Waajuli kɛli b’an dɛmɛ ka muɲuli kɛ

¹ Ala ka Kuma b’an jagwɛlɛya ko “ɲɔgɔndan boli min dara an ɲɛ, an ka o boli ni jijali ye.” (Heb. 12:1). Ɲɔgɔndan boli kɛbaga ka kan ka muɲuli kɛ walisa ka see sɔrɔ. O cogo kelen na, an fana ka kan ka muɲuli kɛ walisa ka ɲɛnamaya banbali sara sɔrɔ (Heb. 10:36). Cogo juman na kerecɛnya baara be se k’an dɛmɛ ka muɲuli kɛ ni kantigiya ye fɔɔ a laban na?—Mat. 24:13.

² A be hakilimaya barika don an na: Bibulu ye layidu cɛɲumanba kɛ duniɲa kura tilennen koo la. An kɛtɔ k’o layidu weleweleda mɔgɔw ye, an yɛrɛ ka jigiya be barika sɔrɔ (1 Tes. 5:8). An be tiɲɛnko minw kalan Bibulu kɔnɔ, an bena cogoya sɔrɔ k’u ɲɛfɔ mɔgɔw ye n’an b’an seen don waajuli la tuma o tuma. O b’an dɛmɛ k’an ka lanaya lafasa. O la, an ka hakilimaya be barika sɔrɔ.

³ N’an b’a fɛ ka mɔgɔw kalan bɛrɛbɛrɛ, fɔɔ an yɛrɛ ka Bibulu tiɲɛn kalan faamu koɲuman. An ka kan ka sɛgɛsɛgɛri kɛ ani ka miiri kalan kan. An ka jijali sɔbɛ sababu fɛ, an ka lɔnniya be dunya, an ka lanaya be fanga sɔrɔ, ani an ka hakilimaya be barika kura sɔrɔ (Ntal. 2:3-5). O cogo la, an kɛtɔ k’a ɲini ka mɔgɔ wɛrɛw dɛmɛ, an b’an yɛrɛ barikaya fana.—1 Tim. 4:15, 16.

⁴ Ka waajuli kɛ ni kisɛya ye, o ye “Ala ka kɛlɛkɛ minɛnw bɛɛ” faan dɔ ye. O b’an dɛmɛ an ka lɔ ka ɲɛ ka Sitanɛ ni jinɛw kunbɛn (Efes. 6:10-13, 15). N’an bolo degunnen be Alakow la, o bena an dɛmɛ an k’an ɲɛɛ jɔlen to koo nafamanw kan. O bena an tanga Sitanɛ ka duniɲa ma, a tɛna an kunnatiɲɛ (Kolos. 3:2). An kɛtɔ ka mɔgɔw kalan Jehova ka sira koo la, o b’an hakili jigi tuma o tuma ko an yɛrɛ ka kan ka tagama cogo senuman na.—1 Piɛre 2:12.

⁵ Ala be barika don an na: Waajuli baara b’an kalan ko an k’an bolo la Jehova kan (2 Kɔr. 4:1, 7). O ye koo ɲuman ye dɛ! O jigidali ɲɔgɔn tɛ see di an ma an ka waajulibaara dɔrɔn kɛ dɛ. A fana b’an dɛmɛ ka koow ɲɛnabɔ an ka ɲɛnamaya kɔnɔ: koo o koo mana an sɔrɔ (Filip. 4:11-13). Tiɲɛn na, waajibi lo an k’a dege k’an jigi la Jehova kan walisa ka se ka muɲuli kɛ (Zab. 55:23). Waajuli kɛli b’an dɛmɛ ka muɲuli kɛ cogoya caaman na dɛe.