“A bɛ se di mɔgɔ barika bannen ma”
1 An bɛɛ be sɛgɛn tuma dɔw la. O sɛgɛn tɛ sɔrɔ baloɲini baara wala baara wɛrɛ dɔrɔn fɛ nka a be se ka sɔrɔ fana an ka kunkow fɛ nin “waati gɛlɛnw na” (2 Tim. 3:1). An minw ye Jehova ka baarakɛlaw ye, cogo juman na an be se ka fanga sɔrɔ Alako ta fan fɛ, fanga min b’an bali an ka sumaya an ka cidenya baara la? An be se k’o sɔrɔ an kɛtɔ k’an jigi la Jehova kan, ale min ye ‘sebaayaba ni fangaba’ tigi ye (Es. 40:26). A be an makow kala ma ani a b’a fɛ k’an dɛmɛ sɔbɛ la.—1 Piɛrɛ 5:7.
2 Jehova ka labɛnw: Jehova be fanga di an ma a ka hakili senu sababu fɛ, a ye o fanga barikaman kelen min kɛ ka duniɲa dan. N’an sɛgɛnna, Ala ka hakili senu b’an dɛmɛ ka “barika kura sɔrɔ.” (Es. 40:31). I yɛrɛ ɲininga: ‘Tuma juman na ne ye Ala deli tigitigi a ka hakili senu di ne ma walisa ne ka fanga sɔrɔ ka n’ ka kerecɛnya kunkanbaaraw dafa?’—Luka 11:11-13.
3 An kɛtɔ ka Ala ka Kuma senuman kalan ani ka miiri a kan loon o loon, ani an kɛtɔ k’an ka gafew kalan tuma o tuma walisa k’an yɛrɛ balo Alako ta fan fɛ, an bena kɛ i ko yirisunba nugulen “min turulen bɛ jiwoyo da la, a bɛ den a den tuma la. O jirifura tɛ fɔsɔnfɔsɔn.”—Zab. 1:2, 3.
4 Jehova fana be se ka tɛmɛ an batokɛɲɔnw fɛ k’an “dusu saalo kosɛbɛ” (Kol. 4:10, 11). U ka barow, n’u ka lakalitaw ani u ka kalan ɲumanw sababu fɛ u be barika don an na kafo ka lajɛnw na (Kɛw. 15:32). Kerecɛnw ka diinan mɔgɔkɔrɔw kɔni be dɛmɛ kɛ Ala ko ta fan fɛ ani u be mɔgɔw jagwɛlɛya ka barika don u la.—Es. 32:1, 2.
5 Cidenyabaara kɛtɔ: N’i y’a ye ko i be sɛgɛnna, i kana waajuli kɛli dabila! Waajuli baara tɛ komi baara caaman tɔɔw: tiɲɛn na, ale kɔni be barika don an na n’an b’a kɛ tuma o tuma (Mat. 11:28-30). Kibaro duman waajuli b’an dɛmɛ an k’an hakili sigi Ala ka Masaya kan. A fana b’an dɛmɛ an k’an ɲɛɛ jɔlen to banbaliya kan ani a be min mara an ye.
6 Baara caaman be yen ka kɛ sanni duniɲa juguman nin ka halaki. Tiɲɛn na, kun b’a la an sabatilen ka to an ka cidenyabaara la “ka kɛɲɛ ni Ala ka barika dilen ye a ma.” (1 Piɛrɛ 4:11). Jehova ka dɛmɛ sababu fɛ, an bena an ka baara ban, sabu “a bɛ se di mɔgɔ barika bannen ma.”—Es. 40:29.