Sanni i ka kaan tigitigi dɔ fɔbagaw waaju, n’a sɔrɔ i ka kan k’u yɔrɔ ɲini fɔlɔ
1. Yɔrɔ minw na kaan caaman be fɔ, mun na waajuli kɛyɔrɔw be di kafo kelen kelen bɛɛ ma ka kɛɲɛ ni kaan min be fɔ o kafo kɔnɔ?
1 Saan 33 Pantekɔte loon na, hakili senu jiginin kɔ Yesu ka kalandenw kan, u y’a daminɛ ka ‘kaan wɛrɛw fɔ’ mɔgɔw ye minw bɔra yɔrɔjan na (Kɛw. 2:4). O kɛra sababu ye mɔgɔ 3 000 ɲɔgɔn batisera. Tiɲɛn lo ko o lonanw fanba tun be foroba kaan dɔ mɛn, o min tun ye Heburukan wala Gɛrɛkikan ye. O bɛɛ na ta, Jehova y’a latigɛ ko Masaya kibaro ka fɔ o mɔgɔw ye u yɛrɛ ka siya kaan na. O kɛ kuun dɔ ye ko mɔgɔw ka teli ka sɔn kibaro diiman na n’u b’a lamɛnna u yɛrɛ ka siya kaan na. O kama bi, yɔrɔ minw na kaan caaman be fɔ, yɔrɔ dɔ be tilan ka di kafo kelen kelen bɛɛ ma ka kɛɲɛ ni kaan min be fɔ o kafo kɔnɔ (Gafe Organisés ɲɛɛ 107, § 1, 2). Nka yɔrɔ tigitigi dɔ tɛ tilan ka di kaan wɛrɛ fɔbagaw jɛnkuluw ma. U kalifara kafo min ma, ani kafo wɛrɛ minw b’u gɛrɛfɛ u be waajuli kɛ olu ka kiinw kɔnɔ.
2. a) An ka kan ka ɲinini baara juman lo kɛ, ani yɔrɔ jumanw na o ye waajibiko ye? b) Kafow be se ka ɲɔgɔn dɛmɛ cogo di waajuli la ni kaan caaman be fɔ u ka kiinw kɔnɔ? c) An ka kan ka mun lo kɛ n’an ye makodon mɔgɔ dɔ sɔrɔ min be kaan wɛrɛ fɔ?
2 E be yɔrɔ min na, ni kaan kelen dɔrɔn lo be fɔ yen, i be se ka sin ka waajuli kɛ soo kelen kelen bɛɛ kɔnɔ dɔrɔn. Nka, n’a sɔrɔ e be duguba dɔ la, yɔrɔ min na kaan caaman be fɔ. Kaan wɛrɛw be fɔ kafo minw kɔnɔ, n’a sɔrɔ olu mɔgɔw be waajuli kɛ kiin kelen kɔnɔ. Aw ka kan ka mɔgɔ minw waaju, tiɲɛn lo ko kafo tɔɔw be se ka kunnafoniw di aw ma olu koo la. Nka, aw ka kafo wala aw ka jɛnkulu ka kunkanbaara lo k’u ɲini. (Koorilen nin lajɛ: “An ka ɲɔgɔn dɛmɛ.”) O kama, n’a sɔrɔ i ka kan k’a daminɛ ka ɲinini kɛ fɔlɔ walisa ka kaan tigitigi dɔ fɔbagaw yɔrɔ lɔn. O baara be kɛ cogo di?
3. Kafo wala jɛnkulu ka kan ka ɲinini kɛ yɔrɔ min na ani a be wagati hakɛ min kɛ o la, o be bɔ mun lo la?
3 O baara labɛncogo: Kaan caaman be fɔ kiin minw kɔnɔ, an be wagati hakɛ min kɛ k’o kaan fɔbagaw ɲini, o be bɔ koo caaman na i n’a fɔ: Mɔgɔ hakɛ juman lo b’o kaan fɔ kiinw kɔnɔ? Weleweledala joli lo b’o kaan fɔ? Kafo wala jɛnkulu b’o kaan fɔbaga mɔgɔ joli ka soow yɔrɔ lɔn ka ban? Waajibi tɛ ko kafo ka ɲinini kɛ kiinw bɛɛ kɔnɔ cogo kelen na. Nka, mɔgɔw ka ca kiin minw kɔnɔ ani kiin minw yɔrɔ man jan kojugu, an be se k’a latigɛ ka ɲinini kɛ yen. A kɔrɔtanin lo o ɲinini baara ka labɛn ka ɲɛ. O la, sababu bena di mɔgɔ caaman ma ka Jehova tɔgɔ weele.—Rom. 10:13, 14.
4. a) Ɲinini baara ka kan ka labɛn cogo di? b) Kaan min be fɔ aw ka kafo wala jɛnkulu kɔnɔ, a’ y’o fɔbagaw sɔrɔcogo dɔw yira.
4 Baara min be kɛ ka kaan tigitigi dɔ fɔbagaw ɲini, diinan mɔgɔkɔrɔw jɛnkulu ka kan k’o baara labɛn ani k’a kɔrɔsi. Waajulibaara kɔrɔsibaga lo ka kan k’o koo ɲɛminɛ walisa weleweledalaw kana don ɲɔgɔn kɔ mɔgɔw ka soow kɔnɔ gwansan (1 Kɔr. 9:26). Ni kafo be ni kaan wɛrɛ fɔbagaw jɛnkulu dɔ ye, o kafo ka diinan mɔgɔkɔrɔw ka kan ka balimacɛ setigi dɔ sugandi k’o jɛnkulu ɲɛminɛ. A ka ɲi a ka kɛ diinan mɔgɔkɔrɔ wala kɔrɔsigi ciden ye. Kafow ni jɛnkulu caaman b’a daminɛ ka sɛgɛsɛgɛri kɛ telefɔni annuaire kɔnɔ wala ɛntɛrɛnɛti kan walisa ka kaan tigitigi dɔ fɔbagaw tɔgɔw sɔrɔ. O kɔ, u b’o mɔgɔw weele telefɔni na wala u be taga bɔ u fɛ walisa k’a lɔn u minw ka ladɛrɛsi ka kan ka sɛbɛ ka mara fana. Kafo min b’o jɛnkulu ka koow ɲɛnabɔ, n’a ka diinan mɔgɔkɔrɔw y’a ye ko nafa bena sɔrɔ a la kafodenw bɛɛ k’u seen don o ɲinini baara la tuma kelen kelen na, u be se ka labɛn kɛ o kama.—Koorilen nin lajɛ: “Kaan min be fɔ aw ka kafo wala jɛnkulu kɔnɔ, o fɔbagaw sɔrɔcogo.”
5. a) Ladili jumanw be se ka weleweledalaw dɛmɛ ka mɔgɔw yɔrɔ ɲini? b) Kaan tigitigi dɔ fɔbagaw ɲinitɔ, an be se ka mun lo fɔ mɔgɔw ye?
5 An mana an seen don o mɔgɔ sifaw ɲinini na, an ka kan ka kɛ ni laɲinita tigitigi dɔ ye. Komi o ye waajuli baara faan dɔ ye, a ka ɲi an ka fani don cogo bɛnnin na. K’u to kaan tigitigi dɔ fɔbagaw ɲinini na, balima dɔw b’u ka yiracogo kɛ k’a filɛ ani u be kuma o kaan na. U caaman y’a kɔrɔsi ko o b’u dɛmɛ ka to ninsɔndiya la ani k’o kaan lɔn ka ɲɛ. An be wagati min kɛ ka mɔgɔw yɔrɔ ɲini, an be se k’o jati an ka rapɔɔri kɔnɔ. Nka, an be wagati min kɛ ka mɔgɔw ka ladɛrɛsiw labɛn, o man kan ka jati. An mana mɔgɔ dɔ sɔrɔ min b’o kaan fɔ, an k’an jija k’a tigi waaju. O kɔ, an ka teliya k’a kofɔ waajulibaara kɔrɔsibaga ye wala ale ye mɔgɔ min sigi o baara kun na. O la, u be se k’o tigi ka ladɛrɛsi fara tɔɔw kan. An k’o kɛ hali n’a tigi m’a mako don. Tiɲɛn lo, baara min be kɛ ka kaan tigitigi dɔ fɔbagaw ɲini, o kɔrɔtanin lo. Nka, an ka kan ka koow kɛ k’u dama kɛɲɛ ani k’an seen don waajuli baara faanw bɛɛ la.—Koorilen nin lajɛ: “Kaan tigitigi dɔ fɔbagaw ɲinitɔ, an be se ka min fɔ.”
6. Mun na a man nɔgɔ fewu ka tulogwelenw yɔrɔ ɲini?
6 Tulogwelenw yɔrɔ ɲinicogo: A man nɔgɔ fewu ka tulogwelenw yɔrɔ ɲini ani o tɛ ɲɛ jijaliba ni muɲuli kɔ. Tulogwelen tɛ lɔn a tɔgɔ, a farikolo cogoya wala a ka fani doncogo fɛ. Ka fara o kan, a somɔgɔw be se k’a ɲini k’a tanga koo ma. O kama, u bena sigasiga ka kunnafoni dɔw di weleweledalaw ma a koo la. Ladili minw bena di tulogwelenw ɲinini koo la, u fana be se k’an dɛmɛ ka kaan tigitigi dɔ fɔbagaw ɲini.
7. a) N’an be tulogwelenw yɔrɔ ɲinina kiinw kɔnɔ, an be se ka mɔgɔw ɲininga mun lo la? b) Ni mɔgɔ dɔ be sigasiga, an be se k’a hakili sigi cogo di?
7 Bobow kumacogo ka kafow wala u ka jɛnkuluw ye tulogwelenw ɲini kiinw kɔnɔ ani u ye sanga sɔrɔ o la. Kiinmɔgɔ dɔ be se k’a fɔ i ye ko ale sigiɲɔgɔn, a baarakɛɲɔgɔn wala a ka lakɔli filankuru dɔ be kuma bobow kumacogo la. N’a sɔrɔ a ye tagamasiɲɛ dɔ ye sira kan min be mɔgɔw lasɔmi ko bobo denmisɛnw be yen. N’a sɔrɔ ale yɛrɛ somɔgɔ dɔ ye bobo ye. I k’a to i hakili la ko a tigi be se ka sigasiga i la. Nka i be se k’i jija k’a tigi hakili sigi n’i b’i kɔnɔ gwɛ ka teriya kɛ n’a ye. I ka kuma a fɛ ni bonya ye k’i nakun ɲɛfɔ ka gwɛ ani ka surunya. Balima dɔw sera ka tulogwelenw yɔrɔ lɔn nin cogo la: u be Bibulu wala DVD dɔw kɔnɔkow yira mɔgɔw la ani u b’u ɲininga n’u be tulogwelenw dɔ yɔrɔ lɔn. O kɔ, u b’a fɔ ko u b’a fɛ k’a yira tulogwelenw la Bibulu be jigiya min di mɔgɔw ma. N’o tigi be sigasigara ka kunnafoniw di, n’a sɔrɔ a bena sɔn k’i ka ladɛrɛsi ta wala ka sɔn sɛbɛ dɔ la min be mɔgɔ weele kafo ka lajɛnw na walisa k’o di a somɔgɔ wala a teri tulogwelen dɔ ma.
8. Bobow kumacogo ka kafo be se ka dɛmɛ sɔrɔ a gɛrɛfɛ kafo dɔ fɛ cogo di?
8 Saan o saan, bobow kumacogo ka kafo be se k’a ɲini a gɛrɛfɛ kafo dɔ fɛ min be kaan wɛrɛ fɔ, a k’a dɛmɛ tile kelen wala tile fila kɔnɔ ka tulogwelenw yɔrɔ lɔn u ka kiinbabaw kɔnɔ. Bobow kumacogo ka kafo lo bena waajuli baara lajɛn ɲɛminɛ. U be se ka cikan dɔw lajɛ ani ka ɲɛyirali dɔ kɛ. Jɛnkulu minw labɛnna waajuli kama, bobow kumacogo ka kafoden kelen kɔni ka kan ka sɔrɔ o jɛnkulu kelen kelen bɛɛ la. U bena karti dɔ di a ma min b’a yira jɛnkulu ka kan ka taga tulogwelenw ɲini yɔrɔ tigitigi min na.
9. Forobayɔrɔ minw kofɔra yan, an be se ka tulogwelenw ɲini cogo di o yɔrɔw la?
9 Weleweledalaw be se ka tulogwelenw ɲini yɔrɔ minw na tulogwelenw ka teli ka ɲɔgɔn lajɛn, k’u yɛrɛ ɲɛnagwɛ wala ka dɛmɛ sɔrɔ kiin kɔnɔ. Weleweledalaw ka kan ka fani don cogo bɛnnin na o baara kosɔn. A ka fisa u ka kuma nɛmɛnɛmɛ ni mɔgɔ kelen wala mɔgɔ fila ye sanni u k’a ɲini ka kuma ni jama kuru bɛɛ ye. N’u ka barokɛɲɔgɔnw y’u mako don, u be se k’u ka ladɛrɛsiw di ɲɔgɔn ma.
10. Weleweledalaw be se ka tulogwelenw ɲini cogo di baarakɛyɔrɔw la?
10 Fɛɛrɛ wɛrɛ ye ka kartiw labɛn minw be baarakɛyɔrɔw yira ani ka taga bɔ o yɔrɔw la wagati bɛnnin na. Aw be se ka esansi feereyɔrɔ dɔw yira kari kelen kan. Karti wɛrɛ kan, a’ ye yɔrɔ nunu yira: Fani paseyɔrɔ, ɛrɛsitoranw, lotɛliw wala baarakɛyɔrɔ wɛrɛw. Ni karti kelen kelen bɛɛ be baarakɛyɔrɔ sifa kelen yira, weleweledalaw be se k’u yɛrɛw degi baro daminɛcogo kelen na ani ka hakili sɔrɔ o baara la. Ɲɛyirali fɛ, komi tulogwelenw fana be to ka na si lotɛliw la, an be se k’an ka baara ɲɛfɔ ka surunya lotɛli sekeretɛri ye. O kɔ, an be se ka DVD ani kafo ka lajɛnw weelesɛbɛw to lotɛli la walisa u k’o di tulogwelenw ma. Jagokɛyɔrɔ dɔw la, an be se ka ɲiningali kɛ n’u ka baarakɛla dɔ wala u ka kiliyan dɔ be kuma bobow kumacogo la. Ni tulogwelenw ka lakɔliso dɔ be yen kiin kɔnɔ, an be se ka an ka DVD dɔw to u ka biblotɛki kɔnɔ.
11. Ka kaan tigitigi dɔ fɔbagaw ɲini, mun na o ye waajuli baara faan dɔ ye min kɔrɔtanin lo?
11 Baaraba lo: Kaan min be fɔ kafo kɔnɔ, o fɔbagaw sɔrɔko man nɔgɔ fewu. Ka fara o kan, kiinw cogoya be yɛlɛma joona joona, mɔgɔ dɔw be taga, dɔw be na. O b’a to a man nɔgɔ ka mɔgɔw ka ladɛrɛsiw sɔrɔ ka mara. O bɛɛ n’a ta, yɔrɔ caaman na, kaan tigitigi dɔ fɔbagaw ɲinini ye waajuli baara faan dɔ ye min kɔrɔtanin lo. Jehova min ye waajuli baara kalifa an ma, ale tɛ mɔgɔ bɔ mɔgɔ la (Kɛw. 10:34). “Ale b’a fɛ mɔgɔw bɛɛ ka kisi ka se ka tiɲɛ dɔn.” (1 Tim. 2:3, 4). O la do, an k’an bolo di ɲɔgɔn ma ka jɛn ka baara kɛ ni Jehova ye walisa kaanw bɛɛ la, mɔgɔ minw be ni “dusu ɲuman” ye, an ka se k’olu sɔrɔ.—Luka 8:15.
[Koorilen ɲɛɛ 5 kan]
An ka ɲɔgɔn dɛmɛ
Ni kafo wala jɛnkulu dɔ b’a fɛ u k’ale dɛmɛ ka kaan wɛrɛ fɔbaga dɔw sɔrɔ, waajulibaara kɔrɔsibaga be se k’o fɔ a gɛrɛfɛ kafow ka diinan mɔgɔkɔrɔw ye. O kaan fɔbagaw ka ca kafo minw ka kiinw kɔnɔ, wala kafo minw yɔrɔ man jan kojugu, a ka fisa a k’a ɲɛsin olu dɔrɔn ma. O kafow ka diinan mɔgɔkɔrɔw bena a fɔ weleweledalaw ye ko n’u ye mɔgɔ dɔ sɔrɔ min b’o kaan fɔ, u k’a ka ladɛrɛsi sɛbɛ ani k’a di waajulibaara kɔrɔsibaga ma. Ale bena o di kafo wala jɛnkulu ma min ye dɛmɛ ɲini u fɛ. Waajulibaara kɔrɔsibagaw be se ka jɛn ka fɛɛrɛ dɔ sigi sen kan min be kafow dɛmɛ k’u ka kiinw bɛɛ baara ani ka makodon mɔgɔw ɲɛsin kafo wala jɛnkulu bɛnnin dɔ ma.
Ni weleweledala dɔ ye mɔgɔ dɔ sɔrɔ min y’a mako don sɔbɛ la ani a be kaan wɛrɛ fɔ (wala ni bobo lo), a ka teliya ka sɛbɛ Veuillez suivre l’intérêt (S-43) dafa ani k’a di kafo ka sekeretɛri ma. O bena kɛ sababu ye o tigi ka dɛmɛ sɔrɔ Alako ta fan fɛ joona joona.—km 5/11 ɲɛɛ 3 lajɛ.
[Koorilen ɲɛɛ 6 kan]
Kaan min be fɔ aw ka kafo wala jɛnkulu kɔnɔ, o fɔbagaw sɔrɔcogo
• Mɔgɔw ɲininga: Bibulu kalandenw n’u ka somɔgɔw, baarakɛɲɔgɔnw o n’a ɲɔgɔnnaw.
• Tɛmɛ telefɔni annuaire fɛ k’o siya mɔgɔw tɔgɔw sɔrɔ. Ɛntɛrɛnɛti kan wala telefɔniso la, i be se ka telefɔni annuaire sifa dɔ sɔrɔ min be mɔgɔ tɔgɔ n’a ka ladɛrɛsi yira.
• Jama b’u mako ɲɛ yɔrɔ minw na i n’a fɔ biblotɛkiw, gofɛrɛnɛman ka baarakɛdaw ani kolɛziw la, i ka ɲiningali kɛ yen nɛmɛnɛmɛ.
• I ka zurunaliw lajɛ k’a filɛ ni kunnafoni dɔ ɲɛsinna o kaan fɔbagaw ka foroba koo dɔw ma.
• O kaan fɔbagaw ka teli ka don butiki ni magazɛn minw na, i ka taga bɔ yen.
• O kaan fɔbagaw ka teli ka sɔrɔ jagokɛyɔrɔw, inivɛrisite deenw ka siyɔrɔw wala mobili gari dɔw la. I ka sira deli o yɔrɔ ɲɛmɔgɔw fɛ k’an ka gafe dɔw bila yen tabali dɔ kan.
• Ni jamana ka sariya be sɔn o ma, ɔridinatɛri porogramu min be forobayɔrɔw yira ɛntɛrɛnɛti kan, wala jagokɛlaw ka gafe min be kiliyanw ka ladɛrɛsiw yira, i k’olu dɔ san.
[Koorilen ɲɛɛ 7 kan]
Kaan tigitigi dɔ fɔbagaw ɲinitɔ, an be se ka min fɔ
N’i b’i kɔnɔ gwɛ ka kuma a tigi fɛ teriya la, o be se k’a hakili sigi. Tuma caaman na, a ka fisa i ka gafe dɔ yira fɔlɔ a tigi la a ka kaan na.
Foli bannin kɔ, i be se k’a fɔ ko: “An be mɔgɔw ɲinina minw be ______ kaan fɔ walisa k’a yira u la Bibulu be jigiya min di mɔgɔw ma. Yala i be mɔgɔ dɔ lɔn min b’o kaan fɔ wa?”
N’an be tulogwelenw lo ɲinina, an be se k’a fɔ ko: “A’ ni sɔgɔma! Yala ne be se ka fɛɛn dɔ yira i la wa? [Traduction du monde nouveau ka vɛrise dɔ yira a la DVD kɔnɔ i ka mansindennin na.] Nin ye vɛrise dɔ ye Ameriki ka bobow kumacogo la. Videwo caaman wɛrɛw b’an fɛ ka fara Bibulu kan ani u tɛ feere. U labɛnna walisa ka tulogwelenw ka Alako nege wasa. Bobow kumacogo min yirala yan, yala i be bobo wala tulogwelen dɔ lɔn min be se o la wa?” N’a tigi ko ale tɛ u si lɔn, i be se k’a ɲininga n’a ma deli k’u dɔ ye yɔrɔ dɔw la i n’a fɔ baarakɛyɔrɔ la, lakɔliso wala a ka kiin kɔnɔ.