An k’an seko kɛ ka kibaro duman lase mɔgɔ caamanba ma
1 Yesu ka kalanden fɔlɔw y’a ɲini sɔbɛ la ka Masaya cira jɛnsɛn yɔrɔ bɛɛ. U ye fɛɛrɛ nafamanw kɛ walisa kibaro duman ka se mɔgɔ caamanba ma. Hakili senu barika la, u ye Bibulu kitabu dɔw sɛbɛ foroba gɛrɛkikan na. Rome ka masaya kɔnɔ, siyaw bɛɛ tun b’o foroba kaan faamu. Ka fara o kan, saan kɛmɛ 2nan ni 3nan wagati la, i be taga a sɔrɔ waajulikɛla kisɛmanw lo kɛra mɔgɔ fɔlɔw ye minw y’a daminɛ ka baara kɛ ni codex ye [bi ka kitabu bisigilamanw]. Sɛgɛsɛgɛri ta fan fɛ, baara kɛli tun ka di n’o codex ye ka tɛmɛ kitabu melekelenw kan.
2 Baara be kɛ ni fɛɛrɛ kuraw ye: Jehova tun kɔnna k’a fɔ cira Esayi daa fɛ ko: “I na siyaw ka nɔnɔ min.” (Esayi 60:16). Bi tilew la, ka kɛɲɛ n’o ciraya kuma ye, Jehova sagokɛlaw be baara kɛra ni jamanaw ka minan nafamanw ye walisa ka waajulibaara lataga ɲɛ. Ɲɛyirali fɛ, Bibulu Kalandenw y’a daminɛ ka filimu “Photo-Drame de la Création” yira mɔgɔw la 1914 saan na. Filimu tun lo min be kuma. A ɲɔgɔnna tun ma bɔ fɔlɔ ka kɛ jagofɛn ye yɛrɛ. A tun be mɛɛn lɛri seegi. Filimu ni jaa kulɛrilamanw tun lo, kumakan farala minw kan. A ye seereya barikaman di mɔgɔ miliyɔn caaman ma.
3 Bi, Ala sagokɛlaw be baara kɛ ni ɛnperimɛriw ni mansi ŋanaw ye, minw ka teli kosɔbɛ, walisa ka Bibuluw ni gafew dilan kaan caaman na. Taransipɔri kɛcogo teliman fɛ, o gafew be jɛnsɛn dugukolo yɔrɔ janw na jamana 235 kɔnɔ. A ka hakili senu barika la, Jehova y’a sagokɛlaw lasun u ka baara kɛ bɛrɛbɛrɛ n’o fɛɛrɛw ye walisa ka Bibulu tiɲɛn kalan labila mɔgɔ caamanba ye bi ka tɛmɛ fɔlɔ kan.
4 An ka yɛlɛmani dɔw kɛ an yɛrɛ ka koow la: Batobaga sɔbɛw fana ye dusu sɔrɔ ka yɛlɛmani dɔw kɛ walisa ka se ka kibaro duman lase mɔgɔ caaman ma. U caaman y’u ka ɲɛnamaya kɛcogo nɔgɔya walisa k’u seen don bɛrɛbɛrɛ waajulibaara la. Dɔw wulila ka taga sigi yɔrɔ min na Masaya weleweledalaw man ca. Dɔ wɛrɛw ye dɔ fara u ka cidenyabaara kan u kɛtɔ ka kaan wɛrɛ dege.
5 Ka fara o kan, an be se ka kibaro duman lase mɔgɔ caamanba ma n’an be waajuli kɛ tuma min na mɔgɔw be sɔrɔ u ka soo, ani yɔrɔ min na mɔgɔw be sɔrɔ yen. I ka kiin kɔnɔ, n’i mɔgɔw tɛ sɔrɔ u ka soo tile fɛ, yala i be se k’i ka labɛnsira yɛlɛma ani ka waajuli kɛ tileben wagati la wa? Yala foroba yɔrɔ dɔw be yen ni waajuli be se ka kɛ yen wa? Yala i ye waajuli kɛ k’a filɛ telefɔni fɛ ani jagokɛyɔrɔw la wa? Yala i be cogoyaw ɲini ka sen fɛ seereya di mɔgɔw ma wa?
6 Seereyaba lo be dira Jehova tɔgɔ n’a Masaya koo la. Nɛɛma lo an fɛ k’an seen don o baara la dɛ! An ka to k’an seko kɛ ka tiɲɛn kalan lase mɔgɔ caamanba ma. O kalan be bɔ Ala ka Kuma na, ani a be mɔgɔw niin kisi.—Mat. 28:19, 20.
[Study Questions]
1. Kerecɛn fɔlɔw ye mun lo kɛ walisa kibaro duman ka se mɔgɔ caamanba ma?
2, 3. (a) Cogo juman na Esayi 60:16 be dafara bi tilew la? (b) Cogo juman na baara be kɛra ni fɛɛrɛ kuraw ye walisa ka batoli saniman yiriwa?
4. Dɔw ye yɛlɛmani jumanw kɛ u ka ɲɛnamaya kɔnɔ walisa ka kibaro duman lase mɔgɔ caamanba ma?
5, 6. Mun lo be se ka kɛ walisa ka mɔgɔ caamanba sɔrɔ an ka kiinw kɔnɔ?