Yala i be se ka baara kɛ yɔrɔ min na makoyaba be yen wa?
1 Yala i delila ka miiri ka taga i sigi yɔrɔ minw na makoya be yen Masaya weleweledala caaman na wa? N’u ye i weele k’i ka ‘na ... ka dɛmɛ kɛ’, yala i bena o welekan jaabi i ko ciden Pol y’a kɛ cogo min na ka taga masedwanɛkaw dɛmɛ wa? (Kew. 16:9, 10). Kɔngeregasiyɔn caaman mako be denbaya kɔgɔnenw na Alako ta fan fɛ, walima piyɔniyew la walisa k’u ka kiinw tagama. U dɔw mako be diinan mɔgɔkɔrɔw ni kɔrɔsigi ciden setigiw la walisa k’u dɛmɛ ka koow ɲɛmɔgɔya ta. I be taga a sɔrɔ u ka waajuli kɛyɔrɔ ye kongo yɔrɔ ye min ka bon. Dugu denninw lo b’a kɔnɔ ani u yɔrɔ ka jan ni ɲɔgɔn ye. Masaya Boon min yɔrɔ ka surun, n’a sɔrɔ kilo caaman lo be i n’o cɛ. Baara kɛta sɔrɔ man di walisa k’i ka balo sɔrɔ. Tilemana ni samiyan na, n’a sɔrɔ wagati ɲɛɛ man ɲi tuma bɛɛ. Yala i bena sɔn k’o gwɛlɛya kunbɛn wa? Cogo juman na i be se ka see sɔrɔ o kan?
2 Fɔɔ i ka lanaya ni jigidali kɛ: Ka kɛɲɛ ni Ala ka ci ye, Abrama bɔra k’a faso Ur to yen, ani ale n’a muso n’a belenden n’a facɛ kɔrɔlen Tera ye kilo 1000 tagama ka taga Haran (Jen. 11:31, 32; Neh. 9:7). Tera salen kɔ, Jehova ye ci di Abrama ma ko a ka bɔ Haran dugu la k’a fadenw to yen, ani ka taga faso wɛrɛ la, Ala tun bena min yira a la. O wagati la, Abrama tun ye saan 75 ye. Abrama, Sarayi, ani Lɔti “bɔra yen.” (Jen. 12:1, 4, 5). Tiɲɛn lo, Abrama ma bɔ ka taga yɔrɔ dɔ la, yɔrɔ min makoyaba tun be Ala ka baarakɛlaw la. Nka a tagali ye koo dɔ waajibiya a ma. Koo juman?
3 Abrama mako tun be lanaya ni jigidali la walisa k’a ɲini k’o ci dafa. A ka miiriya n’a ka ɲɛnamaya kɛcogo tun ka kan ka yɛlɛma. A tun ye lafiya min sɔrɔ a fadenw fɛ, a tun ka kan ka kɔ di o ma. Nka a jigi tun b’a la ko Jehova bena a janto ale n’a gwamɔgɔw la. Bi, mɔgɔ caaman y’a yira k’u y’u jigi la Jehova kan o cogo kelen na .
4 Cii kɛta, wagati kunkurunin kɔnɔ: Duga caaman b’a la ka baara kɛ duguw la, minw ma kalifa kɔngeregasiyɔn si ma. Yala i delila k’o dugaw diya lɔn wa? Dɔw tun ka kan ka taga yɔrɔ jan na o kama. Kuun tun b’a la k’o jijaliw kɛ wa?
5 Togo jamana na, balimacɛ dɔ y’a latigɛ ka segi ka taga a wolodugu la. Mɔgɔ si tun ma kibaro duman waajuli kɛ yen fɔlɔ. O dugu tun ma kalifa kɔngeregasiyɔn si ma. Ka kɔn o wagati ɲɛ, a somɔgɔ si tun ma sɔn tiɲɛn ma fɔlɔ ni ale kelenpe tɛ. A kɔsegira dugu la tuma min na, a y’a ɲini fɔlɔ ka Bibulukalan kɛ n’a yɛrɛ ka somɔgɔw ye. O kɔ, a tora k’a sigiɲɔgɔnw waaju. A fana tora ka waajuli kɛ fɔɔ ka se dugu wɛrɛw la u gɛrɛ fɛ. Kalo 9 tɛmɛnen kɔ, tuma min na a ye o duguw bila, mɔgɔ 18 tun delila ka na lajɛnw na tuma o tuma. Kabini o wagati, kɔngeregasiyɔn dɔ jusigira. Bi bi nin na, Masaya Boon dɔ be lɔra o dugu la. Ale fana ɲagalila k’a somɔgɔ 12 ye u nana tiɲɛn kɔnɔ. A bamuso b’u cɛ. A kɛtɔ k’o koo jate minɛ, a b’a fɔ ko: ‘Nɛɛma lo k’a ye cogo min na Jehova ye an ka baara duga ne yɛrɛ ka dugu la. A diyara kosɔbɛ ne ni n’ ka muso ye ka mɔgɔw waaju kibaro duman koo la, ani k’a ye cogo min na a be donna u dusukun na. U tun ma o kibaro mɛn ka ye. An hakili bena to koo nin na tuma bɛɛ ni ɲagali ye. Ani, n’a see kɛra an ye tugun ka taga waajuli baara kɛ yɔrɔ dɔ la, min ma kalifa kɔngeregasiyɔn si ma, an tɛna sigasiga ka taga yen.’ Kameruni jamana na, balimamuso dɔ ye waajuli baara kɛ dugu dɔ la, min ma kalifa kɔngeregasiyɔn si ma. A ye nin sɛbɛ ko: “Tiɲɛn na, a kɛra nisɔndiya ye ne fɛ ka jijali sɔbɛ kɛ walisa ka kibaro duman tilan ni o dugu mɔgɔw ye. Ne tɛmɛna an ka waajulibaara kɛcogo faan caaman fɛ. Ne ye Bibulukalanw caaman to yen. Ani fana, mɔgɔ caaman wɛrɛw be an ka cira lamɛn koɲuman. Ne mana o mɔgɔw hakɛ ye, ... a bena diya ne ye kosɔbɛ ni balimacɛ dɔ tun be se ka ci ka taga yen walisa k’o mɔgɔ kɔnɔgwɛw dɛmɛ.”
6 N’i sɔnna cii kɛta la wagati kunkurunin kɔnɔ yɔrɔ min na makoyaba be yen, o be se ka koo wɛrɛ ɲɛ. Minw b’o kɛ, a be u dɛmɛ ka kunnafoni nafamanw sɔrɔ. O Kunnafoniw b’u dɛmɛ ka koow “sɔngɔ jate” walisa ka taga i sigi jamana yɔrɔ wɛrɛ la. —Luka 14:28.
7 Jehova cɛsirinen be k’a ye ko kibaro duman be fɔra “duniɲa yɔrɔw bɛɛ la” sanni laban ka se (Mat. 24:14). N’i y’o lɔn, yala i labilanen bena kɛ ka taga i sigi yɔrɔ dɔ la, ni makoyaba be yen wa? Makoya be yen yɔrɔ caaman na.
8 Ka taga i sigi yɔrɔ min na makoyaba be yen: Yala i ye antɛrɛti sɔrɔ wa? Yala i ka sɔrɔ ye kelen ye kalo o kalo wa? N’o tɛ, yala i be se k’i labɛn k’i tɔgɔla baara kɛ wa? Yala i be se k’i ka balo sɔrɔ yɔrɔ o yɔrɔ la telefɔni walima ɔridinatɛri sababu fɛ wa? N’i tɛ se k’i sigiyɔrɔ yɛlɛma, yala i be se k’i gwamɔgɔ dɔ dɛmɛ a ka taga waajuli baara kɛ yɔrɔ wɛrɛ wa?
9 O koo jate minɛ delili kɔnɔ. O kɔ, n’i y’a ye ko see b’i ye ka taga i sigi yɔrɔ wɛrɛ la, makoyaba be yen yɔrɔ min na, baro kɛ o koo kan n’i ka somɔgɔw ye, ani kɔngeregasiyɔn ka diinan mɔgɔkɔrɔw ye. O kɔ, lɛtɛrɛ dɔ labɛn k’a ɲɛsin Betɛli ma. O lɛtɛrɛ di diinan mɔgɔkɔrɔw ma walisa u ka u yɛrɛw ka fɛtaw fara a kan sanni k’a ci Betɛli ma.
10 I ka kan ka mun lo fɔ i ka lɛtɛrɛ kɔnɔ? I sanda, i batise saan, i be baara min kɛ kɔngeregasiyɔn kɔnɔ, n’i furulen lo wala n’i ye cɛɛ wala muso gwana ye, ani ni denmisɛnw b’i kuun minw ma kɔrɔbaya fɔlɔ. I fɛta ye ka taga i sigi yɔrɔ minw na, u tɔgɔ fɔ. Ɲɛyirali fɛ, yala i be se ka taga i sigi yɔrɔ min na funteni ni sumaya be yen wa? Yala i be se ka foonɛnɛ muɲu wa? Yala i be se ka sigi kuluw yɔrɔ la wa? Yala i be kaan wɛrɛ fɔ wa?
11 Yala i ka kisɛ, ani i b’a bɔ i yɛrɛ la ka koow kɛ wa? Makoyaba be yen yɔrɔ min na, yala i ka koow cogoya b’a to i be se ka taga baara kɛ yen wa? N’o lo, kɔrɔsili kɛ k’a filɛ cogo min na Jehova be duga caaman lase mɔgɔw ma, minw b’u jigi la ale kan tuma min na u be yɛrɛsaraka hakili yira! —Zab. 34:8; Mal. 3:10.