Ele be Jehova tɔgɔ jati cogo di?

1-2. An b’a lɔn cogo di ko Jehova tɔgɔ kɔrɔtanin lo Yezu fɛ?

JEHOVA tɔgɔ kɔrɔtanin lo Yezu fɛ ka tɛmɛ fɛɛn bɛɛ kan. A y’a Faa tɔgɔ lafasa cogo min na, o ɲɔgɔn tɛ yen. I ko an y’a ye cogo min na barokun tɛmɛnin na, Yezu sɔnna saya ma walisa k’a yira ko Jehova ka senu ani ko a ka kokɛcogow bɛɛ tilennin lo (Mariki 14:36; Eburuw 10:7-9). A labilanin lo ka kuntigiya segi Jehova ma a ka saan waa kelen mara laban na, sabu a b’a fɛ nɔɔrɔ bɛɛ ka la Jehova lo kan (1 Kor. 15:26-28). Yezu ye min bɛɛ kɛ Jehova tɔgɔ kosɔn, o b’a yira ka gwɛ ko a be Jehova kanu kosɔbɛ.

² Yezu nana dugukolo kan a Faa tɔgɔ la (Zan 5:43; 12:13). A y’a Faa tɔgɔ yira a ka kalandenw na (Zan 17:6, 26). A ye mɔgɔw kalan ani ka kabakow kɛ Jehova tɔgɔ la (Zan 10:25). Ka fara o kan, Yezu ye a Faa deli a k’a janto ale ka kalandenw na a “tɔgɔ kosɔn.” (Zan 17:11). A gwɛnin lo ko Ala tɔgɔ tun kɔrɔtanin lo Yezu fɛ ka tɛmɛ fɛɛn bɛɛ kan. O la, mɔgɔ be se k’a fɔ cogo di ko ale ye kerecɛn ye k’a sɔrɔ a tɛ Jehova tɔgɔ lɔn ani a tɛ o tɔgɔ weele?

3. An bena mun lo ye barokun nin na?

³ Komi an ye kerecɛn sɔbɛw ye, an be Yezu ladegi. An b’o kɛ an kɛtɔ k’a yira ko Ala tɔgɔ koo ka di an ye ani ko an be bonya la a tɔgɔ kan (1 Piyɛri 2:21). Minw be Ala ka Masaya “kibaru diman” fɔ, Jehova y’a tɔgɔ la olu kan. Mun na do? An bena o le ye barokun nin na (Mat. 24:14). An bena a ye fana an kelen kelen bɛɛ ka ɲi ka Jehova tɔgɔ jati cogo min na.

“ALA YE SIYA DƆ WOLOMA . . . K’O KƐ A TƆGƆLA TA YE”

4. a) Yanni Yezu ka kɔsegi sankolo la, a ye cii juman lo di a ka kalandenw ma? b) An bena ɲiningali juman lo jaabi?

⁴ Yanni Yezu ka kɔsegi sankolo la, dɔɔni ka kɔn o ɲɛ, a y’a fɔ a ka kalandenw ye ko: “Ni Ni Senu jiginna ka na aw kan tuma min na, aw na kɛ ne seerew ye, Jerusalɛm ani Jude jamana bɛɛ la ani Samari jamana, fo ka taa se dugukolo dan bɛɛ ma.” (Kɛw. 1:8, Bible senuma). O la, kibaro diiman tun bena fɔ duniɲa yɔrɔ bɛɛ la. A tun tɛna dan Israɛl jamana dɔrɔn na. Siyaw bɛɛ mɔgɔw tun bena sababu sɔrɔ ka kɛ Yezu ka kalandenw ye (Mat. 28:19, 20). A kɔrɔsi ko Yezu y’a fɔ fana ko: “Aw na kɛ ne seerew ye.” Yala Yezu ka kalandenw tun bena kɛ ale seerew dɔrɔn lo ye wa? Wala u tun ka ɲi fana ka Jehova tɔgɔ lɔn? Koo minw lakalila Kɛwaliw sapitiri 15nan na, o b’an dɛmɛ k’o ɲiningali jaabi.

5. Cogo juman na cidenw ni Zeruzalɛmu diinan mɔgɔkɔrɔw y’a yira ko mɔgɔ bɛɛ ka ɲi ka Jehova tɔgɔ lɔn? (jaa lajɛ fana).

⁵ Saan 49 Krista tile la, cidenw ni Zeruzalɛmu diinan mɔgɔkɔrɔw ye ɲɔgɔn lajɛn. O lajɛn kuun tun ye k’a filɛ ni siya wɛrɛ mɔgɔw ka ɲi ka kɛnɛkɛnɛ ka sɔrɔ ka kɛ kerecɛnw ye. O lajɛn kuncɛ tuma na, Yezu dɔgɔcɛ Zaki y’a fɔ ko: “Ala y’a janto siya wɛrɛw la cogo min na, [Piyɛri] y’o ɲafɔ sisan. Ala ye siya dɔ woloma u cɛma k’o kɛ a tɔgɔla ta ye.” Zaki tun be kumana jɔn tɔgɔ lo koo la? A segira kira Amɔsi ka kumaw kan ko: “O la, mɔgɔ tɔw bena ne Matigi [Jehova] yɔrɔ ɲini, ne tɔgɔ lara siyaw minw bɛɛ kan. Ne Matigi . . . le ko ten.” (Kɛw. 15:14-18). Kalanden kuraw tun ka ɲi ka Jehova lɔn. Nga o dɔrɔn tɛ, Jehova tɔgɔ tun bena la u kan. O kɔrɔ ko u bena mɔgɔ tɔɔw dɛmɛ ka Ala tɔgɔ lɔn, ani mɔgɔw bena u lɔn o tɔgɔ lo sababu la.

6-7. a) Mun na Yezu nana dugukolo kan? b) Kuun kɔrɔtaninba juman lo kosɔn a nana dugukolo kan?

⁶ Yezu tɔgɔ kɔrɔ ko: “Jehova ye kisili ye.” Tiɲɛn na, mɔgɔ minw limaniyanin lo Jehova la, a be tɛmɛ Yezu lo fɛ k’u kisi. Yezu nana dugukolo kan walisa k’a niin saraka adamadenw kosɔn (Mat. 20:28). A ye kunmabɔsara di minkɛ, a ye sababu di adamadenw ma u ka kisi ani ka ɲɛnamaya banbali sɔrɔ.—Zan 3:16.

⁷ Nga mun na adamadenw mako tun be kisili la? Koo min kɛra Edɛn nankɔ kɔnɔ, o lo y’a to u mako tun be kisili la. I ko an y’a ye barokun tɛmɛnin na cogo min na, an bangebaga fɔlɔw Adama ni Awa murutira Jehova ma ani u bɔnɛna ɲɛnamaya banbali la (Zɛnɛzi 3:6, 24). Nga koo wɛrɛ tun be yen min kɔrɔtanin lo kosɔbɛ ka tɛmɛ adamaden jurumutɔw ka kisili kan. Sutana ye Jehova tɔgɔ tiɲɛ (Zɛnɛzi 3:4, 5). O kama, Adama ni Awa deenw ka kisili ɲɛsinna koo kɔrɔtaninba dɔ ma. O ye Jehova tɔgɔ saniyali koo ye. Yezu ye Jehova ka lasigiden ye ani Jehova tɔgɔ b’a kan minkɛ, a ye Jehova tɔgɔ saniya cogo kɛrɛnkɛrɛnnin na.

8. Mɔgɔ minw bɛɛ tun bena la Yezu la, olu tun ka ɲi ka sɔn mun le ma?

⁸ Mɔgɔ minw bɛɛ tun bena la Yezu la, u mana kɛ Yahutuw wala siya wɛrɛ mɔgɔw ye, u tun ka ɲi ka sɔn a ma ko Yezu Faa Jehova sababu lo la u bena kisili sɔrɔ (Zan 17:3). Ka fara o kan, i ko Yezu, Jehova tɔgɔ tun bena la u kan. U tun ka ɲi k’a lɔn ko a kɔrɔtanin lo kosɔbɛ Jehova tɔgɔ ka saniya. U ka kisili tun bena bɔ o lo la (Kɛw. 2:21, 22). O kama, Yezu ka kalanden kantigiw bɛɛ tun ka ɲi ka Jehova ni Yezu lɔn. A tɛ bari an na k’a ye ko Yezu ka delili min kofɔra Zan sapitiri 17nan na, a y’o kuncɛ ko: “Ne y’i koo fɔ u ye, ani n bena tila k’a fɔ u ye tugu, janko i ye ne kanu cogo min na, o kanuya ɲɔgɔn ka don u dusu la, ani ne fana ka kɛ olu fɛ.”—Zan 17:26.

“NE SEERE YE AW LE YE”

9. An be se k’a yira cogo juman na ko Jehova tɔgɔ kɔrɔtanin lo an fɛ?

⁹ Yezu ka kalanden sɔbɛw bɛɛ ka ɲi k’a ɲini ka Jehova tɔgɔ saniya (Mat. 6:9, 10). U ka ɲi k’a jati k’o tɔgɔ kɔrɔtanin lo ka tɛmɛ tɔgɔw bɛɛ kan ani k’o yira u ka kɛwalew fɛ. Nga an ka ɲi ka mun lo kɛ walisa ka Jehova tɔgɔ saniya ani k’a yira ko Sutana ye min fɔ Jehova koo la, o ye ngalon lo ye?

10. Kitiko juman lo lakalila Ezayi sapitiri 42 ka taga se 44 kɔnɔ? (Ezayi 43:9; 44:7-9; jaa lajɛ fana).

¹⁰ Ezayi sapitiri 42 ka taga se 44 b’a yira an ka ɲi ka min kɛ walisa ka Jehova tɔgɔ saniya. O sapitiriw kɔnɔ, mɔgɔ minw tɛ Jehova bato, Jehova y’a ɲini u fɛ u ka daliluw di minw b’a yira ko u ka alaw ye tiɲɛn Ala ye. I ko a be kɛ cogo min na kititigɛso la, Jehova ko u ka na n’u ka seerew ye walisa k’o yira. Nga, mɔgɔ si ma se k’o kɛ!—Ezayi 43:9; 44:7-9 kalan.

11. Jehova ye mun lo fɔ a sagokɛlaw ye Ezayi 43:10-12 kɔnɔ?

¹¹ Ezayi 43:10-12 kalan. Jehova y’a fɔ a sagokɛlaw koo la ko: “Ne seere ye aw le ye . . . Ne le ye Ala ye.” Jehova y’u ɲininga ko: “Ala dɔ wɛrɛ be yen ne kɔ wa?” (Ezayi 44:8). Nɛɛma dira an ma k’o ɲiningali jaabi. An ka ɲi k’a yira an ka kumaw n’an ka kɛwalew fɛ ko Jehova kelenpe lo ye tiɲɛn Ala ye. A tɔgɔ kɔrɔtanin lo ka tɛmɛ tɔgɔw bɛɛ kan. Sutana mana koow gwɛlɛya an ma cogo o cogo, an b’a yira an ka ɲɛnamaya kɛcogo fɛ ko an be Jehova kanu sɔbɛ la ani ko an be kantigiya kɛra ale lo ye. O be sababu an ma ka Jehova tɔgɔ saniya.

12. Kiraya kuma min tun fɔra Ezayi 40:3, 5 kɔnɔ, o dafara cogo di?

¹² N’an be Jehova tɔgɔ lafasa, an be Yezu Krista lo ladegira. Kira Ezayi tun kɔnna k’a fɔ ko mɔgɔ dɔ tun bena “sira dilan [wala labɛn] Masaba ye.” (Ezayi 40:3). O kiraya kuma dafara cogo di? Zan Batizelikɛla ye sira labɛn Yezu ye, ale min nana Jehova tɔgɔ la ani ka kuma Jehova tɔgɔ la (Mat. 3:3; Mariki 1:2-4; Luka 3:3-6). Kira Ezayi y’a fɔ fana ko: “Masaba ka nɔɔrɔ bena yira kɛnɛ kan.” (Ezayi 40:5). O dafara cogo di? Tuma min na Yezu tun be dugukolo kan, a ye Jehova ladegi cogo dafanin na. O kama, a kɛra komi Jehova yɛrɛ lo tun nana dugukolo kan.—Zan 12:45.

13. An be se ka Yezu ladegi cogo di?

¹³ I ko Yezu, an fana ye Jehova Seerew ye. Jehova tɔgɔ lara an kan ani an b’a ka koo kabakomanw lakali bɛɛ ye. Nga, ka se k’o kɛ koɲuman, an ka ɲi k’a fɔ mɔgɔw ye Yezu ye koo minw bɛɛ kɛ walisa ka Jehova tɔgɔ saniya (Kɛw. 1:8). Mɔgɔ si ma seereya kɛ Jehova koo la cogo ɲuman na i ko Yezu ani an fana b’a ladegi o la (Yir. 1:5). An b’a yira cogo wɛrɛ juman na ko Jehova tɔgɔ kɔrɔtanin lo an fɛ?

JEHOVA TƆGƆ KƆRƆTANIN LO AN FƐ COGO WƐRƐ MINW NA

14. Ka kɛɲɛ ni Zaburuw 105:3 ye, an be mun lo miiri Jehova tɔgɔ koo la?

¹⁴ An ninsɔn ka di Jehova tɔgɔ kosɔn (Zaburuw 105:3 kalan). N’an be waso Jehova tɔgɔ kosɔn, o ka di a ye kosɔbɛ (Zer. 9:22, 23; 1 Kor. 1:31; 2 Kor. 10:17). “Ka wanso” Jehova tɔgɔ kosɔn, o kɔrɔ ko k’an disi gosi ko ale lo ye an ka Ala ye. Nɛɛma lo an fɛ ka bonya la a tɔgɔ kan ani k’a lafasa. An man kan ka maloya fewu k’a fɔ an baarakɛɲɔgɔnw, an ka lakɔli filankuruw, an sigiɲɔgɔnw ani mɔgɔ wɛrɛw ye ko an ye Jehova Seerew ye! Sutana b’a fɛ k’an bali ka Jehova tɔgɔ kofɔ tɔɔw ye (Zer. 11:21; Yir. 12:17). Tiɲɛn na, Sutana n’a ka ngalon kiraw b’u seko kɛ walisa mɔgɔw ka ɲinɛ Jehova tɔgɔ kɔ (Zer. 23:26, 27). Nga, Jehova tɔgɔ ka di an ye minkɛ, an ninsɔn ka di “loon bɛɛ.”—Zab. 5:12; 89:17.

15. Ka Jehova tɔgɔ weele, o kɔrɔ ko di?

¹⁵ An be to ka Jehova tɔgɔ weele (Zowɛli 3:35; Ɔrɔm. 10:13, 14). Ka Jehova tɔgɔ weele, o kɔrɔ tɛ dɔrɔn k’a lɔn ko a tɔgɔ ko Jehova ani k’o tɔgɔ fɔ. O kɔrɔ ko fana k’a lɔn a ye mɔgɔ min ye tigitigi, k’an jigi la a kan ani k’a ɲini a fɛ a k’an dɛmɛ ani k’an ɲɛminɛ (Zab. 20:7; 99:6; 116:4; 145:18). An b’a tɔgɔ n’a ka jogow fana kofɔ tɔɔw ye, an b’u jija u ka nimisa ani u ka dɔ kɛ dɔ ye walisa k’u koo diya Jehova ye.—Ezayi 12:4; Kɛw. 2:21, 38.

16. An be se k’a yira cogo di ko Sutana ye ngalontigɛla ye?

¹⁶ An labilanin lo ka tɔɔrɔ Jehova tɔgɔ kosɔn (Zaki 5:10, 11). Kɔrɔbɔli tuma na, n’an tora kantigiya la Jehova ye, an b’a yira ko Sutana ye ngalontigɛla ye. Zɔbu ka wagati la, Sutana y’a fɔ Jehova sagokɛlaw koo la ko: “Adamaden b’a bololafɛn bɛɛ kɛ k’a nii kisi le.” (Zɔbu 2:4). Sutana y’a fɔ ko ni koow ka ɲi mɔgɔw fɛ, o wagati dɔrɔn lo la u bena Jehova sago kɛ. Nga, a ko ni gwɛlɛya y’u sɔrɔ, u bena bɔ Jehova kɔ. Cɛɛ kantigi Zɔbu y’a yira k’o tɛ tiɲɛn ye. Sutana mana koow gwɛlɛya an ma cogo o cogo, sababu dira an fana ma k’a yira ko an tɛna bɔ Jehova kɔ abada. An lanin b’a la bɛrɛbɛrɛ ko Jehova bena to k’a janto an na a tɔgɔ kosɔn.—Zan 17:11.

17. Ka kɛɲɛ ni 1 Piyɛri 2:12 ye, an be se ka nɔɔrɔ la Jehova tɔgɔ kan cogo wɛrɛ juman na?

¹⁷ An be bonya la Jehova tɔgɔ kan (Talenw 30:9; Zer. 7:8-11). An ye Jehova Seerew ye minkɛ, an be se ka Jehova tɔgɔ tando wala k’a tɔgɔ tiɲɛ an ka kɛwalew fɛ (1 Piyɛri 2:12 kalan). O kama, an b’a fɛ k’an seko bɛɛ kɛ ka Jehova tando an ka kumaw n’an ka kɛwalew fɛ. O cogo la, an bena nɔɔrɔ la a tɔgɔ kan an ka dafabaliya bɛɛ n’a ta.

18. An be se k’a yira cogo wɛrɛ juman na ko Jehova tɔgɔ kɔrɔtanin lo an fɛ? (jukɔrɔla kunnafoni fana lajɛ).

¹⁸ Mɔgɔw be min miiri an koo la, an tɛ jɔɔrɔ o la, nga Jehova tɔgɔ lo kɔrɔtanin lo an fɛ (Zab. 138:2). Mun na do? Komi Jehova tɔgɔ ka di an ye, o be se k’a to mɔgɔ dɔw b’an tɔgɔ tiɲɛ.a Yezu sɔnna ka sa i ko kojugukɛla dɔ walisa ka bonya la Jehova tɔgɔ kan. “A ma maloya yɛrɛ jati.” Cogo di do? Mɔgɔw tun be min miiri a koo la, a ma to ka jɔɔrɔ kojugu o kosɔn (Eburuw 12:2-4). A ɲɛnako fɔlɔ tun ye ka Ala sago lo kɛ.—Mat. 26:39.

19. I be mun lo miiri Jehova tɔgɔ koo la ani mun na do?

¹⁹ Jehova tɔgɔ ka di an ye ani nɛɛma lo an fɛ u k’an weele ko Jehova Seerew! O kama, an labɛnnin lo ka sɔn maloya ma o tɔgɔ kosɔn. Mɔgɔw be min miiri an koo la, an tɛ jɔɔrɔ o la, nga Jehova tɔgɔ lo kɔrɔtanin lo kosɔbɛ an fɛ. O la, an k’an cɛsiri ka to ka Jehova tɔgɔ tando Sutana ka kɔrɔbɔliw bɛɛ n’a ta. N’an y’o kɛ, an bena a yira ko Jehova tɔgɔ kɔrɔtanin lo kosɔbɛ an fɛ i ko a tun kɔrɔtanin lo cogo min na Yezu Krista fɛ.