Waajuli baara b’an dɛmɛ an ka to barika la Alako ta fan fɛ

1. Waajuli baara b’an nafa cogo di?

¹ N’an b’an seen don bɛrɛbɛrɛ waajuli baara la, o be se ka barika don an na Alako ta fan fɛ ani ka dɔ fara an ka hɛɛrɛ kan. Tiɲɛn lo, an ka waajuli baara kuun fɔlɔ ye k’an koo diya Jehova ye. Nka, cikan min ko an “ka Ala ka kuma fɔ,” an kɛtɔ k’o cikan bato, an be Jehova ka dugaw sɔrɔ ani o b’an nafa cogo wɛrɛw la (2 Tim. 4:2; Esa. 48:17, 18). Waajuli baara be se ka barika don an na ani k’an ninsɔndiya cogo di?

2. Cidenya baara be barika don an na cogo di?

² An be duga ani barika sɔrɔ: Waajuli baara b’an jija an k’an ɲɛɛ jɔlen to Masaya ka dugaw kan sanni an ka miiri bi gwɛlɛyaw koo la (2 Kɔr. 4:18). N’an be Bibulu ka kalanw ɲɛfɔ mɔgɔw ye, an ka limaniya be barika sɔrɔ Jehova ka layiduw koo la ani an ka waleɲumanlɔn be sabati tiɲɛn koo la (Es. 65:13, 14). N’an be mɔgɔw dɛmɛ u ka jɛnɲɔgɔnya ɲuman kɛ ni Jehova ye walisa u kana kɛ “diɲɛ taw ye,” o b’an yɛrɛ dɛmɛ an k’an cɛsiri k’an seen bɔ duniɲa ka koow la.—Yuh. 17:14, 16; Rom. 12:2.

3. An ka cidenya baara b’an dɛmɛ ka kerecɛn jogow degi cogo di?

³ Waajuli baara b’an dɛmɛ ka kerecɛn jogo dɔw degi. Ɲɛyirali fɛ, n’an b’an jija ka “kɛ fɛn bɛɛ ye bɛɛ kosɔn,” o b’an dɛmɛ ka majigilenya degi kosɔbɛ (1 Kɔr. 9:19-23). N’an be kuma mɔgɔw fɛ, minw ‘sɛgɛnnen jigi tigɛlen lo i ko gwɛnbaga tɛ saga minnu na,’ o b’an dɛmɛ k’a ɲini k’u faamu ani ka hinɛ u la (Mat. 9:36). N’an b’an timinandiya hali ni mɔgɔw t’u mako don wala u b’an kɛlɛ, o b’an dɛmɛ ka muɲuli degi. N’an b’an yɛrɛ di ka mɔgɔw dɛmɛ, an ka dusudiya be bonya.—Kɛw. 20:35.

4. I be mun lo miiri cidenya baara koo la?

⁴ Mɔgɔ kelenpe min ka kan ni an ka batoli ye, an ka cidenya baara be ale tando. O ye nɛɛma ye an fɛ dɛ! Cidenya baara be barika don an na. A be duga caaman lase mɔgɔw ma minw b’u yɛrɛ bɛɛ di ka “Kibaru Duman fɔ” bɛrɛbɛrɛ.—Kɛw. 20:24.