Yala i b’a fɛ ka mɔgɔ wɛrɛw dɛmɛ wa?
1 Yesu y’a janto mɔgɔw la tiɲɛn na. Tuma min na kunatɔ dɔ tagara dɛmɛ deli a fɛ, Yesu y’a bolo mɔɔnɔbɔ ka maga o cɛɛ la, ani k’a fɔ ko:“Ne sɔnna. I ka saniya.” (Marka 1:40-42). An be se ka Yesu kɛcogo ladege cogo juman na ka mɔgɔ wɛrɛw dɛmɛ?
2 Makodon mɔgɔw: Kafo mɔgɔ kelen kelen bɛɛ be se ka dɔ kɛ walisa ka makodon mɔgɔw dɛmɛ u ka kɛ Jehova batobagaw ye. Mɔgɔ kuraw mana na lajɛnw na, u fo, ani a ɲini k’u lɔn. Fɛɛrɛw ɲini k’u jagwɛlɛya. U mana jaabiliw di, u fo. U be jijali minw kɛ ka Bibulu ka kalan sira tagama u ka ɲɛnamaya kɔnɔ, u fo o kosɔn. U dɛmɛ u k’a faamuya k’u be se ka teri sɔbɛw sɔrɔ kafo kɔnɔ.
3 An balima dannabagaw: “An balima dannabagaw” kɔni ka kan ni an ka dɛmɛ ye cogo caaman na (Gal. 6:10). U caaman ɲɛɛ gwannen be ni kɛnɛyakow ye. I kɛtɔ ka taga bɔ u ye, i ka jɛnɲɔgɔnya be se k’u nafa kosɔbɛ. Ani, n’a sɔrɔ, i be se ka dɛmɛ nɔgɔman dɔ lase u ma. I be taga a sɔrɔ dɔ wɛrɛw be gwɛlɛya wɛrɛw kunbɛnna u ka ɲɛnamaya kɔnɔ. A yira ko i b’i janto u la, i kɛtɔ ka wagati ta k’u lamɛn ani k’u sabati (1 Tes. 5:14). Diinan mɔgɔkɔrɔw fana mako be an ka dɛmɛ na walisa k’u ka kunkanbaara dafa (Heb. 13:17). N’an b’a yira ko ŋaniya b’an na ka dɛmɛ kɛ, an be se ka kɛ “jigi tugulaw” ye an balima dannabagaw fɛ.—Kol. 4:11.
4 An ka somɔgɔw: An ka kan k’an cɛsiri walisa ka Yesu ladege an ka denbaya fana kɔnɔ. Komi u b’u janto kosɔbɛ u deenw na, bangebagaw be timinandiya k’u “lamɔ ni Matigi ka kololi ni a ka laadili ye.” (Efes. 6:4). Denmisɛnw be se k’u ninyɔrɔ kɛ u kɛtɔ ka labɛn joona ni lɛri sera gwakalan ni kafo ka lajɛnw ni waajulibaara lajɛnw kama. Balikuw be se ka Yesu ka hinɛ ladege u kɛtɔ k’u bangebagaw dɛmɛ ni kanuya ye ka see sɔrɔ kɔrɔya ka gwɛlɛya kan. O cogow la, ani cogoya wɛrɛw la, an bɛɛ be se ka “Ala ɲɛsiran” sira tagama an ka soo kɔnɔ.—1 Tim. 5:4.
5 An kɛtɔ ka mɔgɔ wɛrɛw dɛmɛ Yesu cogo la, n’a sɔrɔ an be se ka gwɛlɛyaw nɔgɔya ani ka denbaya mɔgɔw ni kafo mɔgɔw magwɛrɛ ɲɔgɔn na. Ka tɛmɛ o bɛɛ kan, an be bonya la Jehova kan, ale min ye “makari Fa” ye. —2 Kɔr. 1:3.