Jogo ɲumanw: Ala ka mɔgɔw tagamasiɲɛ dɔ lo

¹ Jogo ɲumanw ye man di bi. Mun na don? Mɔgɔw kɔrɔtɔlen be kosɔbɛ fɔɔ u be ɲina mɔgɔ bonyacogo gwansan dɔw la, i n’a fɔ: “hakɛ to”, “a ni ce”, wala “sabari”. Ala ka Kuma tun y’a fɔ ko laban loonw na, mɔgɔw ka jogow tun bena tiɲɛ. A tun ko mɔgɔw bena kɛ ‘u yɛrɛw fɛ, tɔgɔ ɲininaw, kuncɛbaw, waleɲumanlɔnbaliw, mɔgɔ gwɛlɛnw, yɛrɛminɛbaliw, u tɛ koo ɲuman fɛ, yɛrɛsagokɛlaw’ (2 Tim. 3:1-4). O sɔɔn sifaw bɛɛ be na ni jogo juguw ye. Kerecɛn minw ye Ala ka mɔgɔw ye, u ka kan k’u yɛrɛw kɔrɔsi walisa duniɲa ka mɔgɔ bonyabaliya hakili kana kɛ u la.

² Jogow ye mun lo ye? Jogo ɲuman kɔrɔ dɔ ye: k’i janto kosɔbɛ mɔgɔ wɛrɛ ka fɛtaw la, ka se ka sigiɲɔgɔnya kɛ ni mɔgɔ wɛrɛ ye hɛɛrɛ la. Jogo ɲumanw kɛcogo dɔ ye: ka mɔgɔ jati, k’a bonya, ka nisɔndiya kɛ n’a ye, ka koow kɛ ni hakili duman ye, ka kɔrɔsili kɛ. Ka Ala kanu, ani k’i mɔgɔ ɲɔgɔn kanu, o lo be na n’o jogow ye (Luka 10:27). Sɔngɔ t’u la. Nka, nafaba b’u la ka hadamadenw ka jɛnɲɔgɔnya fisaya.

³ Yesu Kirista ye ɲɛyirali dafalen to an ye. Tuma o tuma, a ye Sariya dafalen sira tagama: “Aw b’a fɛ mɔgɔw ka koo min kɛ aw ye, aw ka o ɲɔgɔn kɛ u ye” (Luka 6:31, A.B.U. 1987). Yesu tun b’a janto a ka kalandenw na. A tun b’u minɛ ni kanuya ye cogo min na, yala o tɛ an kabakoya wa? (Mat. 11:28-30). A ka jogo ɲumanw tun ma kɛ komi a be kitabu dɔ ka kitiw sira tagamana. U tun be bɔ a dusukun na, min gwɛnen lo, ani min be sɔnni kɛ. An ka kan k’a ɲini k’a ka ɲɛyirali ɲuman ladege.

⁴ Kerecɛnw ka kan ka jogo ɲuman yira tuma juma na? Wagatiba dɔw la dɔrɔn, walisa ka tɔgɔ ɲuman sɔrɔ wa? Walima tuma min na u b’a ɲini ka mɔgɔw ɲɛminɛ wa? Ayi! An ka kan ka jogo ɲumanw yira tuma bɛɛ. Koow jumanw kɔni kɛtɔ, an ka kan k’an janto o la n’an be jɛnɲɔgɔnya kɛra n’an balimaw ye kɔngeregasiyɔn kɔnɔ?

⁵ Masaya Boon kɔnɔ: Masaya Boon ye an ka batoli kɛyɔrɔ ye. Jehova lo b’an weele ka na o yɔrɔ la. O kɔrɔ ko an ye mɔgɔ welelenw ye (Zab. 15:1). Masaya Boon kɔnɔ, yala an ye mɔgɔ welelen ye, min be ɲɛyirali ɲuman di wa? Yala an b’an janto koɲuman an ka fani doncogo n’an kuun masiricogo la wa? Tiɲɛn na, an t’a fɛ k’an masiri i n’a fɔ an b’a kɛ wagati gwansan kama, walima tulonkɛ kama. N’u be tagara lajɛnbaw la, wala lɔgɔkun kɔnɔ lajɛnw na, bɛɛ b’a lɔn ko Jehova Seerew ka fani doncogo ka ɲi. O cogoya bɛnnen be mɔgɔw ma, minw b’a fɔ ko u be siran Ala ɲɛ (1 Tim. 2:9, 10). O cogo la, an b’a yira ko an be an sankolola Jatigi ani mɔgɔ welelen wɛrɛw jati, k’u bonya sabu u ka kan n’o ye.

⁶ Ka taga lajɛnw fan fɛ, jogo ɲumanw yiracogo wɛrɛ ye ka na lɛri la. Tiɲɛn lo, o man nɔgɔ tuma bɛɛ. Dɔw bɔyɔrɔ ka jan, wala u ka kan ka denmisɛn caaman labɛn. Nka, u y’a kɔrɔsi ko kɔngeregasiyɔn dɔw kɔnɔ, weleweledalaw tilan naaninan be na kɔfɛ, tuma min na datigɛli dɔnkili ni delili kɛra ka ban. An k’an janto o la kosɔbɛ. An ka kan k’an hakili to a la ko jogo ɲuman kɔrɔ ko k’i janto mɔgɔ wɛrɛw ka fɛtaw la. Jehova, an Jatigi ɲuman, ye o hakilimaya fanaba labɛn an kama. An kɛtɔ ka na lɛri la, an b’a yira ko an b’a waleɲumanlɔn, ani ko an b’an janto a ka fɛtaw la. Ka fara o kan, ka na kɔfɛ, o be kafodenw fereke. Ani, minw be kalan lamɛnna ka ban, o b’a yira ko an tɛ bonya la u kan.

⁷ An mana lajɛn, yala an b’a kɔrɔsi ko mɔgɔ kuraw nana lajɛn na wa? Jogo ɲuman kɔrɔ ko k’u bisimila (Mat. 5:47; Rom. 15:7). Ka foli ɲuman kɛ, k’a tigi bolo minɛ k’a fo ni dusu ye, ka yɛlɛmisɛn kɛ ni kanuya ye, o bɛɛ ye koo misɛnw ye. Nka u b’a yira ko an ye kerecɛn lakikaw ye ( Yuh. 13:35). Cɛɛ dɔ siɲɛ fɔlɔ tagara Masaya Boon na. O kɔ, a y’a fɔ ko: “Tile kelen kɔnɔ, ne ye mɔgɔ minw kunbɛn ani u ye kanuya yira ne la, ne tun t’u lɔn fewu, nka u ka ca ka tɛmɛ ni mɔgɔ minw ye ne kanu ne ka Eglisi kɔnɔ. Ne don kɔrɔbayara o Eglisi kɔnɔ. A gwɛra ne ɲɛɛ na ko ne ye tiɲɛn sɔrɔ.” O kɔ, a y’a ka ɲɛnamaya kɛcogo yɛlɛma, ani kalo wolonfila tɛmɛnen kɔ, a batisera. Siga t’a la jogo ɲumanw be se ka nɔɔ nafamanba to mɔgɔ kan!

⁸ An be lonan minw kunbɛn, n’an b’u minɛ ni jogo ɲumanw ye, yala an t’o ɲɔgɔn kɛ “janko an balima dannabaaw” ye wa? (Gal. 6:10). Nin sariya nin kuun b’a la: “I ka . . . mɔgɔ kɔrɔba bonya.” (Lev. 19:32). An ka lajɛnw na, an man kan ka ɲinɛ abada o ɲɔgɔnna mɔgɔw la.

⁹ An ka jantoli kɛ: An ka lajɛnw na, Ala ka cidenya baarakɛlaw be kuma ta ka hakili senu nilifɛn dɔ lase an ma walisa k’an sabati (Rom. 1:11). Ni lajɛnw wagati la, an be sunɔgɔ, an be singɔmi (chewing-gum) ɲimi ka mankan kɛ, an be dogodogo kumaw fɔ mɔgɔ dɔ ye an gɛrɛ fɛ, an be taga ka na ɲɛgɛn na gwansan, an be gafe wɛrɛ kalanna, wala an be koo wɛrɛ kɛra, o ye bonyabaliya ye dɛ! Diinan mɔgɔkɔrɔw ka kan ka ɲɛyirali ɲuman di o koo la. Kerecɛn jogo ɲuman ka kan k’an lasu ka bonya sɔbɛ la kalan kɛbaga n’a ka cira kan. O cira basigira Bibulu kan. An k’an janto kalan kɛbaga la ni sɔbɛ bɛɛ ye.

¹⁰ Ka fara o kan, kalan kɛbaga ani lamɛnnikɛlaw bonya kosɔn, an ka kan k’an janto telefɔni selilɛri si wala biper si kana lajɛnw nagasi.

¹¹ Denmisɛnw ani jogo ɲumanw: Tuma o tuma, bangebagaw ka kan k’u deenw tagamacogo kɔrɔsi. Ni den dɔ ye kasi daminɛ, wala n’a tɛ sigi yɔrɔ kelen tugun lajɛn wagati la, ka mɔgɔ wɛrɛw kɔnɔgwan, bangebaga ka ɲi ka bɔ n’a ye kɛnɛ ma joona walisa k’a mala. O be se ka gwɛlɛya tuma dɔw la. Nka an k’an hakili to a la ko o kɛtɔ, an b’a yira ko an b’an janto tɔɔw la. Ni denmisɛn dɔw tɛ sigi yɔrɔ kelen, tuma caaman, u bangebagaw b’a ɲini ka sigi kɔfɛ Masaya Boon kɔnɔ, janko u kana mɔgɔw kɔnɔgwan tuma o tuma n’u ka kan ka wili ka bɔ lajɛn wagati la. O la, lamɛnnikɛlaw tɔw bena a yira k’u be u janto denbayaw la, u kɛtɔ ka kɔfɛla sigiyɔrɔw labila denbayaw ye n’u b’a fɛ.

¹² Bangebagaw ka kan k’u deenw tagamacogo kɔrɔsi fana sanni lajɛnw ka daminɛ, ani u bannen kɔ. Denmisɛnw man kan ka boli boli boon kɔnɔ, sabu o be se ka mɔgɔ mandimi. Farati b’a la fana ka boli boli Masaya Boon laminiw na, janko wula fɛ, tuma min na yeelen ka dɔgɔ. Ka baro kɛ ni kaanba ye Masaya Boon kɛnɛma, o be se ka sigiɲɔgɔnw kɔnɔgwan, ani ka tɔgɔ jugu la an ka batoli kan. Bangebaga minw be jijali sɔbɛ kɛ k’u ka deenw kɔrɔsi Masaya Boon kɔnɔ, ani a kɛnɛma, u ka kan ni tandoli ye, sabu o be dɔ fara an ka lajɛnw diya kan kelenya la. —Zab. 133:1.

¹³ Kitabukalan na: An balima minw b’u ka soo labila kɔngeregasiyɔn ka lajɛnw kama, an b’u waleɲumanlɔn. An kɛtɔ ka lajɛn u fɛ yen, an b’a fɛ ka jantoli kɛ ani ka bonya la u ka bololafɛnw kan. Sanni ka don boon kɔnɔ, an ka ɲi k’an ka sabaraw jɔsi koɲuman walisa an kana boon kɔnɔna wala tapi nɔgɔ. Bangebagaw ka ɲi k’u deenw kɔrɔsi walisa u kana taga boon yɔrɔ wɛrɛ, min ma labila Kitabukalan kama. Hali ni jɛkulu ka dɔgɔ, ani dusu diya be yen, an man kan ka koow kɛ an yɛrɛ ma mɔgɔ wɛrɛw ka soo kɔnɔ. Ni denmisɛn dɔ b’a fɛ ka taga ɲɛgɛn na, a bangebaga ka kan k’a bila sira. Ka fara o bɛɛ kan, komi Kitabukalan ye kɔngeregasiyɔn ka lajɛn dɔ ye, an ka ɲi ka faniw don i n’a fɔ an be tagara Masaya Boon kɔnɔ.

¹⁴ Jogo ɲumanw kɔrɔtalen be: Kerecɛnya jogow tɛ nɔɔ ɲuman dɔrɔn to an ka cidenyabaara kan. U fana be na ni jɛnɲɔgɔnya ɲuman ye mɔgɔw cɛ (2 Kɔr. 6:3, 4, 6). An minw ye hɛɛrɛ Ala batobagaw ye, a ka kan ka nɔgɔya an fɛ ka yɛlɛ misɛn bɔ, ka diya mɔgɔw ye, ani ka koo misɛn duman caaman kɛ, minw be mɔgɔ wɛrɛw nisɔndiya. O jogo ɲumanw bena an ka ɲɛnamaya cɛɲiya, an minw masirilen be Ala la.