Kɔrɔsili kɛ ka tulogwelenw sɔrɔ i ka kiin na

¹ Jehova be welekan lasera ko: “ ‘Na!’ . . . Min b’a fɛ, o ka ɲɛnamaya jii min gwansan.” ( Jira. 22:17). O welekan jaabibaga dɔw kɛra tulogwelenw ye, o minw hakɛ be cayara ka taga. O cogo la, saan 13 tɛmɛnen na, bobow kumacogo kɔngeregasiyɔn 27 ani jɛkulu 43 jusigira Eta Zini jamana na. Togo jamana na fana, bobow kumacogo jɛkulu kelen be yen. A be sɔrɔ Lome. Mɔgɔ 10 ɲɔgɔn be to ka na u ka lajɛn na tuma o tuma, ani u be se mɔgɔ 30 ni kɔ ma lajɛnbaw la.

² Hali ni o kɔngeregasiyɔnw ni jɛkuluw be jijaliw kɛra walisa ka tulogwelenw ni bobow yɔrɔ ɲini u ka kiin kɔnɔ, tulogwelenw ka ca, an ka kan ka minw sɔrɔ ani k’u waaju.

³ I be se k’u dɛmɛ cogo di? Jama yɔrɔw la, yala i delila ka mɔgɔw ye minw be kuma bobow cogo la wa? I lɔnbagaw cɛ baarakɛyɔrɔ la, wala lakɔliso, yala tulogwelen be yen u dɔ ka denbaya kɔnɔ wa? I kɛtɔ k’i ka loon o loon koow ɲɛnabɔ, kɔrɔsili kɛ ka bobow sɔrɔ. Nka cogo juman na i be se ka la a la ko u bena Masaya seereya sɔrɔ?

⁴ An ka seereya di: Koow b’a yira ko tulogwelen caaman be ɲɛtaga sɔrɔ joona tiɲɛn koo la n’u be se ka jɛn ni tulogwelenw Seerew ye kɔngeregasiyɔn ka lajɛnw na. O kama, a sɛgɛsɛgɛ k’a filɛ n’i be tulogwelenw ka ladɛrɛsi tigitigi ta. I ka kan k’a tɔgɔ ta, k’a sigiyɔrɔ sɛbɛ, k’a sira n’a ka soo nimɔrɔ sɛbɛ, n’u be se ka sɔrɔ. Kunnafoni o kunnafoni min be se k’an dɛmɛ k’a tigi sɔrɔ joona, o sɛbɛ. A ka ɲi i k’i jija k’a lɔn n’o tulogwelenw be bobow ka kumacogo dɔ lɔn. Hakɛ to ka o Kunnafoniw di kɔngeregasiyɔn ka sekeretɛri ma. Ale bena kunnafoni di o kan Sosiyete ma kalosa la. Sosiyete lo bena a lɔn labɛn min ka kan ka kɛ walisa kiin na tulogwelenw ka dɛmɛ sɔrɔ.

⁵ Sanni koow ka ɲɛtaga sɔrɔ, ni mɔgɔ si tɛ yen i sigida la min be se ka tulogwelen dɛmɛ Alako ta fan fɛ i ka kiin na do? Ile be se k’i ka dɛmɛ lase cogo juman na? Mun na i tɛ taga bɔ a ye walisa ka kuma a ka somɔgɔw fɛ, minw be mɛnni kɛ? A ɲini ka bobow kumacogo kasɛti videwo dɔ yira walisa ka tulogwelen mako don tiɲɛn koo la. Weleweledala dɔw yɛrɛ ye amerikikaw bobow kumacogo dege walisa ka tulogwelenw dɛmɛ cogo barikaman na (Kew. 16:9, 10). Kitabunin Wajibiya ani gafe Dɔnniya labilanen be kasɛti videwo kɔnɔ, amerikikaw bobow ka kumacogo la. Bibulukalanw be kɛra n’o baarakɛminanw ye, ani tɔnɔn caaman sɔrɔla a la ka ban.

⁶ I kɛtɔ ka kɔrɔsili kɛ ka tulogwelenw sɔrɔ i sigida la, i be se ka sira di u ma u ka ɲɛnamaya jii min gwansan. —Mat. 10:11.