Dɔnkili, min be mɔgɔ barikaya
1 Dɔnkili dali ni dɔnkili ye tiɲɛn batoli fanba dɔ ye. Israɛl kɔrɔ kɔnɔ, Asaf n’a balimaw ye dɔnkili da ko: “Aw ka barika da Matigi ye ka a tɔgɔ wele. . . . Aw ka dɔnkili da ka ɲagali a ɲɛ kɔrɔ. A’ ye a ka kabakoba kɛlenw lakali.” (1 Tilew Kib. 16:8, 9). Bi, an b’an kaan kɔrɔta ka dɔnkili da Jehova ye kafo ka lajɛnw na lɔgɔkun o lɔgɔkun (Efes. 5:19). Sababu cɛɲumanba lo an fɛ k’a tɔgɔ tando dɛ!—Zab. 69:31.
2 Mélodies du Royaume ye Masaya dɔnkiliw ye kasɛtiw kɔnɔ. U labɛnna fɔlifɛnw fɛ. U lamɛnni be se k’an hakili fa ni Alako miiriyaw ye. Balimamuso dɔ y’a ɲɛfɔ ko: “Ne kɛtɔ k’o dɔnkiliw lamɛn, ne hakili be jigi u kumaw la. O ye cogo ɲuman ye ne fɛ ka miiri Jehova koo la n’ kɛtɔ ka dɔnkili diya bɔ dɛ!”—Filip. 4:8.
3 Sababu minw dira an ma k’u diya bɔ: Mélodies du Royaume lamɛnni be na ni dusudiya ni hakilimaya miiriyaw ye. O sababu la hɛɛrɛ be kɛ denbaya kɔnɔ. Denbaya dɔ y’a sɛbɛ ko: “An b’o [dɔnkili] lamɛn siɲɛ caaman na an ka soo kɔnɔ ani mobili kɔnɔ n’an tɛ sɛgɛ a la sabu a be dusu don mɔgɔ la. Tuma dɔw la, a ye ninsɔndiya ɲuman bila an na tuma min na an b’an labɛnna ka taga kafo ka lajɛnw na wala lajɛnbaw la.” Balimamuso dɔ y’a fɔ ko: “U be ne nafa kosɔbɛ ni n’ be n’ ka soo kɔnɔ baaraw la. Jɔn lo bena a fɔ ko ne ninsɔn man di ni n’ be n’ ka faniw kurula? Ne y’a latigɛ k’o kasɛtiw lamɛn ni n’ fari fagara. A be mɔgɔ barikaya dɛ! . . . Dɔnkili kelen kelen bɛɛ be na ni hɛɛrɛ miiriya ye.” O dɔnkili minw be barika don mɔgɔw la, yala sababu dɔw be yen n’u be se ka aw nafa wa?
4 Duniɲa ka miiriya be sɔrɔ bi ka dɔnkili caamanbaw la. Bangebagaw be se k’u deenw dɛmɛ u ka dɔnkili saniman diya sɛnɛ u kɛtɔ ka baara ɲuman kɛ ni Mélodies du Royaume kasɛtiw ye. A bena diya Bibulu kalanden caaman ni makodon mɔgɔw ye u ka o hakilimaya dɔnkili ɲumanw lɔn. U be Jehova tando, ani u be mɔgɔ hakili barikaya.—Zab. 47:2, 3, 7, 8.