Mɔgɔ wɛrɛw dɛmɛ u ka na lajɛnw na
1 “An teri kelen kelen minw be sigida la . . . n’u b’a fɛ ka na lajɛn na, an b’u weele ni dusu diya ye u ka na.” Nin kunnafoni bɔra saan 1880, novanburukalo La Tour de Garde de Sion kɔnɔ. Kabini o wagati la, Jehova Seerew tora ka mɔgɔw weele teliya la ka na lajɛn na walisa ka Bibulu kalan ( Jira. 22:17). O ye batoli lakika fanba dɔ ye.
2 A kɔrɔtalen lo kosɔbɛ ka na lajɛnw na: N’an be jɛn ni kɔngeregasiyɔn ye, an be duga sɔrɔ o la. O sababu fɛ an be Jehova lɔn koɲuman, ale min ye Ala cɛɲumanba ye. Kɔngeregasiyɔn kɔnɔ, an be lajɛn walisa ka ‘kalan Jehova fɛʹ (Esayi 54:13). A ka ɔriganisasiyɔn be labɛn kɛ walisa k’an kalan tuma bɛɛ ni Bibulu ye. O kalan be an magwɛrɛ Jehova la. A be an dɛmɛ fana ka “Ala sago bɛɛ” kɛ (Kew. 20:27; Luka 12:42). Lajɛnw be an kelen kelen dege mɔgɔw kalan cogo la Ala ka Kuma la. Bibulu ka hakilijigikow b’an dɛmɛ ka jɛnɲɔgɔnya ɲuman kɛ ni mɔgɔ wɛrɛw ye ani Jehova yɛrɛ ye. Mɔgɔ minw be Ala kanu, n’an be jɛn n’u ye, o be an ka lanaya sabati. —Rom. 1:11, 12.
3 Sin k’a tigi weele: Kalan fɔlɔ kɛtɔ dɔrɔn, kalanden kelen kelen bɛɛ weele ka na lajɛn na. Lajɛn tɛmɛnen ka hakilinata min ye i jagwɛlɛya, ani kalan min bena kɛ lajɛn nata la, o kofɔ a ye walisa ka lajɛn nege don a la. Masaya Boon cogoya lakali a ye. N’a t’a yɔrɔ lɔn, a yira a la.
4 Ni kalanden dɔ ma tilen ka na, i ka timinandiya ka to ka welekan lase a ma. Lɔgɔkun o lɔgɔkun, miniti damanin ta ka an ka ɔriganisasiyɔn baara kɛcogo yira a la. Baara kɛ ni kitabunin Les Témoins de Jehovah : Unis pour faire la volonté de Dieu sur toute la terre ani kasɛti videwo Les Témoins de Jehovah : Un nom, une orgasisation ye k’a dɛmɛ a ka deli an na, ani an ka lajɛnw na. Taga ni weleweledala wɛrɛw ye walisa kalanden k’u lɔn. Delili kɛtɔ, barika la Jehova ye a ka ɔriganisasiyɔn koo la. A fɔ fana ko kalanden mako b’a la ka jɛn n’a ye.
5 Kana sigasiga ka kalanden kuraw dɛmɛ u ka jɛn n’an ye. N’u ka waleɲumanlɔnniya be bonyana ka taga Jehova koo la, o bena u ɲɔndi k’u ka kalan sira tagama. O fana bena u ɲɔndi ka don Ala ka ɔriganisasiyɔn kanbɛnnen kɔnɔ. —1 Kɔr. 14:25.