“An ka baara kɛ Jehova ye ni nisɔndiya ye”
1 Ciden Pol y’a sɛbɛ ko: “A’ ye ɲagali Matigi la tuma bɛɛ. Ne bɛ segin a kan tun, a’ ye ɲagali.” (Filip. 4:4). Nɛɛma dira an ma ka kibaro duman fɔ ani ka saga bisigilamanw dɛmɛ u ka Jehova bato. O nɛɛma ye ɲagali sababu ye an fɛ (Luka 10:17; Kew. 15:3; 1 Tes. 2:19). Nka n’an y’a kɔrɔsi ko tuma dɔw la an tɛ ɲagali sɔrɔla an ka waajuli baara la, an be se ka mun lo kɛ do?
2 Ala ka cidenyabaara: I hakili to a la ko cii min dira an ma ka waajuli kɛ, o cii be bɔ Jehova lo yɔrɔ. An kɛtɔ ka Masaya cira waaju, ani ka mɔgɔw kɛ kalandenw ye, an ye ‘Ala ka baarakɛɲɔgɔnw’ ye. Tiɲɛn na, o ye nɛɛma ye an fɛ dɛ! (1 Kɔr. 3:9). Kirista Yesu be n’an ye o baara kɛtɔ: baara min ɲɔgɔn tɛna kɛ ka ye tugun abada (Mat. 28:18-20). Suman tigɛ baaraba min be kɛra sisan Alako ta fan fɛ, mɛlɛkɛw fana b’u seen don a la ni kisɛya ye an gɛrɛ fɛ (Kew. 8:26; Jira. 14:6). Bibulu b’a yira, ani Ala ka baarakɛlaw ka walew fana b’a yira ka gwɛ ko Jehova be dɛmɛ donna o baara la. An mana bɔ waajuli kama, an “cilen don Ala fɛ, o de kosɔn an bɛ kuma ni jɛlenya ye Krista la Ala ɲɛ kɔrɔ.” (2 Kɔr. 2:17). O ye ɲagali sababuba ye dɛ!
3 Delili kɔrɔtalen be n’an b’a fɛ ka to nisɔndiya la Ala ka baara la (Gal. 5:22). Komi an tɛ se ka Ala ka baara kɛ n’a m’a ka fanga di an ma, an mako b’a la k’a deli a ka hakili la. A b’a tɛgɛ labila k’a di mɔgɔw ma, minw b’a ɲini a fɛ (Luka 11:13; 2 Kɔr. 4:1, 7; Efes. 6:18-20). N’an be delili kɛ an ka waajulibaara koo la, o bena an dɛmɛ ka koow filɛ ni ɲɛɛ ɲuman ye ni mɔgɔw t’an laminɛ koɲuman. O bena an dɛmɛ an ka to ka waajuli kɛ ni kisɛya ye ani ɲagali ye.—Kew. 4:29-31; 5:40-42; 13:50-52.
4 I labɛn koɲuman: An be se ka dɔ fara an ka ɲagali kan waajuli baara la n’an b’an labɛn koɲuman (1 Piɛre 3:15). Waajibi tɛ an ka wagati caaman ta o kama. An mako be miniti damaninw dɔrɔn na ka ladiliw lajɛ walisa ka zurunali kuraw kofɔ mɔgɔw ye, wala ka gafe yiracogo lɔn. N’an b’a fɛ ka kuma ladon cogo bɛnnen na, an be se ka gafe Comment raisonner lajɛ, wala An ka Masaya Cidenyabaara tɛmɛnen dɔw. Weleweledala dɔw y’a kɔrɔsi ko nafa b’a la ka kuma yiracogo surun dɔ sɛbɛ ka mara u kun. Tuma kelen kelen, u b’u ka sɛbɛri lajɛ walisa k’u hakili jigi kuma fɔcogo la. O b’u dɛmɛ ka see sɔrɔ hakili ɲagamini kan, u hakili be sigi, ani u be waajuli kɛ ni kisɛya ye.
5 Ɲagali tɔnɔn ka ca. N’an ɲagalilen be, dɔ be fara an ka cira barika kan, ani a be mɔgɔw sama. Ɲagali be fanga di an ma walisa an ka muɲuli kɛ (Neh. 8:10; Heb. 12:2). Ka fara o bɛɛ kan, an ka nisɔndiya baara be nɔɔrɔ la Jehova kan. O kama, an ka “baara kɛ Jehova ye ni nisɔn diya ye.”—Zab. 100:2, A.B.U 1961.
[Study Questions]
1. Mun lo be ɲagaliba lase Jehova ka baarakɛlaw ma?
2. Cii min dira an ma, n’an b’an hakili to a dibaga la, cogo juman na o bena an dɛmɛ an ka ɲagali?
3. Cogo juman na delili bena an dɛmɛ an ka to nisɔndiya la Ala ka baara la?
4. N’an b’an labɛn koɲuman, cogo juman na o be dɔ fara an ka nisɔndiya kan waajuli la? O be se ka kɛ cogo nɔgɔman jumanw na?
5. Cogo juman na ɲagali be anw ani mɔgɔ wɛrɛw nafa?