An ka baara kɛ ni Bibulu ye bɛrɛbɛrɛ
1 Waajuli kɛtɔ, n’an b’a fɛ ka gafe o gafe kofɔ mɔgɔw ye, a ka ɲi an ka vɛrise dɔ ɲɛnatɔmɔ min bena an lamɛnbagaw lasun u ka miirili kɛ (Heb. 4:12). N’an be vɛrise dɔ ɲɛnatɔmɔ min be sɔrɔ gafe yirata kɔnɔ, o bena an dɛmɛ an k’o gafe kofɔ cogo bɛrɛbɛrɛ la. Yɔrɔ dɔw la, waajulikɛlaw y’a ye ko nafa b’a la ka Bibulu minɛ u bolo n’u be magwɛrɛla mɔgɔw la wala n’u be waajuli kɛra soo ni soo.
2 Baro daminɛ ni bibulusen dɔ ye: Weleweledala dɔw b’u ka baro daminɛ u kɛtɔ ka ɲiningali nɔgɔman dɔ bila u lamɛnbaga ye bibulusen dɔ kan. O kɔ, u b’o vɛrise kalan. O kɛcogo be sin k’u lamɛnbaga ɲɛsin Ala ka Kuma ma. Yala kuma yiracogo ninw bena sanga sɔrɔ i ka kiin kɔnɔ wa?
◼ “N’a see tun be i ye, yala i tun tɛna yɛlɛmani ninw kɛ wa?” Jirali 21:4 kalan.
◼ “An be wagati min na, mun na a ka gwɛlɛ ten?” 2 Timote 3:1-5 kalan.
◼ “Ni mɔgɔ bɛɛ tun be ladili nin sira tagama, yala koow tun tɛna fisaya an ka kiin kɔnɔ wa?” Matiyu 7:12 kalan.
◼ “Koo minw lakalila yan, e ka miiri la, yala i ka deenw bena se k’u diya bɔ wa?” Zaburuw 37:10, 11 kalan.
◼ “E ka miiri la yala kuma ninw bena dafa loon dɔ wa?” Esayi 33:24 kalan.
◼ “Gofɛrɛnɛman yɛlɛmani min kofɔra Daniɛl 2:44 la, yala i b’o kalama wa?” Daniɛl 2:44 kalan.
◼ “Yala i delila k’a ɲini ka ɲiningali nin bila Ala ye wa?” Job 21:7 kalan.
◼ “An ka mɔgɔ sɔbɛ minw sara, yala an be se k’u ye tugun wa?” Yuhana 5:28, 29 kalan.
◼ “Yala mɔgɔ salenw be mɔgɔ ɲɛnamaw ka walew kalama wa?” Waajulikɛla 9:5 kalan.
3 A ɲɛfɔ, a ɲɛyira ni ntalen dɔ ye, a sira tagamacogo yira: Ni mɔgɔ dɔ sɔnna ka baro kɛ n’an ye, an kana kɔrɔtɔ ka baro kuncɛ. An ye vɛrise min kalan, an ka wagati ta k’a ɲɛfɔ, k’a ɲɛyira ni ntalen dɔ ye, ani k’a sira tagamacogo yira a tigi la walisa a k’a faamuya (Neh. 8:8). Mɔgɔw mana Ala ka Kuma kalan faamu ani ka sɔn a la, a be se ka yɛlɛmani kabakoman kɛ u ka ɲɛnamaya kɔnɔ.—1 Tes. 2:13.
4 I kɛtɔ ka segi ka na makodon mɔgɔw dɛmɛ, i ka to ka baara kɛ ni Bibulu ye bɛrɛbɛrɛ. I be se ka tɛmɛ o fɛɛrɛ kelen fɛ viziti kuraw kɛtɔ: 1) Vɛrise kɛɲɛnen dɔ ɲɛnatɔmɔ. 2) Ɲiningali nɔgɔman dɔ bila a tigi ye min ɲɛsinna o vɛrise ma. O kɔ, a kalan. 3) A ɲɛfɔ, a ɲɛyira ni ntalen dɔ ye, ani a sira tagamacogo yira a tigi la. I mana segi ka taga bɔ a tigi ye tuma o tuma, i jija ka dɔ fara a ka lɔnniya kan Bibulu koo la. Sɔɔni, o bena kɛ bibulukalan ye i bolo!
[Study Questions]
1. N’i b’i labɛnna waajuli baara kama, i be se ka mun kɛ?
2. a) Cogo juman na an be se k’an ka baro daminɛ ni bibulusen dɔ ye? b) A ka di mɔgɔw ye ka baro kɛ Bibulu koo jumanw kan kiin kɔnɔ?
3. An be bibulusen minw kalan mɔgɔw ye, cogo juman na an be se k’u mɔgɔw dɛmɛ u k’u faamu?
4. Viziti kuraw kɛtɔ, cogo juman na an be se ka baara kɛ ni Bibulu ye bɛrɛbɛrɛ?