Sisan lo ye waajuli kɛwagati ye!
1 “A’ ye siran Ala ɲɛ k’a bonya.” Nin ye cira ye, min be lasera “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ma mɛlɛkɛw ka dɛmɛ sababu fɛ. Mun na do? ‘K’a masɔrɔ [Ala] na kiri tigɛ mɔgɔw kan waati min na, o sera.’ An be o ‘kiti wagati’ lo la bi. A kuncɛli bena kɛ duniɲa nin halakili ye. O kama, a kɔrɔtalen be kosɔbɛ mɔgɔw ka “sankolo ni dugukolo ni kɔgɔji ani ji boyiw Dabaa bato.” Bi tilew la, baara wɛrɛ si kɔrɔtalen tɛ ka se “Kibaru Duman banbali” waajuli ma, ani kɔrɔtɔ tɛ baara wɛrɛ si la ka se o ma. Tiɲɛn na, sisan lo ye waajuli kɛwagati ye!—Jira. 14:6, 7.
2 Saan tan tɛmɛnenw na, Jehova sagokɛlaw ye lɛri miliyari 12 ɲɔgɔn kɛ ka Masaya waajuli kɛ ani ka mɔgɔw kɛ Kirista ka kalandenw ye. U caaman ye yɛlɛmaniw kɛ u ka ɲɛnamaya kɔnɔ walisa ka se ka sumantigɛ baara kɛ bɛrɛbɛrɛ Alako ta fan fɛ (Mat. 9:37, 38). Ɲɛyirali fɛ, salon, mɔgɔ 850000 ɲɔgɔn seen tun be piyɔniye baara la kalo o kalo. Kudayi piyɔniyew ka ɲi ka lɛri 70 ɲɔgɔn kɛ waajuli la kalo o kalo. A ɲininen be piyɔniye kɔrɔsigiw fɛ u ka lɛri 50 kɛ.
3 Labɛn minw ka ɲi ka kɛ piyɔniye baara kama: Komi piyɔniyew b’a lɔn ko “waati surunyara”, u b’u jija k’u ka ɲɛnamaya kɛcogo nɔgɔya (1 Kɔr. 7:29, 31). U be cogoyaw ɲini ka dɔ bɔ u ka musakaw la walisa u ka se ka wagati dɔɔni dɔrɔn kɛ baloɲini baara la. Ɲɛyirali fɛ, u dɔw yɛlɛmana boon fitininmanw kɔnɔ. Dɔ wɛrɛw y’u bololafɛn dɔw ta ka bɔ yen pewu, n’u mako kɛrɛnkɛrɛn tun t’u la (Mat. 6:19-21). Tuma dɔw la, u fana ka kan ka kɔ di u sagolako dɔ ma. O bɛɛ kuun ye ka wagati caaman kɛ waajuli baara la ani k’i janto o baara la bɛrɛbɛrɛ (Efes. 5:15, 16). Weleweledala caaman y’u cɛsiri, u ye yɛrɛsaraka hakili kɛ u yɛrɛw la, ani u y’u bolo la Jehova kan delili kɔnɔ. O cogo la, u sera ka porogaramu kɛɲɛnen kɛ ani k’u seen don piyɔniye baara la.
4 Yala i be se ka kɛ piyɔniye ye wa? Piyɔniye minw be sanga sɔrɔla u ka baara la, mun na i tɛ ɲɛsin olu ma k’a filɛ u b’a kɛra cogo min na? I ka waajuli kɛ n’u ye, ani i k’u ka ninsɔndiya nɛnɛ k’a filɛ. I k’a filɛ an ka gafew kɔnɔ, barokun minw be kuma piyɔniye baara koo la. I ka laɲinita nafaman dɔw latigɛ i yɛrɛ ye, minw bena i bila piyɔniye baara sira kan dɔɔni dɔɔni. Ni koo dɔw b’i balila k’i seen don piyɔniye baara la sisan, i k’u kofɔ Jehova ye delili kɔnɔ. Ani, i k’a ɲini Jehova fɛ a k’i dɛmɛ k’u ɲɛnabɔ.—Ntal. 16:3.
5 Baraji ni ninsɔndiya minw b’a la: An be baara min kɛ ni Ala ka Kuma ye, piyɔniye baara b’an dɛmɛ k’o fisaya. O la, dɔ be fara an ka ɲagali kan. Piyɔniye dɔ, min ye sunguru ye, o y’a fɔ ko: “Ka se ka Ala ka tiɲɛn Kuma faranfasi cogo tilennen na, duga b’a la sɔbɛ la. N’i ye piyɔniye ye, i be baara kɛ tuma caaman ni Bibulu ye. Sisan, waajuli kɛtɔ soo ni soo, ne be se ka vɛrisew sɔrɔ minw bɛnnen be mɔgɔ kelen keken ka cogoya ma.”—2 Tim. 2:15.
6 Piyɔniye baara b’an dɛmɛ fana ka hakilidiya sɔrɔ an ka ɲɛnamaya faan caaman na. A be se ka kamalenw ni sunguruw dɛmɛ k’u ka wagati kɛ ni hakilitigiya ye, k’u ka wari mara koɲuman, ani ka bɛn kɛ ni mɔgɔ wɛrɛw ye. A fana ye mɔgɔ caaman dɛmɛ ka ɲɛnamaya jati ka kɛɲɛ ni Ala ka miiriya ye (Efes. 4:13). Ka fara o kan, piyɔniyew be nɛɛma sɔrɔ k’a ye cogo min na Jehova b’a bolo don u ka koɲɛw la.—Kew. 11:21; Filip. 4:11-13.
7 Piyɔniye baara b’an dɛmɛ ka magwɛrɛ Jehova la. I be taga a sɔrɔ o ye o baara nin ka barajiba dɔ lo ye. O be se k’an dɛmɛ ni gwɛlɛyaw b’an kan. Balimamuso dɔ ye gwɛlɛyaba muɲu. A y’a fɔ ko: “Piyɔniye baara ye ne dɛmɛ ka jɛnɲɔgɔnya teriman min sigi ne ni Jehova cɛ, o lo ye ne dɛmɛ k’an ka gwɛlɛyaw bɛɛ muɲu.” A y’a fara a kan ko: “Ne dusu diyara ka n’ ka baliku ɲɛnamaya bɛɛ kɛ Jehova ka baara la kudayi. O ye ne dɛmɛ ka n’ yɛrɛ di cogo dɔw la, ne tun ma la a la fɔlɔ la k’o see be n’ ye.” (Kew. 20:35). O cogo kelen na, an fana ka dɔ nɛnɛ baraji caaman na, an kɛtɔ k’an seko bɛɛ kɛ waajuli baara la: baara min kɔrɔtalen be ka tɛmɛ baara tɔɔw bɛɛ kan.—Ntal. 10:22.
[Study Questions]
1. Mun na sisan lo ye waajuli kɛwagati ye?
2. Cogo juman na Jehova sagokɛlaw b’a yira k’u lɔnnen b’a la ko kɔrɔtɔ be bi wagati la?
3. Tuma caaman na, weleweledalaw ka ɲi ka yɛlɛmani jumanw kɛ walisa ka se k’u seen don piyɔniye baara la?
4. Koo kɛɲɛnen jumanw be se k’i bila piyɔniye baara sira kan?
5. Cogo juman na piyɔniye baara b’an dɛmɛ k’an ka waajuli kɛcogo fisaya?
6. Piyɔniye baara be mɔgɔ dege mun lo la?
7. Cogo juman na piyɔniye baara b’an dɛmɛ k’an magwɛrɛ Jehova la?