Yala i be se k’i bolo labila ka mɔgɔ wɛrɛ dɛmɛ wa?

¹ Jehova be cogoya ɲini tuma bɛɛ walisa k’a ka baarakɛla kantigimanw dɛmɛ (2 Tilew Kib. 16:9; Esayi 41:10, 13). Cira Esayi y’a suma ni bɛgɛndɛndɛla ye min b’a janto bɛgɛnw na. A y’a sɛbɛ ko: “A na sagadenw minɛ a bolo la ka u ta a kɔnkɔn na. A na saga denbatigiw ɲɛminɛ nɛmɛnɛmɛ.” (Esayi 40:11). Jehova b’a janto mɔgɔw la ni kanuya ye cogo min na, an k’a filɛ cogo minw na an be se k’a ladegi o faan fɛ.

² An ka ɲɛsin mɔgɔ kuraw ma: An be se k’an bolo labila ka mɔgɔ kuraw dɛmɛ an kɛtɔ k’u weele u ka na jɛnɲɔgɔnya nafamanw kɛ n’an ye (Ntal. 13:20). Balima dɔ hakili b’a la cogo min na balimaw y’a dɛmɛ tuma min na a tun y’a daminɛ ka jɛn ni kafo ye. A y’a fɔ ko: “Tuma caaman na denbaya dɔ ye ne weele ka na gwakalan kɛ n’u ye. Komi ne tun be ɲɛtaga sɔrɔla, cɛɛ dɔ n’a muso tora ka ne weele tuma o tuma ka taga waajuli kɛ n’u ye tile kuru bɛɛ kɔnɔ. U tun ye piyɔniyew ye. An tun be baro nafamanbaw kɛ tuma bɛɛ Alakow kan.” A y’a fara a kan ko: “Sanni ne ka kɛ kerecɛn ye, ne tun delila ka bɔ ka taga ɲɛnagwɛ juman ni samedi suu fɛ. Nka ne tun be wagati min kɛ ni balimaw ye, o ye ne ka jɛnɲɔgɔnya nege wasa.” Komi kafo y’a mako don o balima la ni kanuya ye, o y’a dɛmɛ a ka kɔgɔ ani a ka sabati lanaya sira kan. Bi, a be baara kɛ i ko Betɛli ka denbayaden dɔ.—Kolos. 2:6, 7.

³ An ka dɔ fara ɲɔgɔnw barika kan: N’a sɔrɔ an be se k’a kɔrɔsi ko cogoya b’an bolo ka dɛmɛ lase an balimaw ma n’u be gwɛlɛya dɔw kunbɛnna. Yala i be se ka labɛn kɛ walisa weleweledala farikolo dɛsɛbagatɔ dɔ ka jɛn n’i ye ka seereya di telefɔni fɛ wa? Wala, i be se k’a weele a k’i bila sira ka taga bibulukalan dɔ kɛ. N’a sɔrɔ i be se ka na ni kalanden ye o balima ka soo yɛrɛ. Waajuli kɛtɔ, yala bangebaga dɔ mako b’a la u k’a dɛmɛ n’a denmisɛnw ye wa? Yala weleweledala dɔw mako be dɛmɛ la sabu u be sigasiga ka taga viziti kuraw kɛ wala k’u sen don waajuli faan dɔ la wa? N’an b’an mako don an balimaw la ni kanuya ye, o bena an lasun an ka cogoyaw ɲini k’u dɛmɛ.—Rom. 14:19.

⁴ Jehova b’a janto a sagokɛlaw la ni kanuya ye. An kɛtɔ k’ale ladegi, an be dɔ fara ɲɔgɔnw barika kan, an be ɲɔgɔnw dɛmɛ ka magwɛrɛ kafo la ni kanuya ye, ani an be nɔɔrɔ la an sankolola Faa kan.—Efes. 4:16.