɛɲɛ n’a lamɛnbagaw ye.—Kɛw. 28:23.

² An fana mako b’a la ka Pol sennɔ ta ka mɔgɔw ka miiriya yɛlɛma an ka waajulibaara la. Cogo juman na? N’an be kuma, wala n’an be mɔgɔ wɛrɛw lamɛn, an k’a ɲini k’u ka miiriya lɔn (Ntal. 16:23). Fɛɛrɛ nafaman saba bena an dɛmɛ k’o dafa.

³ An k’an tulo malɔ ka lamɛnni kɛ: N’a tigi be kumana, i k’a lamɛn. A ka hakilinata minw bɛnna i ma, i k’olu ɲini ka basigi o kan. N’a tigi ye sɔsɔli dɔ lawili, a ɲini k’o sɔsɔli kuun faamu. O bena i dɛmɛ k’a tigi ka lanako lɔn tigitigi, o lanako basiginen be min kan, ani mun na a tigi lanen b’a la ko tiɲɛn lo (Ntal. 18:13). O koow ɲini ka lɔn ni hakilitigiya ye.

⁴ An ka ɲiningaliw bila: Ni mɔgɔ dɔ y’a fɔ ko ale lanen b’a la ko Ala ye saba ye, i be se k’a ɲininga ko: “Yala e tun lanen b’o la kabini tuma bɛɛ wa?” A fara a kan ko: “Yala i delila ka Bibulu sɛgɛsɛgɛ o koo kan wa?” I fana be se ka ɲiningali kɛ ko: “Ni Ala tun ye Saba ye, yala Bibulu tun tɛna o fɔ ka gwɛ wa?” A tigi ka jaabiliw bena i dɛmɛ ka kuma ɲɛnabɔ ka kɛɲɛ ni Bibulu ka fɔta ye.

⁵ I ka kuma ɲɛnabɔ cogo ɲuman na: Muso dɔ tun b’a miiri ko Yesu ye Ala ye. Seere dɔ y’a ɲininga ko: ‘N’i tun b’a fɛ k’a ɲɛyira ko mɔgɔ fila dɔw ye kelen ye, i tun bena tɛmɛ denbaya ka ɲɛyirali juman fɛ?’ Muso y’a jaabi ko: “Ne tun bena tɛmɛ balimacɛ fila ka ɲɛyirali fɛ.” Seere y’a fara a kan ko: “U yɛrɛ be se ka kɛ filaninw ye. Nka, Yesu kɛtɔ ka an kalan ko an ka Ala jate i ko Facɛman ani k’ale jate i ko Dencɛman, a tun b’a fɛ ka an kalan mun na?” Muso y’a faamu ko kelen ka kɔrɔ, ani a ka boon ni tɔ kelen ye (Mat. 20:23; Yuh. 14:28; 20:17). O miiriya yɛlɛma cogo y’a hakili n’a dusukun sɔrɔ.

⁶ Tiɲɛn lo, hali n’an ka kuma yiracogo tilenna cogo o cogo, bɛɛ tɛ sɔn tiɲɛn ma. Nka i n’a fɔ Pol, an ka timinandiya ka mɔgɔ kɔnɔgwɛw ɲini an ka kiin kɔnɔ. An k’u miiriya yɛlɛma u ka sɔn Masaya cira la.—Kew. 19:8.