Yala i b’i timinandiya kalangwɛ ani sɛbɛri la wa?

¹ Walisa ka lɔnniya tigitigi ɲini ka sɔrɔ Ala koo la ani a sagonata koo la, fɔɔ i ka kɛ mɔgɔ kalannen dɔɔni ye. Mɔgɔ caaman bɔra a kalama ko, n’i be se kalangwɛ la, o lo ye fɛɛrɛ ye min bena sira dayɛlɛ i ye walisa i k’i sendon bɛrɛbɛrɛ Jehova ka batoli koo la ( Jira. 1:3). Kalangwɛ ani sɛbɛri kalan min be kɛ kafow kɔnɔ, o ye mɔgɔ caaman dɛmɛ ka kalangwɛ ni sɛbɛri dege. Yɔrɔ minw na a labilanen be, kalan be kɛ ni kitabunin Appliquez-vous à la lecture et à l’écriture (ay-F) lo ye. O kitabunin sɔrɔla ka kɛ fɛɛrɛ barikaman ye min be mɔgɔ dɛmɛ ka kalangwɛ ni sɛbɛri dege ka lɔn wagati kunkurunin kɔnɔ. —1 Tim. 4:13; Mat. 24:45.

² Kalansow be labɛn cogo min na: O kitabunin be min fɔ kalansow labɛncogo kan, o filɛ nin ye: “I n’a fɔ a be kɛ Tewokarasi Cidenyabaara Lakɔli la cogo min na, waajulikɛla minw batisera ani o minw ma batise fɔlɔ, u tɔgɔw be se ka ta kalan nin kama. Ni diinan mɔgɔ kɔrɔw y’a latigɛ ka kalangwɛ ni sɛbɛri kalanso kelen wala dɔ wɛrɛw dayɛlɛ, u ka kan k’o baara kalifa karamɔgɔ setigi dɔ ma. . . . Balimacɛw lo ka kan ni kalan ɲɛmɔgɔya tali ye. Nka ni balimacɛ si tɛ se ka kalansoko ɲɛnabɔ, balimamuso setigi dɔ be se ka bila o baara la. . . . Diinan mɔgɔ kɔrɔw be se k’a ɲini balimamuso dɔ fɛ a ka kalanso dɔ ɲɛmɔgɔya ta: kalanso min ka kalandenw ye balimamusow ye wala mɔgɔ minw ma batise fɔlɔ. Komi balimamuso lo sigira balimacɛ dɔ nɔɔ na nin kalan kɛli la, a ka kan k’a kuun dabiri. Ni kalan tun be se ka kɛ siɲɛ fila wala siɲɛ saba lɔgɔkun o lɔgɔkun, kalandenw tun bena ɲɛtaga sɔrɔ joona. Kalansen dɔ mana ban, degelibaara kɛta ka kan ka di kalanden ma, ani karamɔgɔ bena o filiw ɲini kalansen kura daminɛ tuma. Kalan daminɛ wagati ka kan ka bɛn kalandenw fanba ma. Dɔw be kalansow tilan ka kɛ jɛkuludenninw ye ani ka kalansenw kalan sanni Kafo ka Kitabu Kalan ka daminɛ. Dɔ wɛrɛw be kalanso sigi seen kan gɛrɛ fɛ tuma min na Ala ka Mara Cidenyabaara Lakɔli be kɛra. O ɲɔgɔn na, kafo ka diinan mɔgɔ kɔrɔw jɛkulu lo be o kalanso kɛwagati n’a kɛyɔrɔ latigɛ.”

³ An Danbaga, Jehova Ala, y’an dan ka kalangwɛ ni sɛbɛri see cɛɲumanba di an ma. Nka an tɛ k’u ɲɛlɔn ni jijali ma kɛ. Mɔgɔ mana kalangwɛ ni sɛbɛri lɔn, sara nafamanba min be sɔrɔ o la, o ye ka se ka Ala ka Kuma faamuya ani ka cikan nin bato: “Fɔɔ i k’i kaan jigi k’a kalan suu fara tile kan.” —Josue 1:8, NW.