An ka mɔgɔw dɛmɛ u ka nafa sɔrɔ kunmabɔsara la Kirista ka saya Hakilijigi lajɛn bena kɛ awirilikalo tile 12nan na
1 “Barika Ala ye a ka nili fɛnba kosɔn min ɲɔgɔn tɛ!” (2 Kɔr. 9:15). O kumaw b’a yira koɲuman an fana be min miiri Ala ka ɲumanya n’a ka kanuya kantigiman koo la. A b’o ɲumanya n’o kanuya kantigiman yira a ka mɔgɔw la a Dencɛ Yesu Kirista sababu fɛ. An ka waleɲumanlɔn bena ye kosɔbɛ awirilikalo tile 12nan na: o loon, an bena lajɛn Kirista ka saya Hakilijigi kama.
2 Saan o saan mɔgɔ miliyɔn 10 ɲɔgɔn be jɛn ni Jehova Seerew ye ka Hakilijigi lajɛn kɛ. O cogo la, u b’a yira k’u be Kirista ka saraka waleɲuman lɔn fana. Nka n’u b’a fɛ ka nafa sɔrɔ kunmabɔsara la, fɔɔ u ka lanaya la a kan (Yuh. 3:16, 36). Cogo juman na an be se k’u dɛmɛ k’o lanaya ɲɔgɔn sɔrɔ? Hakilijigi wagati la, an be se k’u jija u ka sɔn bibulukalan na ani u ka to ka na kafo ka lajɛnw na lɔgɔkun o lɔgɔkun. An k’o kɛcogo dɔw lajɛ.
3 Bibulukalanw: N’an ye makodon mɔgɔ dɔw weele Hakilijigi lajɛn na, an k’a ɲini ka bibulukalan daminɛ n’u ye gafe Qu’enseigne la Bible ? kɔnɔ. An k’a ɲini ka Hakilijigi lajɛn ɲɛfɔ u ye. O la, an ka gafe dayɛlɛ a ɲɛɛw 206-8nan na, ani an ka barokun nin lajɛ n’u ye “Le repas du Seigneur: une célébration qui honore Dieu” (Matigi ka surafana: Hakilijigi koo lo min be Ala bonya). An be se k’o kunnafoniw lajɛ n’u ye siɲɛ kelen wala siɲɛ fila bibulukalan kɛcogo la u ka soda la. N’an tilara gafe ɲɛɛw 206-8nan lajɛli la, n’a sɔrɔ a tigi bena sɔn ka sapitiri 5nan kalan kɛ “La rançon, le plus beau don de Dieu.” Bibulukalan mana sabati ka ban, an ka segi kɔfɛ ka sapitiri 1-4nan lajɛ n’a tigi ye.
4 An be se ka tɛmɛ o kɛcogo fɛ ka bibulukalan daminɛ ni jɔn ye? N’a sɔrɔ i ka baarakɛɲɔgɔn dɔw, wala lakɔli filankuruw, wala i sigiɲɔgɔn dɔw bena sɔn k’o baro ɲɔgɔn kɛ n’i ye. Balimamuso dɔw ka cɛɛw tɛ Jehova Seerew ye. Balimacɛw ka kan k’u magwɛrɛ u la. An fana kana sigasiga ka kalan kofɔ an somɔgɔw ye minw tɛ Jehova Seerew ye. Ka fara o kan, an ka kan ka jijaliba kɛ ka welekan lase mɔgɔw ma minw y’u sen tigɛ kafo ka koow la (Luka 15:3-7). An k’a ɲini k’o ɲɔgɔnna mɔgɔw bɛɛ dɛmɛ u ka nafa sɔrɔ kunmabɔsara la.
5 Kafo ka lajɛnw: Bibulu kalanden ni makodon mɔgɔ caaman be na lajɛn fɔlɔ min na, o ye Hakilijigi lajɛn ye. Nka cogo juman na an be se k’u jija u ka na kafo ka lajɛn tɔɔw la ani ka nafa sɔrɔ u la? Saan 2005, awirilikalo ka An ka Masaya Cidenyabaara ɲɛɛ 8nan tun be ladili ninw di: “An ka forobakalan nata barokun fɔ u ye. Barokun minw bena kalan La Tour de Garde kalan na ani kafo ka kitabukalan na, an k’u yira u la. An ka Ala ka Mara cidenyabaara lakɔli ni waajuliko lajɛn kɛcogo lakali u ye. N’an bena kalan dɔ di lakɔli la, an be se k’a fɔ u k’a mɛn. Kalan min kɛra lajɛnw na, an k’u hakilinata kunbabaw tilan n’u ye. An ka tɛmɛ foto dɔw fɛ gafew kɔnɔ k’a yira u la min be kɛ lajɛnw na. An mana kalan fɔlɔ daminɛ n’u ye an k’u weele u ka na lajɛnw na kelen.”
6 Ni mɔgɔ kɔnɔgwɛw be Bibulu kalan kɛ, ani u be na lajɛnw na tuma o tuma, tuma caaman na, u ka teli ka ɲɛtaga sɔrɔ joona-joona Alako ta fan fɛ. O kama, an ka mɔgɔw jija u ka nafa sɔrɔ o labɛnw na. O la, Ala ka nilifɛn cɛɲumanba bena u nafa: O ye kunmabɔsara ye.
[Study Questions]
1. Cogoya dɔ juman na Ala sagokɛlaw b’a yira k’u be kunmabɔsara waleɲuman lɔn?
2. Jɔn lo be fara Jehova sagokɛlaw kan ka na Hakilijigi lajɛn na? Ani, u ka kan ka mun lo kɛ walisa ka nafa sɔrɔ kunmabɔsara la?
3. An be mɔgɔ minw weele Hakilijigi lajɛn na, cogo juman na an be se ka bibulukalan daminɛ n’u ye?
4. An be se ka bibulukalan daminɛ ni jɔn ye Hakilijigi wagati la?
5. Cogo juman na an be se ka Bibulu kalandenw ni makodon mɔgɔw jija u ka na kafo ka lajɛnw na lɔgɔkun o lɔgɔkun?
6. Cogo fila juman na an be se ka mɔgɔw dɛmɛ u ka nafa sɔrɔ kunmabɔsara la?