Dugaw minw be sɔrɔ piyɔniye baara la
1 Piyɔniye dɔ y’a fɔ ko: “Ne kɛtɔ ka tiɲɛn kalan lase mɔgɔw ma, ne be wasali min sɔrɔ o la, ne y’a lɔn ko baara wɛrɛ si tɛ se k’o ɲɔgɔn di ne ma.” Dɔ wɛrɛ y’a fɔ ko: “Tile mana ban loon o loon, ne sunɔgɔ ka di, ani ne dusukun falen be ɲagali la.” Yɔrɔ bɛɛ, balima caaman b’a miiri o cogo kelen na, sabu u y’a nɛnɛ k’a ye ko dugaw be yen piyɔniye baara la .—Ntal. 10:22.
2 Ala ka Kuma lɔnniya be mɔgɔ kisi. Ka mɔgɔw dɛmɛ u k’o lɔnniya sɔrɔ, o be na ni wasali bɛrɛbɛrɛ ye (Kew. 20:35; 1 Tes. 2:19, 20). Balimacɛ dɔ be piyɔniye baara la kabini saan caaman. A y’a sɛbɛ ko: “Ne y’a kɔrɔsi cogo min na Ala ka Kuma sebagaya be mɔgɔw lasun u k’u ka ɲɛnamaya kɛcogo yɛlɛma. O be dusu don ne la, ani o be barika don ne ka lanaya la.” Ɔwɔ, piyɔniyew kɛtɔ k’u yɛrɛw labila walisa ka mɔgɔw dɛmɛ ani ka bibulukalanw kɛ, u bena o dugaw ɲɔgɔnw sɔrɔ.
3 I bolo la Jehova kan: Loon o loon, komi piyɔniyew b’u bolo la Ala ka hakili kan walisa k’u ka cii dafa, o b’u dɛmɛ ka “Ni Senu den” sɛnɛ, ani o b’u tanga koo dɔw ma (Gal. 5:16, 22, 23). Ka fara o kan, komi u be baara kɛ ni Ala ka Kuma ye tuma o tuma, piyɔniyew kɛra waanɛw ye tuma caaman na n’u be baara kɛ ni Bibulu ye ka tiɲɛn lafasa ani ka barika don mɔgɔ wɛrɛw la (2 Tim. 2:15). Balimacɛ dɔ be piyɔniye baara la kabini saan caaman. A y’a lakali ko: “Piyɔniye baara ye ne dɛmɛ ka Bibulu ka lɔnniya dunba sɔrɔ. Ne ye baara kɛ n’o lɔnniya ye walisa ka mɔgɔ caaman dɛmɛ u ka Jehova n’a sagonataw lɔn.” Nin ye dugaw ye dɛ!
4 Kudayi piyɔniyew ka kan k’u bolo la Jehova kan cogoya caaman wɛrɛw la fana. U b’u jija k’u makofɛnw sɔrɔ farikolo ta fan fɛ. U mana a ye cogo min na a b’u ka jijaliw kɛli duga, u ka lanaya be barika sɔrɔ. Saan 72 balimacɛ dɔ ye saan 55 kɛ kudayi piyɔniye baara la. A y’a fɔ ko: “Jehova ma ne bila ka ben ka ye.” Ka fara o kan, komi u tɛ bololafɛn caaman ɲini, piyɔniyew b’u yɛrɛw tanga ɲɛnamaya ka haminanko caaman ma. Yala o nege t’i la wa?—Mat. 6:22; Heb. 13:5, 6.
5 I magwɛrɛ Ala la: An be jɛnɲɔgɔnya min kɛ ni Jehova ye, o nafa ka boon ni fɛɛn bɛɛ ye an fɛ (Zab. 63:4). An mana an seen don waajuli la a ɲɛ ma, katugu an be Jehova kanu, an ka jɛnɲɔgɔnya be barika sɔrɔ ( Yaku. 4:8). Balimacɛ dɔ ye piyɔniye baara kɛ saan 18 ni kɔ. A y’a fɔ ko: “Piyɔniye baara b’an dɛmɛ an k’a ‘nɛnɛ k’a filɛ ko Jehova ka ɲi.’ Loon o loon, a b’an dɛmɛ ka jɛnɲɔgɔnya barikaman sabati anw n’an Danbaga cɛ.” (Zab. 34:9).
6 Piyɔniyew ka cogoya ka kan ka sira di u ma u ka piyɔniye baara kɛ. Ka fara o kan, u fana ka kan ka lanaya barikaman sɔrɔ, ka Ala n’u mɔgɔɲɔgɔnw kanu ni kɔnɔgwɛ ye, ani ka sɔn k’u yɛrɛw saraka (Mat. 16:24; 17:20; 22:37-39). O bɛɛ n’a ta, dugaw sɔrɔli ka ca ka tɛmɛ saraka kɛli kan. Piyɔniyew ɲɛɛ manamanatɔ b’o yira an na yɔrɔ bɛɛ (Mal. 3:10). Piyɔniyew dama t’o dugaw sɔrɔ. U be hakili ɲuman min yira, u ka denbayaw ni kafo fana be nafa sɔrɔ o la.—Filip. 4:23.
[Study Questions]
1, 2. Dugaw jumanw be sɔrɔ piyɔniye baara fɛ, ani mun na?
3, 4. Cogo juman na piyɔniye baara be mɔgɔ dɛmɛ k’a bolo la Jehova kan? Ani, o be mɔgɔ dɛmɛ ka yiriwa hakilimaya ta fan fɛ cogo di?
5. Cogo juman na piyɔniye baara be mɔgɔ dɛmɛ ka magwɛrɛ Jehova la?
6. Mun lo ka kan ka kɛ piyɔniyew fɛ? Ani, ka fara piyɔniyew yɛrɛw kan, jɔn fana lo be nafa sɔrɔ?