Dɔ fara i ka ɲagali kan waajuli baara la
1 I kɛtɔ ka kibaro duman waajuli kɛ, yala i be ɲagali sɔrɔ wa? N’an m’an janto, duniɲa juguman nin be se ka waajuli siranya bila an na. Ani, an ka ɲagali be se ka bɔsi an na. N’an be waajuli kɛ kiin dɔ kɔnɔ ani mɔgɔw t’u mako don, o fana be se k’an fari faga. An be se ka tɛmɛ fɛɛrɛ nɔgɔman jumanw fɛ walisa ka dɔ fara an ka ɲagali kan waajuli baara la?
2 Koow filɛ cogo ɲuman na: Ka koow filɛ ni hakili ɲuman ye, o be mɔgɔ dɛmɛ tiɲɛn na. O kama, nɛɛmaba min dira an ma ka kɛ “Ala ka baarakɛɲɔgɔnw” ye, an ka miiri o kan (1 Kɔr. 3:9, NW ). O baara kɛtɔ, Yesu fana be n’an ye (Mat. 28:20). Ani a be tɛmɛ mɛlɛkɛw kɛlɛbolo fɛ k’an dɛmɛ (Mat. 13:41, 42). O la, an ka la a la ko Ala b’an ka jijaliw kɛli ɲɛminɛ ( Jira. 14:6, 7). O kama, hadamadenw mana an kunbɛn cogo o cogo, an ka baara ye ɲagaliba sababu ye sankolo la.
3 I labɛn koɲuman: N’an b’an labɛn koɲuman, o fana be dɔ fara an ka ɲagali kan. A man gwɛlɛ k’i labɛn waajuli baara kama. An mako be miniti damanin dɔw la walisa ka hakilinata dɔ lajɛ zurunali wala gafe yirataw kɔnɔ janko ka se ka baro daminɛ ni mɔgɔw ye. Kuma yiracogo dɔ ɲɛnatɔmɔ “Zurunaliw yiracogo” kɔnɔ An ka Masaya Cidenyabaara kɔnɔ. “Ladiliw, waajuli baara kama” lajɛ An ka Masaya Cidenyabaara lankana kɔnɔ (saan 2002, zanwiyekalo ta). Wala, kuma yiracogo barikaman dɔ filɛ gafe Comment raisonner kɔnɔ. Ni mɔgɔw be deli ka sɔsɔli dɔ lawili min b’i degun, i yɛrɛ labɛn k’u jaabi. Ani, u ɲɛsin barokun dɔ ma min be se k’u ɲɛnatigɛ. Gafe Comment raisonner b’an dɛmɛ kosɔbɛ k’o kɛ. O baarakɛminanw bena an dɛmɛ ka hakili sigi sɔrɔ ani ka waajuli kɛ ni ɲagali ye.
4 Delili kɛ sɔbɛ la: An ɲagali tɛ se ka mɛɛn ni delili tɛ. Komi an be Jehova lo ka baara la, an ka kan k’a ka hakili deli. O hakili deen dɔ ye ɲagali ye (Gal. 5:22). Jehova bena fanga di an ma walisa an ka timinandiya waajuli la (Filip. 4:13). N’an be delili kɛ waajuli koo la, o b’an dɛmɛ ka koow filɛ cogo tilennen na hali ni koow gwoman dɔw b’an sɔrɔla (Kew. 13:52; 1 Piɛre 4:13, 14). Ni siranya b’an na, delili be se k’an dɛmɛ ka timinandiya ni jagwɛlɛya ni nisɔndiya ye. —Kew. 4:31.
5 Fɛɛrɛ dɔw ɲini: Tiɲɛn lo, n’an be sera ka mɔgɔw sɔrɔ ani ka sereya di u ma, an ka ɲagali be bonya waajuli baara la. An ka waajuli bena den cogo fisaman na n’an b’an ka wagati makɛɲɛ walisa ka waajuli kɛ soo ni soo wagati wɛrɛw la i n’a fɔ tileben tuma. An be mɔgɔw kunbɛn wagati bɛɛ: n’an be sira kan, n’an be sanni kɛra, n’an be bolifɛn dɔ kɔnɔ, wala n’an be yalayala zaradɛn dɔ kɔnɔ. Mun na i tɛ kuma surun dɔ labɛn ka baro daminɛ ni u dɔw ye, minw nisɔn ka di? Wala i tagatɔ baara la wala lakɔliso, ani baro kɛtɔ ni mɔgɔw ye, i be se ka cogoya sɔrɔ ka seereya kɛ n’i ye ɲiningali dɔ lawili Bibuluko duman dɔ kan. Ladili ɲumanw dira An ka Masaya Cidenyabaara lankana ɲɛɛ fɔlɔ kɔnɔ (saan 2002, zanwiyekalo ta). An kɛtɔ k’o ladiliw sira tagama, dɔ bena fara kosɔbɛ an ka ɲagali kan waajuli la.
6 Komi ɲagali b’an dɛmɛ ka muɲuli kɛ, a kɔrɔtalen be k’a mara! O kɛtɔ, an bena saraba sɔrɔ waajuli baara laban na. O baara ɲɔgɔn tɛna kɛ ka ye tugun abada. O jigiya dama be se ka dɔ fara an ka ɲagali kan waajuli la. —Mat. 25:21.