Gwatigiw: A’ ye delinanko ɲumanw mara hakilimaya ta fan fɛ

¹ Saan caaman kɔnɔ, Daniɛl sigira Babilonɛ ka boli batoli n’a ka toliya cɛ. O bɛɛ n’a ta, bɛɛ tun b’a lɔn ko Daniɛl be baara kɛ Jehova ye “tuma bɛɛ” (Dan. 6:16, 20). A tun b’a ka hakilimaya mara cogo juman na? Bibulu ka lakalita b’a yira ko a ka delinanko tun ye ka tiɲɛn batoli koow dafa tuma bɛɛ. Ɲɛyirali fɛ, a tun delila ka delili kɛ siɲɛ saba tile kɔnɔ a ka sangaso boon kɔnɔ (Dan. 6:10). Siga t’a la, a tun ye labɛn kɛ hakilimaya koo wɛrɛw kama fana, i n’a fɔ Sariya kalangwɛ. O la, loon min na kɔrɔbɔli dɔ y’a niin bila farati la, Daniɛl tora kelen kan k’a masiri Jehova la. Ani, a kisira cogo kabakoman na.—Dan. 6:4-22.

² O cogo kelen na bi, an ka kan k’an jija ka ‘to an ɲɛɛ na ka an jija o la’ (Efes. 6:18). An sigilen be duniɲa min kɔnɔ, a be “Sitanɛ fanga kɔrɔ” (1 Yuh. 5:19). Bali ni kɔrɔbɔliw be se ka bali ka cun an kan, ani k’an ka lanaya kɔrɔbɔ. Tɔɔrɔba wagati la, Magog ka Gog bena kɛlɛ farinman wili Ala ka baarakɛlaw kama. A bena kɛ i ko sutarali si tɛ se ka sɔrɔ. O bena kɛ waajibi ye u fɛ k’u jigi bɛɛ la Jehova kan.—Ezek. 38:14-16.

³ “Fɛɛrɛ kɔrɔtalen dɔ ye ka deli ka Bibulu kalangwɛ kɛ, k’a kalan, ani ka baro kɛ a kan denbaya kɔnɔ sɔbɛ la.” O tun ye drame ka datigɛli kumaw ye tile saba lajɛnba la 1998 saan na. O drame kuun tun ko: “Denbayaw, a’ ye deli ka Bibulu kalangwɛ kɛ loon o loon!” Ka fara o kan, u ko: “Denbayaw mana timinandiya o delinanko la, ani u mana Bibulu kɛ kuma ɲɛnamaw ye, o delinanko be se ka nɔɔ kabakoman to u kan. A be dɔ fara an ka lɔnniya kan, an ka lanaya be barika sɔrɔ. Ani, a be ɲɛyiraliw di an ma, an be se ka tugu minw kɔ: fɔlɔfɔlɔ ka cɛɛw ni musow, minw ka lanaya tun ka dun, ani minw be se k’an lasun ka tiɲɛn lafasa.” An bena hakilimaya delinanko dɔw lajɛ. O kɛtɔ, gwatigiw ka ɲi ka fɛɛrɛ kelen wala fila ɲini walisa k’u ka denbaya labɛnsira fisaya hakilimaya ta fan fɛ.

⁴ Ala ka Kuma lajɛ loon o loon: “Tuma min na Ala ka Masaya bena kuntigiya kɛ n’a jugu si tɛ yen, ani Ala sago bena kɛ dugukolo kan i ko a be kɛ sankolo la cogo min na, hadamaden jugu si, hali sogo si tɛna ‘tɔɔrɔ wala tiɲɛni kɛ.’ (Esayi 11:9; Mat. 6:9, 10).” O kumaw tun be sɔrɔ gafenin Examinons les Écritures chaque jour—2001 kɔnɔ (sɛputanburukalo tile 11nan ka lakalita kɔnɔ). Nin hakilijigi kumaw tun ye dusu saalo kumaw ye dɛ! Gwatigiw, yala aw ka delinanko ye ka Bibulusen n’a lakalita lajɛ denbaya kɔnɔ loon o loon wa? A nafa ka bon kosɔbɛ. Ni a ka gwɛlɛ aw fɛ ka lajɛn sɔgɔma, aw be se k’a kɛ wagati wɛrɛ la tile kɔnɔ. Facɛman dɔ y’a fɔ ko: “An fɛ, a ka nɔgɔ ka tilera kalan kɛ surafana wagati la.”

⁵ N’i ka delinanko ye ka tilera kalan lajɛ denbaya kɔnɔ, i ka kan ni tandoli ye. N’a sɔrɔ aw be se ka tɛmɛ o fɛɛrɛ fɛ ka Bibulu yɔrɔ dɔ kalan o wagati kelen kɔnɔ. Tilera kalan ka vɛrise bɔra sapitiri min kɔnɔ, dɔw delila k’o sapitiri bɛɛ kalan. Dɔ wɛrɛw be Bibulu ka kitabu dɔ ɲɛnatɔmɔ, ani u be to k’o kalan. Aw ka denbaya kɛtɔ ka Bibulu kalan loon o loon, o bena a dɛmɛ ka Jehova ɲɛsiran ɲuman sɛnɛ, walisa a kana a kanbila. O fana bena barika don a ka ŋaniya la ka Jehova sago kɛ.—Dut. 17:18-20.

⁶ Dɔ bena fara aw ka Bibulu kalangwɛ ani tilera kalan nafa kan denbaya kɔnɔ, ni aw be se ka miniti damanin ta ka baro kɛ hakilinataw nafa nɔgɔman kan. Gafe École du ministère be ladili nin di a ɲɛɛ 60nan na: “Lɔgɔkun ka vɛrise kalantaw kɔnɔ . . . i be se ka dɔw ɲɛnatɔmɔ, ka baro kɛ u kɔrɔ kan, ani ka ɲiningali dɔw bila i n’a fɔ: ‘Ladili juman dira an ma yan? An be se ka baara kɛ n’o ye waajuli la cogo di? U be mun lo yira an na Jehova koo la, ani a ka koow kɛcogo koo la? Ani cogo juman na o be dɔ fara an ka waleɲumanlɔn kan Jehova koo la?’ ” Hakilimaya baro sifa ninw bena denbaya mɔgɔw bɛɛ dɛmɛ u ka “to ka Jehova sago faamu.”—Efes. 5:17, NW.

⁷ Gwakalan: Gwatigiw kɛtɔ ka gwakalan kɛ ni kantigiya ye lɔgɔkun o lɔgɔkun, u b’a yira u denmisɛnw na ko hakilimaya koow lo be na koo bɛɛ ɲɛ. Kamalen dɔ hakili b’a la ko: “Tuma dɔw la, baba bɔtɔ baara la, a tun sɛgɛnnen be kosɔbɛ fɔɔ a tun ka gwɛlɛ a fɛ ka to ɲɛɛ na. O bɛɛ n’a ta, kalan tun be kɛ. O timinandiya y’an dɛmɛ ka faamu ko sɔbɛko lo.” Denmisɛnw fana be se k’u seko kɛ walisa kalan ka kɛ. Deen kɔnɔntɔn denbaya dɔ tun delila ka kunu sɔgɔma 5 H tuma walisa k’u ka gwakalan kɛ, sabu wagati wɛrɛ labilanen tun tɛ yen.

⁸ Walisa nafa bɛrɛ ka sɔrɔ gwakalan na, fɔɔ gwatigiw ka ‘u janto mɔgɔw kalanni na’ (1 Tim. 4:16). Gafe École du ministère ɲɛɛ 32nan b’a fɔ ko: “Tiɲɛn na, an be se k’a fɔ ko: gwakalan bɛrɛbɛrɛ be daminɛ n’i denbaya yɛrɛ makow sɛgɛsɛgɛri ye. I ka denbaya mɔgɔw be ɲɛtaga sɔrɔla Alako ta fan fɛ cogo juman na? . . . N’i be waajuli kɛra n’i deenw ye, yala u be maloya k’u yɛrɛw yira i ko Jehova Seerew u filankuruw ɲɛ na wa? I ye labɛn min kɛ Bibulu kalangwɛ n’a kalan kama, yala o labɛn ka di u ye wa? Yala u be Jehova ka sira tara ka kɛ u yɛrɛw ka sira ye wa? Ile min ye gwatigi ye, i kɛtɔ ka kɔrɔsili kɛ koɲuman, o bena i dɛmɛ k’a lɔn i ka kan ka min kɛ walisa ka hakilimaya jogow sigi, ani k’u sabati i ka gwamɔgɔ kelen kelen dusu la.”

⁹ Kafo ka lajɛnw: Lɔgɔkun o lɔgɔkun, i ka delinanko sɔbɛ ka kan ka kɛ ka lajɛnw labɛn, ani ka taga u la (Heb. 10:24, 25). Tuma dɔw la, i bena se ka lajɛn dɔw labɛn n’i denbaya ye. Sanni i ka lajɛnw labɛnni bila ka suma, yala i be se ka kɔn k’i yɛrɛ labɛn joona wa? O delinanko ɲuman sen fɛ, i ka lajɛnw labɛncogo bena fisaya, ani i bena nafa fisaman sɔrɔ u la.—Ntal. 21:5.

¹⁰ Kɛcogo ɲuman ni timinandiya b’a yira k’i ka delinankow ka ɲi hakilimaya ta fan fɛ. Nka ni koow cogoya b’i bali ka lajɛnw bɛɛ labɛn do? Gafe École du ministère be ladili nin di a ɲɛɛ 31nan na: “Kana a ɲini ka kalan kɔnɔnakow filɛfilɛ sanfɛ walisa ka se k’u bɛɛ lajɛ joona joona. Wala, min ka jugu, kana a fɔ ko wagati tɛ yen minkɛ, i tɛna foyi kalan yɛrɛ. Nka, i be se ka yɔrɔ hakɛ min kalan koɲuman, o latigɛ, ani o lajɛ bɛrɛbɛrɛ. O kɛ lɔgɔkun o lɔgɔkun. Ani kɔfɛ, i jija k’a daminɛ ka lajɛn wɛrɛw fana labɛn.”

¹¹ Denbayaw mana kɔn ka na lajɛnw na, o b’u dɛmɛ k’u miiriyaw labɛn walisa ka Jehova tando, ani ka nafa sɔrɔ a ka kalan na. Yala o ye i denbaya ka delinanko ye wa? O kɔrɔ ko koow ka ɲi ka labɛn koɲuman, ani bɛɛ ka ɲi ka bolo di ɲɔgɔnw ma ka koow kɛ. N’i y’a kɔrɔsi ko lajɛn loonw wulafɛ, i denbaya mɔgɔw be bolibolila, ani u degunnen be, yala aw delinankow tɛ se ka yɛlɛma wa? Koow dɔw tɛ se ka kɔn ka labɛn wa? Ni denbaya mɔgɔ dɔ ka baara kɛta ka ca kojugu, yala tɔɔw be se k’a dɛmɛ wa? Yala dɔ bena bɔ aw ka boliboli la ni bɛɛ y’a yɛrɛ labɛn walisa aw ka kɔn dɔɔni ka taga lajɛn na wa? Koow mana labɛn sɔbɛ la, o be na ni hɛɛrɛ ye denbaya kɔnɔ, ani kafo kɔnɔ.—1 Kɔr. 14:33, 40.

¹² Waajulibaara: Ka wagati tigitigi latigɛ waajuli baara kama, o ye delinanko ɲuman wɛrɛ ye hakilimaya ta fan fɛ. Kamalen dɔ, min tɔgɔ ko Giyomu (Guillaume), hakili b’a la ko: “Ne ka denbaya kɔnɔ, samedi sɔgɔma tun sinna ka labila waajuli kama. O tun ka ɲi ne ma, sabu ne tun mana bɔ caaman waajuli kama, ne tun b’a nɔɔ ɲuman ye n yɛrɛ kan. Ani, o baara tun be diya ne ye kosɔbɛ.” Denmisɛn minw mɔnna seerew ka denbayaw kɔnɔ, u caaman fana y’a kɔrɔsi ko komi wagati tigitigi tun latigɛra waajuli kama lɔgɔkun o lɔgɔkun, o y’u dɛmɛ ka ɲɛtaga sɔrɔ kerecɛnya baara la.

¹³ I denbaya be wagati min kɛ waajuli la, delinanko ɲuman be se k’a to o wagati be diya, ani a be den fana. O be se ka kɛ cogo juman na? Saan1999, zuwekalo tile fɔlɔ ka La Tour de Garde ɲɛɛ 21nan tun ye ladili nin di: “Gwakalan kɛtɔ, yala aw delila ka wagati dɔ ta ka gwamɔgɔw dɛmɛ u k’u labɛn waajuli kama lɔgɔkun kɔnɔ wa? N’a b’o kɛ, nafaba be se ka sɔrɔ a la (2 Tim. 2:15). A be se k’u dɛmɛ ka waajuli kɛ bɛrɛbɛrɛ. Ani, u ka waajuli be se ka den. Tuma kelen kelen, aw be se ka gwakalan wagati bɛɛ ta ka aw labɛn waajuli kama. Nka tuma caaman na, aw be se ka baro surunw kɛ waajuli faan dɔw kan gwakalan laban na, wala wagati wɛrɛ lɔgɔkun kɔnɔ.” Yala aw ka denbaya y’o kɛ k’a filɛ wa?

¹⁴ A’ ye to ka ɲɛtaga sɔrɔ: koow ka ɲi faan minw na i ka denbaya kɔnɔ, yala i y’o kɔrɔsi wa? U fo, ani i jija ka dɔ fara o faanw kan. N’i y’a ye k’i denbaya ka ɲi ka faan caaman fisaya, faan kelen wala fila ɲɛnatɔmɔ. A’ ye baara kɛ olu kan fɔlɔ. N’olu nana kɛ aw ka hakilimaya delinanko ye, a’ ye kelen wala fila wɛrɛw ta. Koow filɛcogo nɔgɔya, ani a dama kɛɲɛ (Filip. 4:4, 5). Hakilimaya delinanko ɲuman tɛ se ka sigi i ka denbaya kɔnɔ n’i ma jijali sɔbɛ kɛ. Nka, nafa b’a la k’o kɛ, sabu Jehova b’an hakili sigi ko: “Min bɛ a ka sira labɛn, ne na Ala ka kisili jira o la.”—Zab. 50:23.