“Fɛn bɛɛ kɛ Kibaru Duman kosɔn”

1. Masaya waajulikɛla labɛnnen be ka mun lo kɛ mɔgɔw ye, ani mun na?

¹ Ciden Pol y’a jati ko waajibi lo ale fɛ ka kibaro duman fɔ mɔgɔw ye (1 Kɔr. 9:⁠16, 19, 23). O cogo kelen na, komi an fana be jɔrɔ mɔgɔw ka hɛɛrɛ banbali koo la, o lo b’an lasun k’an seko kɛ walisa ka kibaro duman fɔ u ye.

2. Waajuli kɛtɔ, an b’a fɛ k’an ka porogramu makɛɲɛ cogo di, ani mun na?

² Waajuli kɛ yɔrɔ la ani tuma min na mɔgɔw be se ka sɔrɔ: Jɛgɛminɛla ɲuman tɛ a ka jɔɔ wala dulen fili yɔrɔ la ani tuma min bɛnnen be ale ma. Nka, a b’a fili yɔrɔ la ani tuma min na jɛgɛ caaman be se ka sɔrɔ. I ko “mɔgɔ ɲininaw,” an fana mako b’a la k’an ka porogramu makɛɲɛ walisa ka se ka mɔgɔw sɔrɔ an ka kiinw kɔnɔ. O cogo la, an bena ninsɔndiyaba sɔrɔ nɛɛma baara la o min ye ka “jɛgɛ sifa bɛɛ” lajɛn (Mat. 4:​19; 13:⁠47). Yala an be se ka bɔ sɔgɔma joona ka seereya kɛ siradaw la wala ka taga bɔ mɔgɔw ye u ka soo wulada fɛ wa? Pol ka laɲinita tun ye ka “Kibaru Duman” seereya kɛ k’a dafa ani a tun be tɛmɛ sababuw bɛɛ fɛ walisa k’o kɛ.​—⁠Kɛw. 17:⁠17; 20:⁠20, 24.

3, 4. Waajuli kɛtɔ, an be se ka baro makɛɲɛ cogo di, ani nafa juman b’o la?

³ I ka baro makɛɲɛ mɔgɔw ka makoyaw ma: Jɛgɛminɛlaw be to k’u ka baarakɛcogo yɛlɛma walisa ka jɛgɛ sifa dɔw minɛ. An be se ka Masaya kibaro duman koo diya mɔgɔw ye an ka kiinw kɔnɔ cogo di? An ka kan ka tɛmɛ mɔgɔw ka haminanko dɔw fɛ ka baro dadon nɛmɛnɛmɛ. O kɔ, an k’u ka fɛtaw lamɛn koɲuman ( Yak. 1:​19). An be se ka ɲiningali kɛ min b’u lasun k’u ka fɛtaw fɔ (Ntal. 20:⁠5). O cogo la, an bena se ka kibaro duman fɔcogo makɛɲɛ walisa ka mɔgɔw dusu sɔrɔ. Pol tun kɛra “fɛn bɛɛ ye bɛɛ kosɔn” (1 Kɔr. 9:​22). N’an b’a fɛ ka mɔgɔw dusukunw sɔrɔ fɔɔ an ka magaya.

⁴ “Ka fɛn ɲuman kibaru duman fɔ” mɔgɔw ye, o ye ninsɔndiyaba ye dɛ! (Es. 52:⁠7). An ka “fɛn bɛɛ kɛ Kibaru Duman kosɔn” walisa k’a fɔ mɔgɔ caamanba ye.​​—⁠1 Kɔr. 9:​23.