Yala i b’i ka cidenyabaara kɛ ka dafa wa?
1 Kɛwalew ka kitabu kɔnɔ, an b’a kalan ko Yesu ka kalandenw y’u ka cidenyabaara kɛ, u kɛtɔ ka “seereya kɛ ka dafa” mɔgɔw ye (Kew. 2:40; 8:25; 28:23, NW ). Siga t’a la, o tun ye ciden Pol ka laɲinita ye (Kew. 20:24). Yala o fana tɛ an ka laɲinita ye, an min ye kibaro duman cidenw ye wa? An be se k’o dafa cogo juman na?
2 Kuma yiracogo labɛn: A kɔrɔtalen be i k’i yɛrɛ labɛn n’i b’a fɛ ka seereya barikaman di waajuli kɛtɔ. O kɔni ye tiɲɛn ye n’an be periyodikiw yirala mɔgɔw la, sabu u kɔnɔnakow be yɛlɛma tuma o tuma. Walisa ka dɛmɛ fisaman lase an ma, An ka Masaya Cidenyabaara sɛbɛ nin be labɛn kura dɔ dabɔra: Numanbolo barokun kɔnɔ, kalo nin ka La Tour de Garde ni Réveillez-vous ! yiracogo dɔw dira. Kalo o kalo ka sɛbɛ bena barokun bɛnnen di, min bena mɔgɔw caaman ɲɛminɛ. I be se ka baara kɛ n’o yiracogo surunw ye cogo di?
3 Hakilinata dɔw ɲɛnatɔmɔ, minw bena barika sɔrɔ i ka kiin na ile ka miiriya la. O barokun kɔnɔnakow kalan ka kɔrɔsili kɛ. Miiriya dɔw ɲɛnatɔmɔ, minw be se ka mɔgɔw ɲɛnatigɛ. Periyodiki kɔnɔ Bibulusen dɔ ɲini, min bɛnnen be ni baro ye. I be se k’o kalan a tigi ye. Kuncɛli kuma surun dɔ fara a kan walisa k’i lamɛnbaga jija a ka periyodiki kalan. N’a bɛnnen be, ɲɛfɔli fitinin kɛ ko, a tigi be se ka bolomafara di Jehova Seerew ka baara kama duniɲa bɛɛ kɔnɔ. Sisan, segi i ka kuma yiracogo kan k’a ladege.
4 I labɛn ka baara kɛ ni Bibulu ye: N’i y’i labɛn koɲuman, i be se ka Bibulusen dɔ ladon i ka kuma yiracogo kɔnɔ. Ɲɛyirali fɛ, yɔrɔ caaman na, weleweledala kolɔnbagaw sera k’o kɛ koɲuman. U be Bibulu minɛ u bolo u tagatɔ sodaw la. U mana somɔgɔw fo, u b’a fɔ ko:
◼ “An be mɔgɔw ɲininga n’u lara nin na . . . ” Jenɛse 1:1 kalan. O kɔ, a ɲininga ko: “Yala i sɔnna o kumaw la wa.” N’a sɔnna, a fɔ ko: “Ne fana lara a la. Nka, ile ka miiriya la, ni Ala ye fɛɛn bɛɛ dan, yala juguya ye ale fana nɔɔ ye wa?” I mana a tigi ka jaabili lɔn, i ka Waajulikɛla 7:29 kalan. Gafe Dɔnniya dayɛlɛ a ɲɛɛ 71nan na, ani dakun 2nan kalan. Dusu don a tigi la a k’o gafe kalan. N’a tigi ma sɔn Jenɛse 1:1 ka kuma la, a jija a ka gafe Création kalan.
5 Makodon bɛɛ nɔminɛ: Makodon min sɔrɔla, n’i t’o nɔminɛ, i tɛ se k’i ka cidenyabaara kɛ ka dafa. I mana baro duman kɛ ni mɔgɔ ye, a tɔgɔ n’a ladɛrɛsi sɛbɛ hali n’a tigi ma sɔn k’an ka gafe wala periyodiki dɔ ta. A ɲini sɔbɛ la k’a tigi ka mako ladon i kɛtɔ ka segi joona ka taga bɔ a ye. Koo bɛɛ kɛ ka Bibulu kalan kofɔ a ye.
6 Saan kɛmɛ fɔlɔ kalandenw tun y’a lɔn ko Yesu ye ci di u ma k’u ka “seereya di ka dafa.” (Kew. 10:42, NW ). O cikan ɲɛsinna an ma fana, sabu o ye cogoya kelenpe lo ye min fɛ an bena se ka mɔgɔw kɛ kalandenw ye (Mat. 28:19, 20). An k’an seko bɛɛ kɛ k’an ka cidenyabaara kɛ ka dafa.—2 Tim. 4:5.