A’ ye Jehova kanu, aw, a ka kantigiw bɛɛ Yesu ka saya hakilijigi seli min bena kɛ awirilikalo tile 4nan loon
1 Saan caaman na, tuma min na Ukraine (Ukɛrɛni) tun be kominisiw ka fanga bolo, faamanw tun be an balimaw kɔrɔsi sɔbɛ la, sanko ni Matigi ka surafana seli tun ka surun. U jigi tun b’a la ka seli kɛyɔrɔ lɔn. O tun ye gwɛlɛya ye tuma o tuma, sabu faamanw tun be seli kɛlon lɔn dɔɔni. An balimaw tun be se ka mun lo kɛ? Bonden dɔ tun be balimamuso dɔ fɛ dugukolo jukɔrɔ, ani a falen tun be jii la fɔɔ ka se kunbiriw ma. Komi faamanw tun t’a miiri ko mɔgɔw bena lajɛn o yɔrɔ la, balimaw ye tintin dɔ lɔ jii sanfɛ. Tii surunyalen kosɔn, hali n’u tun ka kan ka sonsoro ka sigi o tintin kan, mɔgɔ si m’u kɔnɔgwan tuma min na kafo ye Hakilijigi seli kɛ.
2 Ukɛrɛni balimaw kɛtɔ k’u cɛsiri ka kolo cikan ye ani ka Yesu ka saya seli kɛ, u y’a yira cogo cɛɲumanba na k’u be Ala kanu (Luka 22:19; 1 Yuh. 5:3). Gwɛlɛyaw mana kɛ an seen kɔrɔ tuma o tuma, o ɲɛyiraliw ɲɔgɔnw be se k’an jagwɛlɛya ani k’an lasun an ka kɛ Matigi ka surafana seli la awirilikalo tile 4nan na. O cogo la, an b’a yira ko an sɔnna zaburu sɛbɛbaga ka miiriyaw la. A ye dɔnkili la ko: “Matigi ka kanulenw bɛɛ, aw ka Matigi kanu.”—Zab. 31:24.
3 An ka mɔgɔw dɛmɛ u ka yiriwa kanuya la Ala fan fɛ: Ala kanu b’an lasun fana an ka mɔgɔ wɛrɛw weele u ka na Hakilijigi seli kɛ n’an ye. Feburukalo ka An ka Masaya Cidenyabaara lankana y’an bɛɛ jagwɛlɛya an ka mɔgɔw tɔgɔw sɛbɛ, an b’a fɛ ka minw weele ka na seli la. Yala i b’o lo kɛra sɔbɛ la ka weeleli lase u kelen kelen bɛɛ ma wa? I ka wagati ta ka seli kɔrɔ ɲɛfɔ u ye. N’an y’u hakili jigi Hakilijigi seli loon n’a lɛri la ni teriya ye, ani n’a bɛnnen lo, n’an y’a fɔ k’an b’a fɛ k’u bila sira, o be se k’u jagwɛlɛya u ka na seli la.
4 Minw sɔnna ka na seli la, an k’an jija sɔbɛ la k’u bisimila, ani an k’a yira u la k’u nako diyara an ye. Cogo juman na an be se k’u dɛmɛ u ka yiriwa u ka kanuya la Jehova fan fɛ? An k’an yɛrɛw labila k’u ka ɲiningaliw jaabi. Koow cogoya mana bɛn, an ka teliya ka bibulukalan kofɔ u ye. An k’u weele u ka na kafo ka lɔgɔkun lajɛnw na. Kerecɛn sumalen minw bena kɛ yen, diinan mɔgɔkɔrɔw bena u janto u la bɛrɛbɛrɛ. U be se ka labɛn kɛ walisa ka taga bɔ u ye. Ani, n’a sɔrɔ u be se ka basigi Hakilijigi seli ka hakilinata dɔw kan k’u jagwɛlɛya u ka segi k’u seen don kafo ka baaraw la kokura.—Rom. 5:6-8.
5 An ka kanuya dunya an yɛrɛw kɔnɔ Jehova fan fɛ: N’an be miiri kosɔbɛ kunmabɔsara kan, o be se k’an ka kanuya dunya Jehova n’a Dencɛ fan fɛ (2 Kɔr. 5:14, 15). Seere dɔ tun delila ka taga Hakilijigi seli la kabini saan caaman. A facɛ salen kɔ, a y’a fɔ ko: “An kɔrɔtɔnen be ka Hakilijigi seli makɔnɔ. Saan o saan, dɔ be fara a nafa kan an ɲɛ kɔrɔ. A saan 20 ye nin ye, ne hakili b’a la ko ne lɔnen tun be n’ facɛ ka sukɛsi kɔrɔ. N’ faa suu filɛtɔ, Yesu ka kunmabɔsara waleɲumanlɔn donna ne la kosɔbɛ. Fɔlɔ la, o kalan tun be ne ɲɛ na i ko lɔnniya gwansan dɔrɔn ne hakili la. Tiɲɛn lo, ne tun be se ka bibulusenw bɛɛ ɲɛfɔ o koo kan! Nka tuma min na saya ye nɔɔba bila ne la, tiɲɛn na ne dusu ɲagalila kunmabɔsara koo la, o bena koduman minw bɛɛ kɛ an ye.”—Yuh. 5:28, 29.
6 Ɲinan ka seli surunyatɔ, an ka wagati ta k’an dusukunw cogoya labɛn o koo kama (2 Tilew Kib. 19:3). Bibulu kalangwɛ min dira o kama saan 2004 ka tilera kalan gafenin kɔnɔ, ani 2004 ka kalandiriye kɔnɔ, an ka miiri olu kan. Gwakalan kalan kɛtɔ, a ka di mɔgɔ dɔw ye ka segi ka gafe Le plus grand homme sapitiriw 112-116 lajɛ. Mɔgɔ wɛrɛw be tɛmɛ jɔncɛ kantigiman hakiliman ka gafe wɛrɛw fɛ ka sɛgɛsɛgɛri wɛrɛw kɛ ka fara o kan (Mat. 24:45-47). An bɛɛ kelen kelen be se ka miiri kunmabɔsara koo kan delili kɔnɔ ni kɔnɔgwɛ ye (Zab. 50:14, 23). Tiɲɛn na, ɲinan ka Hakilijigi seli wagati la, Jehova ye kanuya min yira an na, an ka to ka miiri o kan, ani an ka cogoya ɲini k’an ka kanuya yira ale la.—Marka 12:30; 1 Yuh. 4:10.