An ka bibulukalanw kɛ minw be ɲɛtaga sɔrɔ

Yɔrɔ fɔlɔ: Bibulukalan ye mun ye?

¹ Kalo o kalo, duniɲa kuru bɛɛ kɔnɔ, Ala ka baarakɛlaw be bibulukalan miliyɔn wɔɔrɔ ɲɔgɔn kɛ ni mɔgɔw ye. N’an be baara kɛ ni kalan kɛcogo barikamanw ye, an be se k’o Bibulu kalandenw dɛmɛ u ka ɲɛtaga sɔrɔ fɔɔ k’u yɛrɛkun di Jehova ma ani ka batise walisa u ka “se ka mɔgɔ wɛrɛw kalan fana.” (2 Tim. 2:2). Yala i b’a fɛ k’i ka Bibulu kalanden dɛmɛ a k’o ɲɛtaga ɲɔgɔn sɔrɔ wa? K’a daminɛ nin zuwekalo la, An ka Masaya Cidenyabaara bena to ka barokun dɔw bɔ bibulukalanw kɛcogo jɔnjɔnw kan. U bena a ɲɛfɔ cogo min na kalanden be se ka ɲɛtaga sɔrɔ.

² Tuma min na a be se ka jati Bibulu kalan ye: N’i be tɛmɛ gafew fɛ ka sin ka baro kɛ ni mɔgɔ dɔ ye Bibulu kɔnɔ tuma o tuma, hali wagati kunkurunin kɔnɔ, i be bibulukalan lo kɛra n’a tigi ye. Bibulukalan lo tiɲɛn na, hali n’o kalan be kɛra soda la wala telefɔni fɛ. N’an y’o kalan kɛ siɲɛ fila ka fara ɲɛyirali fɔlɔ ta kan, ani n’a be komi o kalan bena taga ɲɛ, an be se k’a jate minɛ an ka rapɔɔri kɔnɔ.

³ Baara be kɛ ni kitabunin Ɲini ani gafe Dɔnniya ye walisa ka bibulukalan caaman kɛ ni mɔgɔw ye. N’o gafe fila kalan banna, n’a gwɛnen be ko kalanden be ɲɛtaga kɛra, hali ni dɔɔni dɔɔni lo, ani n’a be min kalanna n’o ka di a ye, o la an ka taga ɲɛ ni kalan ye gafe Adorez Dieu kɔnɔ. O tɛ waajibi ye tuma bɛɛ. Minw ma kalan kɛ ka taga yɔrɔ jan, an be se ka tɛmɛ kitabunin I be se ka kɛ Ala teri ye! fɛ ka kalan kɛ n’u ye.

⁴ Bibulukalan baara sɔrɔla ka kɛ fɛɛrɛ bɛrɛbɛrɛ ye min ye mɔgɔ miliyɔn caaman dɛmɛ u ka kɛ Yesu Kirista ka kalanden lakikaw ye (Mat. 28:19, 20). Ladiliw bena to ka di nin barokun nin kan kalo nataw la. N’i b’u sira tagama, i bena se ka bibulukalan kɛ min be ɲɛtaga sɔrɔ.