Yɔrɔ 12nan: An ka bibulukalanw kɛ minw be ɲɛtaga sɔrɔ

An ka kalandenw dɛmɛ ka bibulukalanw daminɛ ani k’u kɛ

¹ An ka kalandenw mana a daminɛ ka waajuli kɛ, u be se ka siran ka bibulukalanw daminɛ ani k’u kɛ u yɛrɛw ma. Cogo juman na an be se k’u dɛmɛ u ka hakilisigi sɔrɔ o baara la: o min ye an ka cidenyabaara fanba ye?—Mat. 24:14; 28:19, 20.

² Kalanden mana kɛ welewele-dala ye min ma batise fɔlɔ, i be taga a sɔrɔ a seen be Ala ka Mara cidenyabaara lakɔli la ka ban. O lakɔli b’a degi kalanw labɛncogo n’u dicogo la. O la, a bena kalan kɛcogo lɔn ani a bena kɛ ‘baarakɛla ye, maloya sababu tɛ min na. A be tiɲɛ kuma faranfasi cogo sɛbɛ la.’—2 Tim. 2:15.

³ An ka kalanden kalan an yɛrɛ ka ɲɛyirali fɛ: Yesu y’a ka kalandenw dege baara la a kɛtɔ ka baarakɛsira gwɛnen yira u la, ani ka ɲɛyirali ɲuman di u ma. A y’a fɔ ko: “kalanden o kalanden kalanna ka se, o na kɛ i ko a karamɔgɔ.” (Luka 6:40). A kɔrɔtalen be kosɔbɛ an ka Yesu ladegi an kɛtɔ ka ɲɛyirali ɲuman di kalanden ma. A ɲɛɛ mana la an ka ɲɛyirali kan waajuli la, a bena a faamu ko viziti kuraw kuun ye ka bibulukalanw daminɛ.

⁴ An k’a ɲɛfɔ a ye ko n’an be bibulukalan kofɔra mɔgɔw ye, waajibi tɛ ka kalan kɛcogo lakali ka walawala. Tuma caaman na, a ka fisa an ka tɛmɛ gafe kalanta ka dakun kelen wala fila fɛ ka kalan kɛcogo ɲɛyira a tigi la. O kɛcogo ladili nafamanw be sɔrɔ sɛbɛ nin ɲɛɛ 8nan na, ani saan 2002, zanwiyekalo, An ka Masaya Cidenyabaara ɲɛɛ 6nan na.

⁵ Ni sababu ɲuman dɔ sɔrɔla, an ka kalanden weele a k’an bila sira, wala a ka weleweledala kolɔnbaga dɔ bila sira ka taga bibulukalan dɔ kɛ. O kalan kɛtɔ, a be se ka ɲɛfɔli kɛ dakun dɔ kan, wala vɛrise jɔnjɔn dɔ kan. O cogo la, kɔrɔsili kɛtɔ, kalanden bena bibulukalanw kɛcogo dege: kalan minw be ɲɛtaga sɔrɔ (Ntal. 27:17; 2 Tim. 2:2). An k’a fo, ani an k’a yira a la cogo min na a be se ka ɲɛtaga sɔrɔ.

⁶ N’an be weleweledala kuraw dege u ka kɛ Ala ka Kuma karamɔgɔw ye, o lo bena u kalan “kɛwale ɲumanw” kɛli la: ka bibulukalanw daminɛ ani k’u kɛ u yɛrɛw ma (2 Tim. 3:17). An ka jɛn n’u ye ka baara kɛ ka welekan nin lase mɔgɔw ma ni kanuya ye: “Min b’a fɛ, o ka ɲɛnamaya ji min gansan.” O ye baara ye min be mɔgɔ wasa dɛ!—Jira. 22:17.