Mɔgɔw kalantɔ an k’u ka miiriya yɛlɛma
1. Ka baara kɛ koɲuman ni Ala ka Kuma ye waajuli la, o kɔrɔ ko di tuma caaman na?
1 Waajulikɛla minw be sanga sɔrɔ i ko ciden Pol, olu b’a faamu ko ka “tiɲɛ kuma faranfasi cogo sɛbɛ la” o tɛ dan ka vɛrise dɔw kalan Bibulu Senuman kɔnɔ dɔrɔn (2 Tim. 2:15). Baara kɛtɔ ni Ala ka Kuma ye, an be se ka mɔgɔw kalan cogo juman na walisa k’u ka miiriya yɛlɛma?—Kɛw. 28:23.
2. An be se ka mɔgɔw dɛmɛ cogo di u ka bonya la Ala ka Kuma kan koɲuman?
2 A to Bibulu yɛrɛ ka kuma: A fɔlɔ, i k’i lamɛnbaga hakili sin Bibulu ma cogo dɔ la walisa a ka bonya la a kan ani ka sɔn ko Ala ka hakilitigiya lo b’a kɔnɔ. N’an lanen be Ala ka Kuma na, o be se k’a to an lamɛnbaga k’a janto ka vɛrise kalan lamɛn (Heb. 4:12). An be se k’a fɔ dɔrɔn ko: “Ne y’a ye ko nafa b’a la ka Ala ka miiriya ɲini k’a lɔn nin koo la. A filɛ a ka Kuma be min fɔ.” Tuma o tuma n’a be se ka kɛ, sin ka vɛrise dɔ kalan walisa k’a to Bibulu yɛrɛ ka kuma.
3. Vɛrise dɔ kalannen kɔ, mun lo be se ka kɛ walisa ka lamɛnnikɛla dɛmɛ a k’a kɔrɔ faamu?
3 A filanan, n’an ye vɛrise dɔ kalan, an ka ɲɛfɔli kɛ a kan. A ka gwɛlɛ mɔgɔ caaman fɛ ka vɛrise dɔ faamu a kalanko fɔlɔ la. Tuma caaman na, ɲɛfɔli ka kan k’a yira cogo min na vɛrise ɲɛsinna barokun ma (Luka 24:26, 27). Sinsin kumaden jɔnjɔnw kan. I be se ka ɲiningali dɔ kɛ k’a filɛ ni lamɛnnikɛla ye miiriya faamu tiɲɛn na.—Ntal. 20:5; Kɛw. 8:30.
4. Fɛɛrɛ laban juman kɔrɔtalen lo n’an b’a fɛ ka mɔgɔw kalan k’u ka miiriya yɛlɛma?
4 Hakilijagabɔ kɛ vɛrisew kan: A sabanan, a ɲini ka lamɛnnikɛla hakili n’a dusukun sɔrɔ. A dɛmɛ a k’a faamu cogo min na vɛrise ɲɛsinna ale yɛrɛ ma. Ka hakilijagabɔ kɛ vɛrisew kan, o be se ka mɔgɔ dɛmɛ k’a ka miiriya yɛlɛma (Kɛw. 17:2-4; 19:8). Ɲɛyirali fɛ, Zaburu 83:18 (NW ) kalannen kɔ an be se ka hakilijagabɔ kɛ k’a yira fɛɛn min kama a kɔrɔtalen lo i ka mɔgɔ dɔ tɔgɔ lɔn ka sɔrɔ ka jɛnɲɔgɔnya sigi n’a tigi ye. O kɔ, i be se k’a ɲininga ko: “I ka miiri la, n’i ye Ala tɔgɔ lɔn yala o bena a to i ka deliliw ka barika sɔrɔ wa?” A yira cogo min na vɛrise ɲɛsinna lamɛnnikɛla yɛrɛ ma, o la i bena o vɛrise nafa bɔ kɛnɛ kan. N’an be baara kɛ ni Ala ka Kuma ye o cogo la ka mɔgɔw ka miiriya yɛlɛma, o be mɔgɔ kɔnɔgwɛw lasun ka Jehova bato, ale min ye tiɲɛn Ala ɲɛnaman ye.—Jer. 10:10.