An ka mɔgɔw dɛmɛ ka Ala tɔgɔ lɔn
1 Tuma min na i ye Ala tɔgɔ lɔn siɲɛ fɔlɔ la, o ye mun kɛ i la? Mɔgɔ caaman y’a laminɛ i ko muso dɔ, min y’a fɔ ko: “Tuma min na ne ye Ala tɔgɔ ye Bibulu kɔnɔ siɲɛ fɔlɔ la, ne kasira. Ne dusu diyara kosɔbɛ k’a lɔn ko tiɲɛn na, ne be se ka Ala tɔgɔgwɛ lɔn ani ka baara kɛ n’a ye.” Ale fɛ, Ala tɔgɔ lɔnni kɛra sababuba ye: o y’a dɛmɛ ka Jehova jati i ko mɔgɔ yɛrɛ, ani ka jɛnɲɔgɔnya sigi n’a ye.
2 Mun na an ka kan k’a kofɔ mɔgɔw ye? Ka Ala tɔgɔ lɔn, o kɔrɔ ko k’a jogow n’a sagonataw n’a kɛwalew lɔn. Kisili fana be sɔrɔ Ala tɔgɔ lɔnni sababu fɛ. Ciden Pol y’a sɛbɛ ko: “Mɔgɔ o mɔgɔ mana Matigi [ Jehova, NW ] tɔgɔ wele, o na kisi.” Nka Pol ye mɔgɔ hakili jagabɔ ko “u na a tɔgɔ wele cogo di” n’u m’a ɲini ka Jehova lɔn fɔlɔ, ani ka lanaya la a kan? O kama, kerecɛnw ka kan ka kɔrɔtɔ ka mɔgɔw dɛmɛ ka Ala tɔgɔ n’a kɔrɔ bɛɛ lɔn (Rom. 10:13, 14). Nka an ka kan ka Ala tɔgɔ kofɔ mɔgɔw ye kuun wɛrɛ kama, min kɔrɔtalen be ka tɛmɛ kuun tɔɔw kan.
3 Saan 1920 tuma na, Bibulu sababu fɛ, Ala ka jama ye nin koo nin faamuya, koo min ɲɛsinna duniɲa kuru bɛɛ ma: joo ka kan ka di Jehova ka masabaya ma, ani a tɔgɔ ka kan ka saniya. Mafiɲɛyali kɛra Jehova tɔgɔ la. Sanni Jehova ka mɔgɔ juguw halaki walisa k’o mafiɲɛyali bɔ yen, fɔɔ dugukolo kan mɔgɔw bɛɛ ka tiɲɛn lɔn ale koo la (Esayi 12:4, 5; Ezek. 38:23). O la, an ka waajuli kuun fɔlɔ ye ka Jehova tando kɛnɛ kan, ani k’a tɔgɔ saniya hadamadenw bɛɛ ɲɛ na (Heb. 13:15). N’an be Ala n’an mɔgɔɲɔgɔnw kanu, o bena an lasun k’o baara kɛ a ɲɛ ma.
4 “A tɔgɔla siya”: Saan 1931 na, an ye Jehova Seerew tɔgɔ ta (Esayi 43:10). Kabini o tuma, Ala ka jama ye mɔgɔ caamanba dɛmɛ ka Ala tɔgɔ lɔn fɔɔ gafe Prédicateurs ɲɛɛ 124nan y’a fɔ ko: “Dugukolo bɛɛ kan, mɔgɔ o mɔgɔ be Jehova tɔgɔ kofɔ ni diyanye ye, mɔgɔw ka teli k’a fɔ k’o tigi ye Jehova Seere dɔ ye.” Yala mɔgɔw b’i faranfasi ka lɔn o cogo la wa? N’an be Jehova ka ɲumanya waleɲuman lɔn, o ka kan k’an lasun ka ‘a tɔgɔ tanu’: an bena kuma a koo la wagati bɛnnen bɛɛ la.—Zab. 20:8; 145:1, 2, 7.
5 Komi an ye a “tɔgɔla siya” ye, an ka kan k’a ka sariyaw bato (Kew. 15:14; 2 Tim. 2:19, NW ). Tuma caaman na, mɔgɔw be koo fɔlɔ min kɔrɔsi Jehova Seerew koo la, o ye u ka tagamacogo ɲuman lo ye (1 Piɛre 2:12). Abada, an t’a fɛ k’a tɔgɔ tiɲɛ, an kɛtɔ k’a ka sariyaw tigɛ, wala k’a ka batoli bila yɔrɔ filanan na an ka ɲɛnamayaw kɔnɔ (Lev. 22:31, 32; Mal. 1:6-8, 12-14). Nka, an k’a yira an ka ɲɛnamaya kɛcogo fɛ ko nɛɛma min dira an ma ka Ala tɔgɔ ta, an b’o waleɲuman lɔn kosɔbɛ.
6 Bi, an b’a ye ko Jehova ka kuma ninw be dafara: “Ka bɔ tilebɔ fan fɛ fo ka taa bila tilebin fan fɛ, ne tɔgɔ ka bon siyaw cɛma.” (Mal. 1:11). An ka to ka tiɲɛn kofɔ Jehova koo la, ani “ka a tɔgɔ senuman tanu tuma bɛɛ badaa-badaa.”—Zab. 145:21.
[Study Questions]
1. Ala tɔgɔgwɛ lɔnni be se ka mun lo kɛ mɔgɔw la?
2. Mun na kɔrɔtɔ b’a la an ka mɔgɔ wɛrɛw kalan Jehova koo la?
3. An ka waajuli kuun fɔlɔ ye juman ye?
4. Mɔgɔw sera ka Jehova Seerew faranfasi Ala tɔgɔ fɛ cogo di?
5. Komi Ala tɔgɔ b’an kan, o be nɔɔ juman to an tagamacogo kan?
6. An be se ka nɛɛma juman diya bɔ sisan, ani fɔɔ abada?