Yɔrɔ 7nan: An ka bibulukalanw kɛ minw be ɲɛtaga sɔrɔ
Ka delili kɛ bibulukalan na
1 Walisa Bibulu kalandenw ka ɲɛtaga sɔrɔ Alako ta fan fɛ, fɔɔ Jehova k’u ka jijali kɛli duga (1 Kɔr. 3:6). O kama, kalan juu mana sigi ka ɲɛ, a ka ɲi an k’a daminɛ ani an k’a kuncɛ ni delili ye. Tuma caaman na, an yɛrɛ be se ka sin ka kalan fɔlɔ daminɛ ni delili ye n’o y’a sɔrɔ kalanden be la Ala la. Nka tuma dɔw la, an ka ɲi ka hakili sɔrɔ ka wagati bɛnnen ɲini ka kalan daminɛ ani k’a kuncɛ ni delili ye. An be se ka tɛmɛ Zaburu 25:4, 5 ani 1 Yuhana 5:14 fɛ ka kalanden dɛmɛ a k’a faamu fɛɛn min kama an ka ɲi ka delili kɛ n’a ye. An fana be se ka tɛmɛ Yuhana 15:16 fɛ k’a ɲɛfɔ mun na a kɔrɔtalen be ka Jehova lo deli n’an be tɛmɛ Yesu Kirista fɛ.
2 Jɔn lo ka kan ka delili fɔ bibulukalan na? Ni balimacɛ batiselen dɔ be balimamuso dɔ bila sira ka taga kalan kɛ, balimacɛ lo bena delili fɔ hali ni balimamuso lo bena a kuun datugu ka kalan ɲɛminɛ (1 Kɔr. 11:5, 10). Nka ni weleweledala cɛman dɔ be balimamuso dɔ bila sira ka taga kalan kɛ, ani a ma batise fɔlɔ, balimamuso lo ka kan ka delili fɔ. O sen fɛ, a ka kan k’a kuun datugu k’a sɔrɔ ka delili fɔ ani ka kalan fana ɲɛminɛ.
3 An be se ka mun lo fɔ o deliliw kɔnɔ? An be delili minw kɛ bibulukalanw na, u man kan ka janya. Nka, u ka kan ka ɲɛsin koo tigitigiw ma. An be se ka duga ɲini Jehova fɛ kalan kama, ani ka barika la a ye tiɲɛn kalan koo la. Ka fara o kan, a fana bɛnnen be an ka Jehova tando, ale min ye kalan nin Tigi ye (Esayi 54:13). An fana be se ka kuma dɔw fɔ minw b’a yira ko an b’an janto kalanden na sɔbɛ la, ani ko an be Jehova ka ɔriganisasiyɔn waleɲuman lɔn (1 Tes. 1:2, 3; 2:7, 8). An kɛtɔ ka Jehova deli a ka kalanden dɛmɛ a k’a jija ka kalan sira tagama, o be se ka kalanden dɛmɛ a k’a faamu ko a kɔrɔtalen be a ka kɛ “Ala ka kuma kɛbaaw” ye.—Yaku. 1:22.
4 Delili min be kɛ bibulu-kalan na, a nafa ka bon. A b’an dɛmɛ ka Ala ka duga sɔrɔ (Luka 11:13). A b’a yira ko Ala ka Kuma kalan ye sɔbɛko ye. Kalanden kɛtɔ k’an ka delili lamɛn, o b’a dege delili kɛcogo la (Luka 6:40). Ka fara o kan, deliliw be se ka kalanden dɛmɛ ka jɛnɲɔgɔnya sigi ale ni Jehova cɛ n’an b’u fɔ n’an dusukun bɛɛ ye, ani n’an dusukun falen be kanuya ni waleɲumanlɔn na Jehova fan fɛ.
[Study Questions]
1. (a) Mun na a ka ɲi an ka bibulukalan daminɛ ani an k’a kuncɛ ni delili ye? (b) Cogo juman na an be se ka delili koo daminɛ?
2. Ni balimacɛ batiselen dɔ be balimamuso dɔ bila sira ka taga bibulukalan kɛ, wala n’o y’a sɔrɔ weleweledala cɛman lo min ma batise fɔlɔ, jɔn lo bena delili fɔ?
3. An be se ka mun lo kofɔ deliliw kɔnɔ bibulukalan na?
4. Ka kalan daminɛ ani k’a kuncɛ ni delili ye, nafa juman b’o la?