Yala bali lo ka waajuli kɛ wa?
1 Mɔgɔ caaman bolo degunnen be u ka ɲɛnamaya kɔnɔ. Jehova Seerew ta degunnen be ka tɛmɛ mɔgɔ caaman ta kan: ka Bibulu kalan, ka taga kɔngeregasiyɔn ka lajɛnw na, k’u sendon waajulibaara la. Ka fara o kan an bolo degunnen be balo ɲini na, soo kɔnɔ baara wala lakɔli, ani kunkanbaara wɛrɛ caaman. O bɛɛ be wagati ta. Nin kɔni ka gwɛlɛ gwatigiw fɛ.
2 Komi sɔrɔɲini ka gwɛlɛ yɔrɔ ni yɔrɔ, gwatigiw ka kan ka baara kɛ lɛri caaman ani ɲɛgwan na walisa ka balo sɔrɔ. Ni baara gwɛlɛman dɔ b’u fanga n’u ka wagati caaman ta, wagati man ca tugun u fɛ waajuli baara kama. Komi waajibi lo u fɛ k’u denbayaw ladon farikolo ta fan fɛ, dɔw be se ka miiri ko u be se ka dɔɔni dɔrɔn kɛ waajuli la (1 Tim. 5:8). Siga si t’a la, bi, degun caaman be yen balo sɔrɔko la. Nka, mɔgɔ ka baloɲini baara man kan k’a bali ka kibaro duman waaju (Marka 13:10). O kama, a ka ɲi an k’an ka koow cogoya yɛrɛyɛrɛ sɛgɛsɛgɛ o fan fɛ.
3 Komi duniɲa ka koow be yɛlɛma tuma o tuma, o be se ka gwatigi dɔ bila ka wagati caamanba kɛ baara la. A ka laɲinita be se ka kɛ ka wari ɲini ka mara ni gwɛlɛya dɔ barila ka wili (1 Kɔr. 7:31). Baloɲini baara be se ka yiriwa ani ka dɔ fara bololafɛnw kan. Walima a be se ka see di mɔgɔ ma ka ɲɛnagwɛ ani ka lafiya koow kɛ. Nka, yala o be se ka dɔ fara denbaya ka hɛɛrɛ n’a ka wasali kan, ni hakilimaya koow ani lajɛnw tagali sarakara o kama wa? Fɛɛn o fɛɛn be se k’an ka hakilimaya bila farati la, an ka kan ka boli o ɲɛ. Yesu ye ladili di ko an ka ‘nafolo lajɛn an yɛrɛw ye sankolo la’ ani an ka kɛ ‘nafolotigiw ye Ala ta fan fɛ.’ N’an b’an janto o la, o ye hakilitigiya sira ye.—Mat. 6:19-21; Luka 12:15-21.
4 An ka Masaya ka tɔnɔw ɲini fɔlɔ: Yesu y’a ka kalandenw kalan u ka hakilimaya koow bila koo bɛɛ ɲɛ. A ye dusu don u la ko: “Aw kana hami ko aw na mun dun ka mun min? Ko aw ka fɛɛrɛbɔ ko na kɛ di?” Mun kama a sera ko fɔ? A y’a ɲɛfɔ ko: “Aw sankolola Fa kɔni b’a dɔn ko aw mago bɛ u bɛɛ la.” Ni an lanen be o la, Yesu ye min fɔ o kɔ, foyi tɛna an bali k’o kɛ. A ko: “A’ ye Ala ka masaya ni a ka tilennenya ɲini fɔlɔ. O mana kɛ, Ala na o fɛɛnw bɛɛ [an mako be minw na] di aw ma ka fara olu kan.” Ala bena a janto o la! (Mat. 6:31-33, A.B.U., 1987). Sisan kɔni tɛ wagati ye k’an yɛrɛ bila ɲɛmajɔbaliya la hami gwansan kosɔn: baloɲini koo la, wala sigiyɔrɔ ɲuman koo la nin koow sigicogoya kɔnɔ, min bena tɛmɛ sanni dɔɔni cɛ. —1 Piɛre 5:7; 1 Yuh. 2:15-17.
5 Baloɲini baara kuun fɔlɔ ye k’i mako wasa farikolo ta fan fɛ. Nka an mako be hakɛ juman lo la? Ciden Pol y’a sɛbɛ ko: “Ni dumuni ni fini bɛ an fɛ, o ka kan ka an wasa.” Yala an b’a ɲini ka dɔ sɔrɔ ka fara o kan wa? N’o lo, an bena bɔnɛ sɔrɔ o la i ko Pol y’an lasɔmi cogo min na ko: “Minw b’a fɛ ka fɛntigiya, olu na bi kɔrɔbɔli fɛ. U nege jugu kunntanw na kɛ jan ye ka u minɛ ka u bila halakili ni tiɲɛni koow la.” (1 Tim. 6:8, 9; Mat. 6:24; Luka 14:33). An be se k’a lɔn cogo juman na ko nege juguw tɛ kɛra bali ye an fɛ?
6 Ni duniɲa ka laɲinitaw kosɔn, an tɛ bɛrɛ kɛ waajuli baara la, wala ni an tɛ sera k’a faamu ko an mako b’a la ka koo dɔw saraka kibaro duman tɔnɔ kama, o kɔrɔ ko an mako b’a la k’an ɲɛnakow makɛɲɛ (Heb. 13:15, 16). Ɲɛnamaya kɛcogo nɔgɔman bena an dɛmɛ sɔbɛ la k’o bali bɔ yen waajuli baara ɲɛ. Baara kɛtɔ n’an ka wagati n’an ka fanga ye, Masaya tɔnɔw ka kan ka kɛ an ka ɲɛnako fɔlɔ ye tuma o tuma.
7 Baara min tɛ fuu ye: Pol ka kumaw be dusu don an na tuma o tuma ka “taga ɲɛ Matigi ka baara la tuma bɛɛ, k’a dɔn ko [an] ka baara tɛna fuu Matigi la.” (1 Kɔr. 15:58, A.B.U., 1987). “Matigi ka baara” kunba ye ka Masaya waajuli kɛ ani ka mɔgɔw kɛ kalandenw ye. (Mat. 24:14; 28:19, 20). Walisa k’an sendon a la ka dafa n’a see b’an ye, fɔɔ an ka labɛn kɛ waajuli baara kama lɔgɔkun o lɔgɔkun. An fana k’an jija janko an kana o wagati ta ka koo wɛrɛ kɛ (Efes. 5:15-17). O cogo la, baloɲini baara wala koo wɛrɛ si tɛna an ka waajuli baara bali.
8 Duba fisaman be nili la. N’an y’an yɛrɛ di ka Bibulu tiɲɛn koow tilan ni mɔgɔ wɛrɛw ye, an b’o duba diya lɔn (Kew. 20:35). An kɛtɔ ka taga ɲɛ Masaya waajuli baara la. O cogo la, an be se ka siniɲasigi ka koow filɛ ni jigidali ye, “k’a masɔrɔ Ala tɛ tilenbali ye, a tɛna ɲinɛ [an] ka kɛtaw kɔ, ani [an] ye kanuya min yira a tɔgɔ kosɔn.”—Heb. 6:10.