An ka mɔgɔw dɛmɛ u ka kanminɛli kɛ n’u “dusukunw bɛɛ ye”
1 Kanminɛli ye waajibiko ye n’an b’a fɛ ka Jehova bato ale b’a fɛ cogo min na (Dut. 12:28; 1 Piɛre 1:14-16). Yanni dɔɔni cɛ, Ala bena kiti tigɛ “Ala dɔnbaliw” kan ani “Kibaru Duman kan minɛbaliw” kan (2 Tes. 1:8). Cogo juman na an be se ka mɔgɔw dɛmɛ u ka sɔn Ala ka Kuma kalan ma n’u “dusukunw bɛɛ ye”?—Rom. 6:17.
2 An k’u dɛmɛ u ka dɔ fara u ka lanaya n’u ka kanuya kan: Bibulu kɔnɔ, kanminɛli ni lanaya be taga ɲɔgɔn fɛ. Ciden Pol kumana “Ala banbali ka ci fɔlen” koo la, min be mɔgɔw dɛmɛ ‘ka la Ala la k’a kanminɛ.’ (Rom. 16:26). Heburu sapitiri 11nan be mɔgɔ limaniyalen caaman kofɔ, minw kɛra ɲɛyiraliw ye. U caaman ye koow kɛ ka kɛɲɛ ni Jehova ka sagoya yiralen ye (Heb. 11:7, 8, 17). Faan wɛrɛ fɛ, kanminɛbaliya ni dannabaliya fana be taga ɲɔgɔn fɛ (Yuh. 3:36; Heb. 3:18, 19). An ka kan ka hakilidiya sɔrɔ n’an be baara kɛ ni Ala ka Kuma ye. O cogo la, an bena se ka mɔgɔw dɛmɛ u ka lanaya sɔrɔ, lanaya sifa min bena u lasun ka kanminɛli kɛ.—2 Tim. 2:15; Yaku. 2:14, 17.
3 Lanaya ni Ala kanu be taga ɲɔgɔn fɛ fana (Dut. 5:10; 11:1, 22; 30:16). 1 Yuhana 5:3 b’a fɔ ko “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.” Cogo juman na an be se ka Bibulu kalandenw dɛmɛ u k’u ka kanuya bonya Jehova fan fɛ? Kalan kɛtɔ n’u ye, an ka sababu dɔw ɲini ka dɔ fara u ka waleɲumanlɔn kan ka ɲɛsin Jehova ka jogow ma. An k’a yira u la cogo min na an yɛrɛ be Ala waleɲuman lɔn kosɔbɛ. An ka kalanden dɛmɛ a ka miiri k’a filɛ cogo min na a be se ka jɛnɲɔgɔnya teriman kɛ ni Jehova ye. Ka tɛmɛ fɛɛn bɛɛ kan, Jehova kanu lo bena dusu don mɔgɔw la, ani an yɛrɛ la, k’a kanminɛ n’an dusukun bɛɛ ye.—Mat. 22:37.
4 An yɛrɛ ka ɲɛyirali fɛ: An ka ɲɛyirali ye cogo barikaman dɔ ye min be se ka mɔgɔw jija u ka sɔn kibaro duman na. Nka an yɛrɛ mako b’a la ka jijali kɛ tuma bɛɛ walisa ka “kanminɛli dusukun” sɔrɔ (1 Masak. 3:9; Ntal. 4:23, NW). O kɔrɔ ye mun ye? An ka ɲi k’an dusukun balo ni bibulukalan ye ani lajɛnw tagali ye tuma o tuma (Zab. 1:1, 2; Heb. 10:24, 25). An k’a ɲini ka jɛnɲɔgɔnya kɛ ni mɔgɔw ye, minw dusukun tilennen be tiɲɛn batoli sira kan (Ntal. 13:20). An k’an sendon waajulibaara la tuma o tuma n’an b’a ɲini ka kiin mɔgɔw dɛmɛ ni kɔnɔgwɛ ye. An ka Jehova deli a k’an dɛmɛ ka dusukun ɲuman sɔrɔ (Zab. 86:11). Koo minw be se k’an dusukun tiɲɛ, an ka ban u la, i n’a fɔ jatɔya ani ɲɛnagwɛko minw be fariyakow yira. An ka koow magwɛn minw b’an dɛmɛ k’an magwɛrɛ Ala la, ani u b’a to an ka jɛnɲɔgɔnya be barikaya sɔrɔ.—Yaku. 4:7, 8.
5 fɔlɔ la, Jehova tun y’a ka mɔgɔw hakili sigi ko a bena dugaw lase u ma n’u tun ye ale kaan mɛn (Dut. 28:1, 2). O cogo kelen na bi, minw be Jehova kanminɛ i ko u ka kuntigi, a be duga caaman lase u ma (Kew. 5:32). O kama, an ka ɲɛyirali n’an ka kalan fɛ, an ka mɔgɔw dɛmɛ u ka kanminɛli kɛ n’u dusukun bɛɛ ye.
[Study Questions]
1. Jehova be mun ɲini a batobagaw fɛ?
2. Mun na a kɔrɔtalen be an ka mɔgɔw dɛmɛ u ka lanaya barikaman sɔrɔ?
3. (a) Cogo juman na kanminɛli ni kanuya be taga ɲɔgɔn fɛ? (b) Cogo juman na an be se ka Bibulu kalandenw dɛmɛ u k’u ka kanuya bonya Jehova fan fɛ?
4. (a) Mun na an yɛrɛ ka ɲɛyirali kɔrɔtalen be? (b) An ka ɲi ka mun kɛ walisa ka “kanminɛli dusukun” sɔrɔ?
5. Minw be kanminɛli kɛ, u be duga jumanw sɔrɔ?