I k’i degi delinanko ɲumanw na, ani i ka baraji caaman sɔrɔ o la
1 A daminɛ na, tuma min na i kɛra kerecɛn ye, i tun ye i jija sɔbɛ la ka delinanko ɲumanw degi Jehova batoli la i n’a fɔ: Bibulu kalan, kerecɛnya lajɛnw, cidenya baara, ani delili. Jehova ye i ka jijali kɛli duga minkɛ, i yiriwala Alako ta fan fɛ. Kabini i batisera, n’a sɔrɔ saan damaninw tɛmɛna. I tun ye delinanko ɲuman minw degi Alako ta fan fɛ a daminɛ na, yala i b’u mara hali bi wa?
2 I k’i ka delinankow sɛgɛsɛgɛ ka filɛ: Yala i delinanko ye ka Ala ka Kuma yɔrɔ dɔ kalan loon o loon wa? N’an b’o kɛ, a baraji ka boon dɛ! (Josue 1:8; Zab. 1:2, 3). Israɛl kɔrɔ tuma na, masacɛ kelen-kelen bɛɛ tun ka kan k’a tɔgɔla sariya kitabu kalan “a si tilew bɛɛ la.” Nafa juman tun be o la do? A dusukun tun bena degi majigilenya la, ani a tun bena degi Jehova ɲɛsiran na. O la, a tun tɛna i mabɔ Jehova ka cifɔlenw na (Dut. 17:18-20). O cogo kelen na, loon o loon ka Bibulu kalan b’an dɛmɛ an ka kɛ jalakibali jɛlenw ye duniɲa juguman tolinen kɔnɔ. A fana b’an dɛmɛ an k’an yɛrɛ labɛn ka dafa cidenya baara kama.—Fil. 2:15; 2 Tim. 3:17.
3 Yesu delinanko tun ye ka taga Alabatoso kɔnɔ yɔrɔ min na baro tun be kɛ Ala ka Kuma kan (Luka 4:16). Siga t’a la o ye fanga don a la walisa a ka kɔrɔbɔliw muɲu, minw tun bena a sɔrɔ sɔɔni. O cogo kelen na, Alakow kalan min be di kafo ka lajɛnw na, ani “ɲɔgɔn jija” kuma sanimanw be fanga don an na fana (Rom. 1:12). An kɛtɔ ka lajɛn kɛ n’an balimaw ye, o b’an dɛmɛ ka laban loon ninw ka gwɛlɛyaw muɲu (Heb. 10:24, 25). Yala aw delinanko lo ka taga lajɛnw bɛɛ la hali bi wa?
4 Bibulu ka lakalita b’a fɔ an ye ko cidenw tun be kibaro duman fɔ mɔgɔw ye “don o don, ka u to Alabatosoba kɔnɔ ani mɔgɔw ka duw kɔnɔ.” (Kɛw. 5:42). Hali ni see t’an ye ka waajuli kɛ loon o loon, yala an tɛ se k’o kɛ an delinanko ye k’an seen don cidenya baara faan dɔ la lɔgɔkun o lɔgɔkun wa? N’an b’o kɛ, an bena deli koɲuman baarakɛcogo la ni Ala ka Kuma ye. Ani, n’a sɔrɔ an bena jagwɛlɛya sɔrɔ wagati min na an be mɔgɔw kalanna tiɲɛn koo la Bibulu kɔnɔ.
5 Cira Daniɛl ye baraji caaman sɔrɔ a kɛtɔ ka baara kɛ Jehova ye “tuma bɛɛ” a sii tilew bɛɛ la. Ɲɛyirali fɛ, a delinanko tun ye ka Jehova deli tuma o tuma (Dan. 6:10, 16, 20). O cogo kelen na, n’an be ɲɛsin Jehova ma tuma o tuma k’a deli n’an dusukun bɛɛ ye, a bena hakili senu di an ma fana (Luka 11:9-13). Ka fara o kan, a bena an jaabi a kɛtɔ ka magwɛrɛ an na. Ani, a bena an dɛmɛ ka jɛnɲɔgɔnya teriman kɛ ni ale ye (Zab. 25:14; Yak. 4:8). Nin ye barajiba ye dɛ! O kama, an k’an cɛsiri ka kɛ ni delinanko ɲumanw ye Alako ta fan fɛ tuma o tuma, ani an ka baraji caaman sɔrɔ Jehova fɛ.
[Study Questions]
1. Mun na nafa b’a la k’an ka delinankow sɛgɛsɛgɛ ka filɛ Alako ta fan fɛ?
2. An be nafa juman sɔrɔ loon o loon ka Bibulu kalan na?
3. An be baraji jumanw sɔrɔ a la n’an be taga lajɛnw na tuma o tuma?
4. Nafa juman b’a la n’an be waajuli kɛ lɔgɔkun o lɔgɔkun?
5. Mun na a kɔrɔtalen be kosɔbɛ ka Jehova deli tuma o tuma?