Aw Ka Ɲiningaliw Jaabiliw

◼ Bibulukalan kɛtɔ boon donda la, yala an ka ɲi ka delili kɛ wa?

Nafa caaman b’a la ka bibulukalan daminɛ ani k’a kuncɛ ni delili ye. N’an be delili kɛ, an b’a ɲini Jehova fɛ a k’an dɛmɛ ni hakili senu ye kalan tuma na (Luka 11:13). An ka delili be kalanden dɛmɛ fana a k’a sɔbɛ don a ka kalan na. A kɛtɔ k’an ka delili lamɛn, o b’a kalan fana delili kɛcogo la (Luka 6:40). O kama, n’a be se ka kɛ, a ka ɲi an k’a daminɛ ka delili kɛ ni kalanden ye joona. Nka, komi koow cogoya tɛ kelen ye, kalan ɲɛminɛbaga ka ɲi ka hakili sɔrɔ n’a b’a fɛ k’a latigɛ ka delili kɛ bibulukalan kɛtɔ boon donda la.

An ka ɲi k’an janto koo dɔ la min kɔrɔtanin lo: o ye kalan kɛyɔrɔ ye. Ni kalan juu sigira ka ɲɛ ani an b’a kɛ yɔrɔ min na mɔgɔw ɲɛɛ t’an na, an be se k’a daminɛ ani k’a kuncɛ ni delili ye. An k’o delili kɛ nɛmɛnɛmɛ ka surunya. Nka n’o kɛcogo bena mɔgɔw ɲɛɛw sama ka la an kan, wala n’o bena kalanden degun, a ka fisa an ka kɔnɔni kɛ fɔlɔ. An bena delili kɛli daminɛ ni kalan be se ka kɛ yɔrɔ min na mɔgɔw ɲɛɛ t’an na. Kalan mana kɛ yɔrɔ o yɔrɔ, an ka ɲi an ka hakili sɔrɔ k’a latigɛ wagati min bɛnnin lo ka kalan daminɛ ani k’a kuncɛ ni delili ye.—An ka Masaya cidenyabaara ɲɛɛ 6 lajɛ, saan 2005 marisikalo ta.