Jehova be sebagaya di
1 E be mun miiri ciden Pol koo la? N’an be Kɛwalew ka kitabu kalan, an b’a faamu ko mɔgɔ kisɛman tun lo Jehova ka baara la. Pol ye o bɛɛ dafa cogo juman na? A y’a fɔ ko: “Min bɛ see di ne ma, ale barika la ne bɛ se ka o koow bɛɛ kɛ.” (Filip. 4:13). Jehova be sebagaya min di, an fana be se ka dɔ sɔrɔ o la. Cogo juman na? An kɛtɔ ka tɔnɔn sɔrɔ labɛn wɔɔrɔ la, a ye minw ta ka an lakuraya ani ka fanga di an ma hakilimaya ta fan fɛ.
2 Ala ka Kuma: An ka kan ka domuni kɛ walisa ka fanga sɔrɔ. O cogo kelen na, an ka kan ka balo ni Ala ka Kuma ye walisa ka to niin na hakili senu ta fan fɛ (Mat. 4:4). Bibulu be fanga di an ma walisa an ka to barika la. N’an b’a fɛ ka tiɲɛn mara ni kisɛya ni fari foni ye, an ka kan ka kelenna kalan ni miirili kɛ sɔbɛ la. An k’o kɛ loon o loon n’a see b’an ye.—Zab. 1:2, 3.
3 Delili: A kɔrɔtalen lo ka gwɛrɛ Jehova la n’an mako gwɛlɛman b’a la. Mɔgɔ minw be sebagaya ɲini a fɛ delili kɔnɔ, a b’o di u ma a ka hakili fɛɛrɛ fɛ (Luka 11:13; Efes. 3:16). Bibulu be an jija an ka “timinandiya Ala delili la.” (Rom. 12:12). Yala i b’o lo kɛ wa?
4 Kɔngeregasiyɔn: An be fanga ni jagwɛlɛya sɔrɔ fana lajɛnw na ani balimaw ka jɛnɲɔgɔnya la kɔngeregasiyɔn kɔnɔ (Heb. 10:24, 25). Tuma min na an hakili ɲagaminen lo, u b’an jagwɛlɛya ani u be dɛmɛ lase an ma ni kanuya ye.—Ntal. 17:17; Waaj. 4:10.
5 Waajulibaara: N’an be waajuli baara kɛ tuma o tuma, o b’an dɛmɛ k’an ka miiriya to Masaya n’a ka dugaw kan. Ka mɔgɔ wɛrɛw dɛmɛ ka lɔnniya sɔrɔ Jehova koo la, o be an hakili foni (Kɛw. 20:35). Mɔgɔ caaman dɛmɛta be yen yɔrɔ minw na, an bɛɛ tɛ se ka taga sigi yen. An bɛɛ fana tɛ se k’an sendon kudayi waajuli baara la. Nka, an be se k’an seko bɛɛ kɛ waajuli baara la cogo wɛrɛw la.—Heb. 6:10-12.
6 Kɔrɔsibagaw, minw ye kerecɛnw ye: Diinan mɔgɔkɔrɔw be jagwɛlɛya ni dɛmɛ minw di, an be tɔnɔn sɔrɔ o la. Jehova ye cii di u ma u k’u janto a ka sagakulu la, a ye min kalifa u ma (1 Piɛre 5:2). Kɔrɔsibaga minw be taga tagama la ka bɔ kɔngerega-siyɔnw ye, u be u sabati i ko Pol tun b’a kɛ cogo min na a ka tile la.—Rom. 1:11, 12.
7 Kerecɛn kantigimanw ka ɲɛyirali: N’an be fɔlɔfɔlɔ ani bi baarakɛɲɔgɔn kantigimanw ka ɲɛyirali ɲuman lajɛ, o be an lasu (Heb. 12:1). N’an b’a fɛ k’an ka fanga lakuraya, mun na an tɛ olu ka ɲɛnamaya kɛcogo dɔ kalan an ka periyodikiw kɔnɔ? Lakalitaw be yen sanyɛlɛma gafe kɔnɔ, minw be an sabati. Jehova Seerew ka bi tariki min be sɔrɔ gafe Prédicateurs kɔnɔ, o lakalita dɔw kalan be se ka dusu don an na.
8 Saan 95 balimacɛ dɔ sɔnna tiɲɛn na tuma min na a tun ye kamalen ye. A tun ye kamalen ye tuma min na a ka lanaya kɔrɔbɔra. Fɔlɔ, kɔngeregasiyɔn ka baarakɛla kisɛman dɔw ye Jehova ka ɔriganisasiyɔn bila. O kɔ, soo ni soo waajuli baara tun ka gwɛlɛ ale ma. O bɛɛ n’a ta, a y’a bolo la Jehova kan tuma bɛɛ. O la, waajuli baara koo diyara a ye joona. Bi don? Kɛnɛyako bɛɛ n’a ta, a ye Burukilini (Brooklyn) ka betɛli denbaya mɔgɔ dɔ ye hali bi. A ye Koow Ɲɛnabɔla Jɛkuluden dɔ ye. A ma nimisa fewu ka nɔɔrɔ Jehova ka ɔriganisasiyɔn la.
9 Balimamuso dɔ ye Garande Beretaɲi ka betɛli denbaya mɔgɔ dɔ ye. A batisera tuma min na a tun ye saan 13. Saan kelen o kɔ, a ye piyɔniyeya baara daminɛ n’a kɔrɔcɛ ye. Saan kelen o kɔ, u y’a facɛ bila kaso la sabu a tun t’a fɛ k’a sendon kɛlɛba filanan koo la. A tora ka sebagaya deli Jehova fɛ, ani ka baara kɛ tiɲɛn Ala ye. Wagati dɔ sera, a ye balimacɛ kantigiman dɔ furu, ani u tora Jehova sago kɛli la ɲɔgɔn fɛ. Saan 35 a furulen kɔ, a cɛɛ barila ka sa. A ye fanga sɔrɔ Jehova yɔrɔ kokura, ani a tora a sago kɛli la. A jigi b’a la ka baara kɛ Jehova ye fɔɔ abada dugukolo kan.
10 Jehova be a ka baarakɛla kantigimanw dɛmɛ ani ka barika don u la. “A be see di mɔgɔ barika bannen ma, ka barikantanw barika bonya.” O barika min tɛ ban, an be se ka dɔ sɔrɔ o la an kɛtɔ ka nafa sɔrɔ labɛn wɔɔrɔ bɛɛ la, minw kofɔra ka tɛmɛ. I hakili to a la ko: “Mɔgɔ minw be u jigi la Matigi kan, olu be barika kura sɔrɔ. . . . U be boli, u tɛ sɛgɛn, u be taama, u barika tɛ ban.” (Isa. 40:29-31, A.B.U. 1987). Pol y’a jigi la kosɔbɛ Jehova ka fanga kan. An fana ka kan k’o lo kɛ.