Mɔgɔ sifaw bɛɛ bena kisi
1 Ala ka nɛɛma kɛra sababu ye kisili be se ka sɔrɔ. Ala sago ye ko “mɔgɔw bɛɛ ka kisi ka se ka tiɲɛ dɔn.” (1 Tim. 2:3, 4). An be lɔyɔrɔ min sɔrɔ Ala ɲɛɛ kɔrɔ, o tɛ bɔ an ka siya koo la, wala an ka lɔyɔrɔ la nin duniɲa kɔnɔ, an ka setigiya, an ka sawura la, fɔɔ an ka lanaya, an be min la Yesu ka kunmabɔ saraka kan ( Yuh. 3:16, 36). An minw ye Ala ka baarakɛɲɔgɔnw ye, an ka kan ka sigaɲɔgɔnnako sifaw bɛɛ bɔ an dusu la, sabu u be se k’an dusukun lasun a ka ban mɔgɔw la, k’a masɔrɔ Jehova b’a fɛ ka sɔn u la.
2 An kana mɔgɔw kiti tigɛ: Jehova be filɛli kɛ mɔgɔw kɔnɔ. Nka a t’o kɛ ni ŋaniya jugu ye, a fana tɛ mɔgɔ bɔ mɔgɔ la (1 Sam. 16:7). A fana b’a ye u be se ka min kɛ. O cogo la, minw b’a fɛ ka baara kɛ a ye, a b’u jati i ko negelafɛnw (Agize 2:7). Yala an be mɔgɔw jate i n’a fɔ Ala b’a kɛ cogo min na wa?
3 An be mɔgɔ minw kunbɛn waajuli kɛtɔ, n’a sɔrɔ u dɔw sawura be an kɔnɔgwan. Fani ɲɛnama tɛ u dɔw la, wala u ka fanidoncogo man ɲi, u bonbosi ma li, wala u be nɛgɛ don u nuun na wala u dagolow na. Soo tɛ u dɔw fɛ. Dɔ wɛrɛw ka fari n’an ye. Sanni an k’o ɲɔgɔnna mɔgɔw kiti tigɛ k’u tɛ se ka kɛ Jehova batobagaw ye, an ka kan ka koow filɛ ni ɲɛɛ ɲuman ye, “katuguni an fana tun ye hakilintanw ye ka kɔrɔ, ani kan bilabaaw, ni mɔgɔ lafililenw.” (Tite 3:3). N’an b’o faamu, an bena teliya ka waajuli kɛ mɔgɔw bɛɛ ye, hali minw sawura b’an lasun k’a miiri k’u man kan n’a ye.
4 Kerecɛn fɔlɔw ka ɲɛyiraliw: Yesu Kirista tun be wagati ta ka mɔgɔw dɛmɛ, k’a masɔrɔ dɔw tun b’a jate k’o mɔgɔw tɛ se ka kɛ Jehova batobagaw ye yɛrɛ (Luka 8:26-39). Hali n’a tun t’a ɲɛɛ tugu kɛcogo jugumanw kan abada, a tun b’a lɔn ko mɔgɔ be se ka ben ɲɛnamaya kɛcogo jugu la (Luka 7:37, 38, 44-48). O kama, a y’u faamu, ani “u hinɛ donna a la, k’a masɔrɔ o mɔgɔw tun bɛ i ko gɛnbaa tɛ saga minnu la.” (Marka 6:34). Yala an be se k’a ladegi a ɲɛɛ ma o fan fɛ wa?
5 Mɔgɔw ye ciden Pol bon ni kabakuruw ye, u y’a bugɔ, ani u y’a bila kaso la (Kew. 14:19; 16:22, 23). Yala o fariyakow dimiya tora a kɔnɔ, ani a y’a miiri ko a b’a ka wagati tiɲɛna siya wɛrɛw kosɔn wa? Fewu. A tun b’a lɔn ko mɔgɔ kɔnɔgwɛw be se ka sɔrɔ siyaw bɛɛ cɛ. Ani, a cɛsirinen tun be k’u ɲini k’u sɔrɔ. Mɔgɔ minw be an ka kiinw kɔnɔ, ani u bɔyɔrɔw n’u ka landaw tɛ kelen ye, yala an b’u jate o cogo kelen na wa?
6 An ka mɔgɔw bisimila bi tile la: Ala ka baarakɛla caaman dusu ka di k’a ye ko balimaw y’u bisimila kafo kɔnɔ n’u m’u ka sawura cogo jati koo ye. Alemaɲi jamana na, cɛɛ dɔ nana Masaya Boon na loon dɔ la. A bonbosi tun ma li, a kunsigiw tun ka jan fɔɔ ka se a gamanw kan, ani fani nɔgɔw tun b’a la. Tɔgɔ ɲuman tun t’a la. O bɛɛ n’a ta, balimaw y’a bisimila ni dusudiya ye lajɛn na. O y’a kabakoya fɔɔ a segira ka na lɔgɔkun nɔfɛta kɔnɔ. A ma mɛɛn, a y’a yɛrɛ saniya, a y’a dabila ka sigarati min, ani a y’a ka furu siri sariya sira kan n’a terimuso ye. Wagati dɔɔni o kɔ, ale n’a muso n’u deenw bɛɛ lajɛnnenw y’u seen don Jehova ka baara la.
7 An ka Ala tɛ mɔgɔ bɔ mɔgɔ la. An k’a ladegi, an kɛtɔ ka mɔgɔ sifaw bɛɛ weele u ka na nafa sɔrɔ Ala ka nɛɛma la.
[Study Questions]
1. An be se ka lɔyɔrɔ min sɔrɔ Ala ɲɛɛ kɔrɔ, o be bɔ mun lo la?
2, 3. Mun lo be se k’an dɛmɛ an kana mɔgɔw sawura filɛ k’u kiti tigɛ?
4, 5. An be kalan juman sɔrɔ Yesu ni Pol ka ɲɛyiraliw la?
6. An be mɔgɔ kuraw minɛ cogo min na lajɛnw na, o be se ka nɔɔ juman to u kan?
7. Cogo juman na an be se k’an ka Ala ladegi, ale min tɛ mɔgɔ bɔ mɔgɔ la?
[Caption on page 3]
“Ala tɛ mɔgɔ bɔ mɔgɔ la, nka siya o siya la, mɔgɔ min bɛ siran a ɲɛ ka ko tilennen kɛ, o de ko ka di a ye.” —Kew. 10:34, 35.