“E be se ka kɛ piyɔniye ɲuman ye dɛ!”
1. Balimamuso dɔ be mun lo miiri a ka piyɔniye baara koo la?
1 Kathe B. Palm y’a fɔ ko: “Baara wɛrɛ tɛ yen min tun be se ka ne wasa nin cogo la wala min nafa ka bon ten Alako ta fan fɛ.” O balimamuso ye a yɛrɛ saraka ka piyɔniye baara kɛ saan caaman kɔnɔ. A ye seereya kɛ Cili jamana yɔrɔ bɛɛ la Ameriki worodugu yan fan fɛ. Kudayi baarakɛlaw wasanen lo u ka ɲɛnamaya kɔnɔ. N’a sɔrɔ mɔgɔ dɔ miirila o la ani k’a fɔ i ye ko: “E be se ka kɛ piyɔniye ɲuman ye dɛ!”
2. A’ y’a ɲɛfɔ fɛɛn min kama wasaliba be sɔrɔ Alako baaraw la.
2 Ɲɛnamaya kɛcogo min be mɔgɔ wasa: Yesu, an ka ɲɛyirabaga ye lafiya sɔbɛ sɔrɔ a Faa sago kɛli la ( Yuh. 4:34). O kama, Yesu y’a kɔnɔ gwɛ k’a fɔ a ka kalandenw ye ko wasali sɔbɛ be sɔrɔ n’an b’an seen don baaraw la minw ɲɛsinna Jehova batoli ma. An wasanen lo n’an bolo degunnen lo Jehova diyanye baaraw la. Ka fara o kan, komi an be an ka wagati, an ka fanga ani an ka bololafɛn caaman kɛ ka mɔgɔ wɛrɛw dɛmɛ, o be dɔ fara an ka ninsɔndiya kan.—Kɛw. 20:31, 35.
3. N’an be wagati caaman kɛ waajuli la, an be se ka ninsɔndiya juman sɔrɔ?
3 N’an be wagati caaman kɛ waajuli la, an ninsɔndiyalen bena sababu caaman fana sɔrɔ ka bibulukalanw daminɛ ani k’u kɛ. Hali n’a be komi lamɛnnikɛla caaman t’u mako don, n’an sera ka koo caaman lɔn waajuli kɛcogo la, an bena a ye ko mɔgɔw bele be sɔrɔ an ka kiinw kɔnɔ minw be sɔn tiɲɛn ma. Piyɔniyew mana baara kɛ saan kelen ɲɔgɔn, u be se ka piyɔniyew ka lakɔli kɛ. U be kalan nafamanba min sɔrɔ yen, u be se ka baara kɛ n’o ye (2 Tim. 2:15). N’an b’an timinandiya, n’a sɔrɔ an bena se ka tiɲɛn kisɛ dɔw dan, o minw bena deen kɔfɛ.—Waaj. 11:6.
4. Denmisɛn minw bena tila u ka kalan na yanni dɔɔni, u ka kan ka jatiminɛ kɛ mun lo kan?
4 Denmisɛnw: Komi i be tilara i ka kalan na kolɛzi la, yala i miirila kosɔbɛ i ka siniɲasigi koo la wa? Fɔɔ kana se sisan ma, i ka lakɔli baara lo tun be i ka wagati fanba ta. Nka, i ka kalan bannen kɔ, i bena mun lo kɛ sisan n’o wagati ye? Sanni i ka baloɲini baara kɛ kudayi, mun na i t’a lajɛ delili la k’a laɲini ka kɛ kudayi piyɔniye ye? I kɛtɔ ka mɔgɔ sifa caaman waaju, ka see sɔrɔ i ka gwɛlɛyaw kan, k’i yɛrɛ minɛcogo lɔn ani ka mɔgɔw kalancogo degi, i bena koo caaman lɔn. O lɔnniya bena i nafa i ka ɲɛnamaya kuru bɛɛ kɔnɔ.
5. Bangebagaw ni kafodenw be se ka mɔgɔ jija cogo di piyɔniye baara kama?
5 Bangebagaw, yala aw be aw ninyɔrɔ kɛra k’aw deenw ɲɛsin kudayi cidenya baara ma wa? Aw ka kuma ni aw ka ɲɛyirali ɲuman be se k’u dɛmɛ kosɔbɛ ka Masaya koow kɛ u ɲɛnako fɔlɔ ye (Mat. 6:33). Ray ka lise kalan bannen kɔ, a ye piyɔniye baara daminɛ. A hakili b’a la ko: “Ne bamuso b’a jati tuma bɛɛ ko piyɔniye baara b’a to mɔgɔ be wasa bɛrɛbɛrɛ a ka ɲɛnamaya kɔnɔ.” Kafo kɔnɔ, bɛɛ be se ka ɲɔgɔn jija piyɔniye baara kama u ka kuma ni u ka dɛmɛ barika la. Jose ka bɔ Ɛsipaɲi, ale y’a fɔ ko: “Ne ka kafomɔgɔw b’a jati ko piyɔniye baara ye baaraw bɛɛ la fisaman ye denmisɛnw fɛ. U be kuma diiman minw fɔ piyɔniye baara koo la ani u ka dɛmɛ nafaman y’a to a ma gwɛlɛya ne fɛ ka piyɔniye baara daminɛ.”
6. An be se ka mun lo kɛ ni piyɔniye baara nege t’an na fɔlɔ?
6 Baliw sago: Nka n’i ko, ‘A nege tɛ ne la ka kɛ piyɔniye ye,’ i be se ka mun lo kɛ. A daminɛ na, n’o miiriya nana i kɔnɔ, Jehova deli o koo la ani a fɔ a ye ko: ‘Ne t’a lɔn ni ne be se ka kɛ piyɔniye ye, nka min ka di i ye, ne b’a fɛ k’o lo kɛ.’ (Zab. 62:9; Ntal. 23:26). O kɔ, i k’a ka ɲɛminɛli ɲini a ka Kuma kɔnɔ ani a ka ɔriganisasiyɔn fɛ. Kudayi piyɔniye caaman ye piyɔniye baara “nɛnɛ” u kɛtɔ ka kɛ piyɔniye kɔrɔsigiw ye fɔlɔ. U ye ninsɔndiya min sɔrɔ o la, o lo y’u lasun ka taga ɲɛ, ka kɛ kudayi cidenya baarakɛlaw ye.—Zab. 34:9.
7. N’an be sigasiga ko an tɛ se ka lɛri 70 sɔrɔ kalo o kalo, an be se ka see sɔrɔ o miiriya kan cogo di?
7 N’i lanen t’a la ko i be se ka lɛri 70 sɔrɔ kalo o kalo do? E ni piyɔniye minw ka koow cogoya ye kelen ye, mun na i tɛ baro kɛ n’olu ye? (Ntal. 15:22) O kɔ, i ka porogramu hakɛ dɔw sɛbɛ k’a filɛ minw bena ɲɛ. I ka baara minw tɛ waajibiyako ye, n’i be wagati kunmabɔ olu la cidenya baara kama, i bena a ye ko piyɔniye baara ka nɔgɔ ka tɛmɛ i tun b’a miiri cogo min na fɔlɔ la.—Efes. 5:15, 16.
8. Mun na an ka kan ka to k’an ka koow cogoya sɛgɛsɛgɛ ka filɛ tuma dɔw la?
8 I k’i ka koow cogoya sɛgɛsɛgɛ ka filɛ tugun: Tuma caaman na mɔgɔ ka koow cogoya be yɛlɛma. A ka ɲi i ka to k’i ka koow cogoya sɛgɛsɛgɛ ka filɛ tuma dɔw la. Ɲɛyirali fɛ, yala i bena taga antɛrɛti la yanni dɔɔni wa? Randy, min tagara antɛrɛti la ka kɔn a saan daa ɲɛ, ale y’a fɔ ko: “O latigɛ ye ne dɛmɛ ka kudayi piyɔniye baara daminɛ ka fara n’ muso kan. O kɛra sababu ye an tagara sigi yɔrɔ min na waajulikɛlaw man ca. Ne ye duga caaman sɔrɔ o la a tɛ se ka fɔ. Nka, u bɛɛ la nafamanba ye dusukun ɲuman ye.”
9. Furuɲɔgɔnmaw ka kan ka jatiminɛ kɛ mun lo kan?
9 U ka koow sɛgɛsɛ-gɛnen kɔ koɲuman, furuɲɔgɔnma dɔw y’a ye ko waajibi tɛ u fila bɛɛ ka baloɲini baara dɔ kɛ tuma bɛɛ. Tiɲɛn lo, o be denbayamɔgɔw waajibiya k’u ka ɲɛnamaya kɛ cogo nɔgɔman na, nka kuun b’o saraka kɛli la. Yuhana ka muso tun be baloɲini baara kɛ tuma bɛɛ. A ma mɛɛn, a y’o dabila walisa ka dɔ fara a ka cidenya baara kan. Yuhana b’a fɔ ko: “K’a lɔn ko ne ka muso seen be Jehova ka baara la tile kɔnɔ, miiriya ɲuman tɛ tɛmɛ o kan.”
10. Mun lo be kerecɛnw lasun u k’a ɲini ka kɛ piyɔniye ye?
10 Kanuya ni limaniya yiracogo: Jehova ye waajuli baara kɛ baara kɔrɔtalenba ye an kelen-kelen bɛɛ be se ka min kɛ. Yanni dɔɔni, duniɲa nin bena halaki ani minw be Jehova tɔgɔ weele olu dɔrɔn lo bena kisi (Rom. 10:13). N’an be Jehova kanu n’an dusukun bɛɛ ye ani a ye min kɛ an ye n’an b’a waleɲuman lɔn o kosɔn, o bena an lasun k’a Dencɛ ka cikan bato o min ye ko an ka waajuli kɛ ni kisɛya ye (Mat. 28:19, 20; 1 Yuh. 5:3). Ka fara o kan, n’an lanen b’a la tiɲɛn na ko an be laban loonw lo la, o bena an lasun an k’an seko bɛɛ kɛ cidenya baara la yanni wagati ka tɛmɛ, sanni an k’a ɲini ka duniɲa diyabɔ a ɲɛ ma.—1 Kɔr. 7:29-31.
11. Ni mɔgɔ dɔ y’a fɔ an ye ko an be se ka kɛ piyɔniye ɲuman ye, an ka kan k’o jati cogo di?
11 Ka kɛ kudayi piyɔniye ye, o kɔrɔ tɛ ka ɔriganisasiyɔn dɔ ka labɛnw labato dɔrɔn, nka an b’a yira o sen fɛ ko an masirilen lo Ala la. O la do, ni mɔgɔ dɔ y’a fɔ i ye ko e be se ka kɛ piyɔniye ɲuman ye, i k’o jati tandoli ye. Ani, i ka miiri o koo la delili la k’a filɛ n’i be se k’i yɛrɛ fara mɔgɔw kan o baara la min be mɔgɔ wasa.
[Ɲɛɛ 4nan ka koorilen]
Bangebagaw, yala aw be aw ninyɔrɔ kɛra k’aw deenw ɲɛsin kudayi cidenya baara ma wa?
[Ɲɛɛ 5nan ka koorilen]
Jehova ye waajuli baara kɛ baara kɔrɔtalenba ye an kelen-kelen bɛɛ be se ka min kɛ.