Ɲagali min be sɔrɔ kudayi cidenyabaara la

¹ Aw minw ye denmisɛnw ye, siga t’a la, aw miirila aw ka siniɲasigi koo la. Ntalenw 21:5 b’a fɔ an ye ko: “Minw timinan ka di baara la, a ka koo latigɛlenw be a kɛ fɛntigi ye, nka mɔgɔ minw bɛɛ be kɔrɔtɔ ka koo kɛ, koli na olu sɔrɔ.” I kɛtɔ ka miiri kosɔbɛ i ka laɲinitaw kan ɲɛnamaya kɔnɔ, i bena tɔnɔ sɔrɔ o la. I kɛtɔ ka labɛnw kɛ sini kama, i miiri k’i sendon kudayi cidenyabaara kɔnɔ. Mun na do?

² Baliku minw ye piyɔniye baara kɛ u denmisɛn tuma na, u dɔw ɲininga u ka fɛtaw la. U bɛɛ ka jaabili bena kɛ kelen ye: “O kɛra ne ka ɲɛnamaya wagati fisaman ye!” Balimacɛ dɔ be ɲagalila kudayi cidenyabaara la kabini a denmisɛnman fɔɔ k’a kɔrɔ. A sera k’a fɔ ko: “Wasaliba sababu lo ka segi ka miiri denmisɛn wagati kan, ani ka se k’a fɔ ko i ye ladili hakiliman nin sira tagama: ‘E kamalen, i ka ɲagali i ka kamalenya la ka i dusukun ɲɛnajɛ i ka kamalenya donw na.’ ” (Waaj. 12:1). Walisa i k’o ɲagali ɲɔgɔn sɔrɔ i ka denmisɛnya tuma la, waajibi lo ile n’i bangebagaw ka labɛn ɲuman kɛ sisan o kama.

³ Bangebagaw, a’ ye kudayi cidenyabaara dusu don aw deenw na: I n’a fɔ faa min b’a janto, Jehova be sira tigitigi yira aw la (Esayi 30:21). A kɛtɔ k’o kɛ ni kanuya ye, a be ɲɛyirali ɲuman di aw kerecɛn bangebagaw ma. Sanni i k’i denmisɛnw labila u k’u ɲɛna sira ta, u kolo ni hakilitigiya ye u ka sira bɛnnen ta walisa ka Jehova ka dugaw sɔrɔ. O cogo la, u mana kɔrɔbaya, i ka kololi bena u dɛmɛ ka “Koo ɲuman ni koo jugu faranfasi.” (Heb. 5:14). Balikuw b’a lɔn u yɛrɛma ko u tɛ se k’u bolo la u yɛrɛw ka miiriyaw kan. U ka kan k’u jigi la Jehova kan walisa k’u ka siraw latilen (Ntal. 3:5, 6). Denmisɛnw makoyaba b’a la ka tɛmɛ u bangebagaw kan k’u jigi la Jehova kan sabu u tɛ ɲɛnamaya ka koow lɔn bɛrɛbɛrɛ.

⁴ Bangebagaw, tuma min na a deenw kɛra kamalenw ni sunguruw ye, walima ka kɔn o wagati ɲɛ yɛrɛ, a’ ye gwɛ ka kuma n’u ye u ka laɲinitaw kan ka taga baarako fan fɛ. Lakɔli ladili dibagaw, ni karamɔgɔw ani lakɔli filankuruw bena a ɲini k’u hakili yɛlɛma ka sin bololafɛnw laɲinitaw ma ka kɛɲɛ ni duniɲa ka miiriya ye. I denmisɛnw dɛmɛ u k’a latigɛ ka kalan dɔw kɛ, minw bena u dege baara dɔ la. O cogo la u bena se k’u makoya fɛɛnw sɔrɔ n’u ma Masaya ka koow saraka (1 Tim. 6:6-11). Tuma caaman na, cɛmancɛ kalan kɛtɔ, deen mana kalan dɔ dege, o be se k’a dɛmɛ k’a yɛrɛ ladon koɲuman ani k’a sendon kudayi cidenyabaara la.

⁵ Dusu don kamalenw ni sunguruw la u ka furubaliya jogo magwɛn. Kɔfɛ, u mana a latigɛ ka furu, u bena see fisaman sɔrɔ ka furu kunkanbaarabaw dafa (A filɛ La Tour de Garde kɔnɔ: saan 1996, ɔkutɔburukalo tile 15nan ta, ɲɛɛ 14nan, dakun 21-23nan.) Kuma cogo ɲuman na n’i deen ye laɲinita ninw kan: piyɔniye, betɛli ani dan na piyɔniye baaraw, ani ka taga baara kɛ yɔrɔ min na makoyaba be yen. O baro kɛtɔ, a nege don denmisɛnw na u k’u ka ɲɛnamaya kɛ ka diya Jehova ye, ka mɔgɔ wɛrɛw nafa, ani ka ɲagali lase u yɛrɛw ma.

⁶ Denmisɛnw, a’ ye kudayi cidenyabaara bila ɲɛ: Kun t’a la ka aw yɛrɛw ɲininga piyɔniye baara bɔlen be min fɛ. Aw be se k’a kɛ ka filɛ n’aw be se ka piyɔniye kɔrɔsigi baara ta tuma dɔw la lakɔli tuma na ani vakansi wagati la. O la, aw bena a lɔn ko piyɔniye baara be mɔgɔ wasa tiɲɛn na! K’a ta sisan, ka taga a bila vakansi nata laban na, yala i be se ka kɛ piyɔniye kɔrɔsigi ye wa?

⁷ N’i ye balimacɛ kamalen ye, i ka miiri kosɔbɛ a la ka koow dafa walisa ka kɛ kɔrɔsigi ciden ye (1 Tim. 3:8-10, 12). Ka fara o kan, i sanda mana se, a latigɛ n’i tɛna sɛbɛ dafa k’a ɲini ka don betɛli la walima ka taga Cidenyabaara degeli Lakɔli la. N’i ye i sen don piyɔniye baara la, i bena kalan nafamanw sɔrɔ o la, i n’a fɔ: cogo min na i be se k’i ka ɲɛnamaya kɛ ka kɛɲɛ ni wagatijatilen ye, k’i labɛn cogo fisaman na, ka bɛn ni mɔgɔ wɛrɛ ye, ani ka kunkanbaaraw ta sɔbɛ la. O bɛɛ bena i dɛmɛ k’i yɛrɛ labɛn ka nɛɛmaba baara wɛrɛw sɔrɔ kɔfɛ.

⁸ Walisa ka see sɔrɔ kudayi cidenyabaara la, a gundo dɔ ye ka kisɛya Ala ka Mara koow la. Ciden Pol ye o miiriya dusu don mɔgɔ la. Nafa min be sɔrɔ o la, a y’o yira nin cogo la: “Aw bɛ fɛn o fɛn kɛ, a’ ye o kɛ ni aw dusukunw bɛɛ ye, i n’a fɔ aw b’a kɛ Matigi ye, . . . k’a dɔn ko aw na ciyɛn ta Matigi fɛ aw ka baraji ye.” (Kolos. 3:23, 24). Jehova ka aw sara, ani a ka ɲagaliba di aw ma kudayi cidenyabaara kɔnɔ!